Hubo 73 - Ndebele Bible (iBhayibhili Elingcwele) 1978

UGWALO LWESITHATHUUkuphela kwababi

1Impela uNkulunkulu ulungile kuIsrayeli,

kulabo abahlambulukileyo enhliziyweni.

2Kodwa mina inyawo zami zaphose zakhubeka,

lezinyathelo zami zaphose zatshelela.

3Ngoba ngaba lomona ngabazigqajayo

lapho ngibona ukuphumelela kwababi.

4Ngoba kabalabuhlungu,

imizimba yabo iphilile iqinile.

5Kabahlupheki njengabanye abantu,

kabahlutshwa njengabanye abantu.

6Ngakhoke bagqiza ukuzigqaja njengamangqongqo,

bambathe isihluku njengengubo.

7Ububi buyaphihlika emiphefumulweni yabo,

lenhliziyo zabo ziphuphuma ubuthutha.

8Bayakloloda bakhulume ngobubi,

bayazikhukhumeza benze amacebo okucindezela.

9Bakhuluma okubi ngaye osezulwini,

ngokuzigqaja balaya abantu.

10Ngakhoke abantu bayaphenduka babalandele,

bavume konke abakutshoyo;

11bathi: UNkulunkulu wazi kanjani na?

Kukhona ukwazi kuye oPhezukonke na?

12Khangela, labo yibo ababi,

bahlala bechelesile, yande inotho yabo.

13Impela ngihlambulule inhliziyo yami ngeze,

ngagezela izandla zami ize.

14Ngoba ngihlutshiwe usuku lonke,

ngatshaywa ekuseni.

15Uba bengithe ngizakukhuluma ngokunje,

ngabe ngibakhohlisile abantu bakho.

16Kwathi lapho ngizama ukuqedisisa lokhu,

kwaba lukhuni kakhulu kimi,

17ngaze ngangena endlini engcwele kaNkulunkulu;

ngakubonisisa ukuphela kwabo.

18Impela ubamisa endaweni ebutshelezi,

ubawisela ekubhujisweni.

19Yeka ukuchitheka kwabo masinyane!

Bakhukhulwa baqedwa yikwesaba.

20Banjengephupho ekuphaphameni komuntu,

okhohlwa umfanikiso walo ekuvukeni kwakhe.

21Lapho umphefumulo wami usubuhlungu,

lapho inhliziyo yami isidabukile,

22ngaba yisiphukuphuku esingaziyo,

ngaba njengenyamazana kuwe.

23Kodwake mina ngihlala lawe njalo;

ungibambile ngesandla sami sokunene.

24Uzakungihola ngeseluleko sakho,

emva kwalokho ungamukele ebukhosini.

25Ngilobani ezulwini ngaphandle kwakho na?

Kakukho engikufisayo emhlabeni ngaphandle kwakho.

26Inyama yami lenhliziyo yami kuyaphela,

kodwa uNkulunkulu ungamandla enhliziyo yami lesabelo sami kuze kube nininini.

27Ngoba labo abakhatshana lawe bazakubhubha;

uzakubachitha bonke abangathembekanga kuwe.

28Kodwa mina kungilungele ukuba seduze loNkulunkulu;

ngiyenzile iNkosi uNkulunkulu wami yaba yisiphephelo sami,

ukuze ngitshumayele zonke izenzo zakhe.