Isa 18 - Ndebele Bible (iBhayibhili Elingcwele) 1978

Ilizwi ngeEtiyopiya

1Kukhona ilizwe okuhatshaza kulo impiko,

elingaphetsheya kwemifula yaseEtiyopiya,

2elithuma izithunywa emfuleni iNile

ngemikolo yemihlanga!

Hambani, lina zithunywa ezilejubane,

liye ebantwini abade lababutshelezi,

abantu abesatshwa eduze lakhatshana,

liye esizweni esilamandla lesinqobayo,

esilelizwe elidatshulwe yimifula.

3Lina lonke elihlezi emhlabeni, lonke elakhileyo elizweni,

bonani lapho kuphakanyiswa uphawu ezintabeni,

lizwe lapho kutshaywa uphondo.

4Ngoba iNkosi yathi kimi:

Ngizakhangela phansi ngokuthula

ngisendaweni yami lapho ukutshisa kukhazimula ekukhanyeni kwelanga,

lalapho amazolo emanengi esikhathini sokuvuna.

5Ngoba kungakafiki ukuvuna,

lapho ukukhahlela sekuphelile,

lamaluba esesiba yisithelo esivuthiweyo,

kuzakuqunywa amahlumela ngezingqamu zokuthena,

kuqunywe lengatsha, zisuswe.

6Zonke zizatshiywa, zibe ngezamanqe asezintabeni lezenyamazana zeganga.

Amanqe azahlala phezu kwazo ehlobo,

lenyamazana zonke zomhlaba zihlale phezu kwazo ebusika.

7Ngalesosikathi kuzalethwa izipho eNkosini yamabandla,

zivela ebantwini abade lababutshelezi,

abantu abesatshwa eduze lakhatshana,

isizwe esilamandla lesinqobayo;

esilelizwe elidatshulwe yimifula,

zilethwe eZiyone, lapho ibizo leNkosi yamabandla lidunyiselwa khona.