Nani 28 - Ndebele Bible (iBhayibhili Elingcwele) 1978

Iminikelo enikelwa insuku ngensuku, lenikelwa izinyanga ngezinyanga; lenikelwa emikhosini

1INkosi yathi kuMose:

2Laya abakoIsrayeli uthi kubo: Qaphelani ukuba linikele kimi ngesikhathi esimisiweyo umnikelo wami, ukudla kwami kweminikelo eyenziwe ngomlilo, iphunga elimnandi kimi.

3Uthi kibo: Lo ngumnikelo owenziwe ngomlilo elizakuwunikela eNkosini; amawundlu amabili amaduna alomnyaka munye, angelasici, linikele ngawo insuku ngensuku.

4Elinye iwundlu lizanikela ngalo ekuseni, elinye linikele ngalo kusihlwa,

5kanye lengxenye yehefa lempuphu ecolekileyo ibe ngumnikelo wempuphu, ixubene lokwesine kwehini yamafutha okukhanywa.

6Lo ngumnikelo wokutshiswa wensuku ngensuku owamiswa entabeni yaseSinayi, ube liphunga elimnandi lomnikelo owenziwe ngomlilo eNkosini.

7Umnikelo wokuthululwa oqondene lomnikelo lo uzakuba ngokwesine kwehini ngewundlu linye; lizakuthululela iNkosi umnikelo wokuthululwa wewayini endaweni engcwele.

8Elinye iwundlu lizanikela ngalo kusihlwa; linikele njalo lomnikelo wempuphu lomnikelo wawo wokuthululwa njengasekuseni, kube ngumnikelo owenziwe ngomlilo olephunga elimnandi eNkosini.

9Ngosuku lweSabatha lizanikela ngamawundlu amabili amaduna, alomnyaka munye, angelasici, lengxenye yehefa lempuphu ecolekileyo kube ngumnikelo wempuphu, ixubene lamafutha, kanye lomnikelo wokuthululwa oqondene lawo;Mat 12:5

10lokhu kungumnikelo wokutshiswa wamaSabatha wonke owengezelelwe kuwo umnikelo wokutshiswa wensuku ngensuku lomnikelo wawo wokuthululwa.

11Ekuthwaseni kwenyanga lizanikela umnikelo wokutshiswa eNkosini, inkunzi ezimbili, lenqama eyodwa, lamawundlu amaduna ayisikhombisa alomnyaka munye, angelasici,

12lengxenye yehefa lempuphu ecolekileyo kube ngumnikelo wempuphu ixubene lamafutha, ngaleyo laleyonkunzi, kanye lokwetshumi okubili kwempuphu ecolekileyo kube ngumnikelo wempuphu, ixubene lamafutha ngenqama eyodwa,

13lokwetshumi kwempuphu ecolekileyo ixubene lamafutha kube ngumnikelo wempuphu ngalelo lalelowundlu; lokhu kuzakuba ngumnikelo wokutshiswa olephunga elimnandi, umnikelo owenzelwe iNkosi ngomlilo.

14Umnikelo wokuthululwa oqondene lalokho uzakuba yingxenye yehini lewayini ngenkunzi, lokwesithathu kwehini ngenqama, lokwesine kwehini ngewundlu. Lokhu kungumnikelo wokutshiswa wezinyanga zonke zomnyaka.

15Futhi lizanikela ngempongo eyodwa ibe ngumnikelo wesono eNkosini; izakwengezelelwa kuwo umnikelo wokutshiswa wensuku ngensuku lomnikelo wawo wokuthululwa.

16Usuku lwetshumi lane lwenyanga yokuqala luliPhasika leNkosi.Eks 12:1–13; Dute 16:1–2 Levi 23:5–44

17Ngosuku lwetshumi lanhlanu lwenyanga le kuzakuba khona umkhosi; kuzakudliwa isinkwa esingelamvubelo insuku eziyisikhombisa.Eks 12:14–20; 23:15; 34:18; Dute 16:3–8

18Ngosuku lokuqala kuzakuba khona inkonzo enkulu; lingenzi umsebenzi,

19kodwa nikelani ngomnikelo owenziwa ngomlilo, umnikelo wokutshiswa eNkosini, inkunzi ezimbili, lenqama eyodwa, lamawundlu amaduna ayisikhombisa alomnyaka munye, angelasici.

20Umnikelo oqondene lalokho owempuphu ecolekileyo ixubene lamafutha uzakuba yingxenye yehefa ngenkunzi, lengxenye yehefa ngenqama,

21lengxenye yehefa ngalelo lalelowundlu;

22linikele njalo lempongo eyodwa ibe ngumnikelo wesono, ukuze kwenzelwe lina indlela yokubuyisana.

23Lizanikela lokho kanye lomnikelo wokutshiswa wasekuseni, ongumnikelo wokutshiswa wensuku ngensuku.

24Ngalindlela lizanikela kuzo zonke insuku eziyisikhombisa ukudla komnikelo owenziwe ngomlilo, iphunga elimnandi eNkosini; kuzanikelwa kanye lomnikelo wokutshiswa wensuku ngensuku lomnikelo wawo wokuthululwa.

25Ngosuku lwesikhombisa lizakuba lenkonzo enkulu; lingenzi umsebenzi.

26Ngosuku lwezithelo zokuqala, lapho linikela ngomnikelo wamabele amatsha eNkosini emkhosini wenu wamaviki, lizakuba lenkonzo enkulu; lingenzi umsebenzi,Eks 23:16; 34:22; Dute 16:9–12

27kodwa linikele umnikelo wokutshiswa, iphunga elimnandi eNkosini, inkunzi ezimbili, lenqama eyodwa, lamawundlu amaduna ayisikhombisa alomnyaka munye.

28Umnikelo oqondene lalokho owempuphu ecolekileyo ixubene lamafutha uzakuba yingxenye yehefa ngenkunzi, lengxenye yehefa ngenqama,

29lengxenye yehefa ngalelo lalelowundlu;

30linikele njalo lempongo eyodwa, ukuze kwenzelwe lina indlela yokubuyisana.

31Qaphelani ukuba zingabi lasici. Kanye lomnikelo wokutshiswa wensuku ngensuku lomnikelo wawo wokuthululwa lizanikela ngazo kanye lomnikelo wokuthululwa oqondene lalokho.