1Emva kwalokho inkosi uAhasuweru yamphakamisa waba mkhulu uHamani indodana kaHamedatha waseAgagi, yamnika isikhundla esingaphezu kwazo zonke izikhulu kanye laye.
2Ngakho zonke inceku zenkosi esigodlweni zamkhothamela uHamani, zakhuleka kuye, ngoba inkosi yayithe kakwenziwe njalo. Kodwa uMoridekayi kakhothamanga akhuleke kuye.
3Inceku zasesigodlweni zathi kuye: Kungani udelela umlayo wenkosi na?
4Zambuza insuku ngensuku, kodwa yena wala ukuzilalela; zasezimtshela uHamani ukuba zibone ukuthi ukwala kukaMoridekayi kuzayekelwa yini; ngoba wayesezitshelile ukuthi yena ungumJuda.
5Lapho uHamani esebonile ukuthi uMoridekayi kamkhothameli lokuthi kakhuleki kuye, wathukuthela kakhulu.
6Esezwile ukuthi uMoridekayi ungowasiphi isizwe, kathandanga ukubamba yena yedwa, kodwa wadinga indlela yokubulala bonke abaJuda, abantu bakibo kaMoridekayi, embusweni wonke kaAhasuweru.
7Ngomnyaka wetshumi lambili wokubusa kwenkosi uAhasuweru, ngenyanga yokuqala ethiwa nguNisani, benza inkatho ethiwa yiPurimi phambi kukaHamani mayelana losuku lenyanga; inkatho yadla usuku lwetshumi lantathu lwenyanga yetshumi lambili ethiwa nguAdari.
8UHamani wasesithi enkosini uAhasuweru: Kukhona abantu abathile abahlakazeke phakathi kwabantu emazweni wonke ombuso wakho abangahlangani labanye; imilayo yabo yehlukile kweyabo bonke abanye abantu, kabayigcini imilayo yakho, nkosi; kakufanelanga ukuba inkosi ibayekele.
9Uba kulungile enkosini, kakulotshwe umthetho wokuthi kababulawe, mina ngizakhupha amathalenta esiliva azinkulungwane ezilitshumi, nginike izikhulu zenkosi ukuba afakwe enothweni yenkosi.
10Inkosi yasikhupha indandatho yophawu lwayo esandleni sayo, yayinika uHamani indodana kaHamedatha waseAgagi, isitha sabaJuda,
11yathi kuye: Imali kanye labantu kungokwakho, yenza okuthandayo kibo.
12Ngosuku lwetshumi lantathu lwenyanga yokuqala kwabizwa ababhali benkosi; ngokulaya kukaHamani kwalotshwa umthetho, wathunyelwa ezikhulwini lakubabusi bawo wonke amazwe, lakuzikhulu zabo bonke abantu, kuwo wonke amazwe ngokugwala kwawo lakubo bonke abantu ngolimi lwabo; wawulotshwe ebizweni lenkosi uAhasuweru, wafakwa uphawu ngendandatho yenkosi.
13Incwadi zathunyelwa ngezigijimi kuwo wonke amazwe enkosi kulomthetho wokuba kubhujiswe kubulawe kuphele bonke abaJuda, abatsha labadala labesifazana labantwana ngasuku lunye, ngosuku lwetshumi lantathu lwenyanga yetshumi lambili ethiwa nguAdari, lokuba kuphangwe impahla yabo.
14Lokho okulotshiweyo kakumenyezelwe kuwo wonke amazwe lakubo bonke abantu ukuze bahlale sebelungele lolosuku.
15Inkosi yalaya ukuba izigijimi zihambe masinyane, lomthetho wakhutshwa eSusa emzini omkhulu. Inkosi loHamani bahlala phansi banatha, kodwa umuzi waseSusa wakhathazeka.
Who We AreWhat We EelieveWhat We Do
2025 by iamachristian.org,Inc All rights reserved.
