Hubo 147 - Ndebele Bible (iBhayibhili Elingcwele) 1978

Ukudumisa uNkulunkulu, uSomandla

1Dumisani iNkosi!

Ngoba kuhle ukudumisa uNkulunkulu wethu,

kuhle ukumdumisa, njalo kufanele.

2INkosi iyalakha iJerusalema,

iqoqe bonke abahlakazekileyo bakoIsrayeli.

3Ipholisa inhliziyo ezidabukileyo,

ibophe amanxeba azo.

4Iyabala inani lezinkanyezi,

izibize zonke ngamabizo azo.

5INkosi yethu yinkulu, makhulu amandla ayo;

ukwazi kwayo kakulakulinganiswa.

6INkosi iyabalulamisa abacindezelweyo,

iyawisela phansi ababi.

7Hlabelelani iNkosi ingoma yokubonga;

limdumise uNkulunkulu wethu ngamachacho.

8Iyasibekela amazulu ngamayezi,

ilungisele umhlaba izulu,

ikhulise utshani emaqaqeni,

9inike inyamazana ukudla kwazo,

lamatsiyane ewabayi akhalayo.

10Kayithokozi ngamandla ebhiza,

kayijabuleli amandla amaqhawe.

11Kodwa iNkosi ijabulela labo abayesabayo,

labo abathemba uthando lwayo olungapheliyo.

12Dumisa iNkosi, Jerusalema.

Dumisa uNkulunkulu wakho, Ziyone.

13Ngoba iyaqinisa imigoqo yamasango akho;

ibusise amadodana akho phakathi kwakho.

14Iyenza ukuthula emikhawulweni yakho;

ikusuthise ngamabele amahle.

15Iyathumela umthetho wayo emhlabeni;

ilizwi layo ligijima ngesiqubu.

16Ikhithiza ungqoqwane abe njengoboya bezimvu;

ivuvuzele iliqhwa libe njengomlotha.

17Iyaphosa isiqhotho sayo njengezigaqa;

ngubani ongema emqandweni wayo na?

18Iyathumela ilizwi layo, isiqhotho sincibilike;

ivunguzise umoya wayo, amanzi ageleze.

19Iyatshengisa ilizwi layo kuJakobe,

lezimiso lezahlulelo zayo kuIsrayeli.

20Kayenzanga njalo lakwesisodwa esinye isizwe;

kazizazi izahlulelo zayo.

Dumisani iNkosi!