1Ngakhoke lokhu sesilungisisiwe ngokukholwa, asibe lokuthula kuNkulunkulu ngeNkosi yethu uJesu Kristu.
2Ngaye singenisiwe kulumusa esimi kuwo; asithokozeni ngethemba lethu lokuthi sizakuhlanganyela inkazimulo kaNkulunkulu.
3Kakusikho lokhu kuphela; futhi asithokoze langenhlupheko zethu sazi ukuthi ukuhlupheka kuveza ukuphikelela,
4ukuphikelela kuveza ukuqina, lokuqina kuveza ithemba.
5Ithemba kalidanisi, ngoba uthando lukaNkulunkulu lutheliwe enhliziyweni zethu ngoMoya oNgcwele esimuphiweyo.
6Ngoba sisebuthakathaka, ngesikhathi esifaneleyo uKristu wafela ababi.
7Ngoba kunzima ukuba umuntu afele olungileyo, kodwa mhlawumbe kungaba khona olesibindi sokufela omuhle.
8Kodwa uNkulunkulu uqinisa uthando lwakhe kithi ngalokhu ukuthi uKristu wasifela siseyizoni.
9Ngakho kakhuluke, lokhu sesilungisisiwe ngegazi lakhe, sizakusiliswa ngaye olakeni lukaNkulunkulu.
10Ngoba uba, lapho siseyizitha, sazuza ukubuyisana loNkulunkulu ngokufa kweNdodana yakhe, ikakhulu, lokhu sesizuze ukubuyisana, sizakusiliswa ngokuphila kwayo.
11Kakusikho lokhu kuphela, kodwa sizincoma futhi ngoNkulunkulu ngeNkosi yethu uJesu Kristu, esesamukelisiwe ngaye ukubuyisana.
Ukufa kwafika ngoAdamu; ukuphila kwafika ngoJesu12Ngakhoke, njengalokhu isono sangena emhlabeni ngamuntu munye, langesono kwangena ukufa, ngokunjalo ukufa kwabehlela abantu bonke, ngoba bonke bonile.Gen 3:6
13Isono sasikhona emhlabeni kungakabi khona umlayo, kodwa isono kasibalelwa ungekho umlayo.
14Kanti ukufa kwabusa kusukela kuAdamu kwaze kwafika kuMose, laphezu kwalabo ababengonanga ngendlela yokweqa kukaAdamu, ongumfanekiso wakhe obezakuza.
15Kodwa isiphiwo somusa kasinjengesiphambeko. Ngoba uba ngesiphambeko samuntu munye, abanengi bafa, ikakhulu kwanda kwabanengi umusa kaNkulunkulu lesiphiwo esivela ngomusa wamuntu munye, uJesu Kristu.
16Futhi isiphiwo somusa kasinjengokwavezwa yikona kwalowomuntu owonayo. Ngoba ukuthonisiswa okwaba ngesiphambeko samuntu munye kwaletha ukulahlwa, kodwa isiphiwo somusa esaba ngeziphambeko ezinengi saletha ukulungisiswa.
17Ngoba uba ngesiphambeko samuntu munye ukufa kwabusa ngalowo emunye, ikakhulu bona, abamukela ubunengi bomusa lobunengi besiphiwo sakhe sokulunga, bazakubusa ekuphileni ngalowo emunye, uJesu Kristu.
18Ngakhoke, njengoba isiphambeko sinye salethela abantu bonke ukulahlwa, ngokunjalo isenzo sinye sokulunga silethela abantu bonke ukulungisiswa lokuphila.
19Ngoba njengoba ngokungalaleli komuntu munye abanengi benziwa izoni, ngokunjalo ngokulalela komuntu munye abanengi bazakwenziwa abalungileyo.
20Umlayo waba khona ukuba isiphambeko sande; kodwa lapho kwanda isono khona, umusa wanda kakhulukazi,
21ukuze, njengoba isono sabusa ngokufa, ngokunjalo umusa ubuse ngokulunga, kube khona ukuphila okungapheliyo ngoJesu Kristu iNkosi yethu.
Who We AreWhat We EelieveWhat We Do
2025 by iamachristian.org,Inc All rights reserved.
