1 Kor 6 - Ndebele Bible (iBhayibhili Elingcwele) 1978

Ukukhuzwa kwabaseKorinte abamangalelanayo

1Kukhona yini umuntu wakini othi elecala lomzalwane, abe lesibindi sokuyamangala kwabangalunganga, kungabi kibo abangcwele na?

2Kalazi yini ukuthi abangcwele bazakuthonisisa umhlaba na? Uba umhlaba uzakuthonisiswa yini, kalifanele ukuthonisa amacala amancinyane na?

3Kalazi yini ukuthi thina sizakuthonisisa izithunywa na? Pho, kungalahlula kanjani ukuthonisa izindaba zalokhukusila na?

4Ngakhoke uba lilamacala anje, liwaselani kulabo abadelelwa libandla na?

5Ngitsho lokhu ukuba libe lenhloni. Kunjalo yini ukuthi kakukho loyedwa phakathi kwenu ohlakaniphileyo ongaquma amacala abazalwane?

6Kufanele yini ukuba umzalwane amangalele umzalwane, lalokho phambi kwabangakholwayo na?

7Lempela ukumangalelana khona kuyikwahluleka kwenu. Kungani lingavumi ukoniwa na? Kungani lingavumi ukuqilibezelwa na?

8Kodwa lina uqobo liyona, liqilibezele; likwenza lokhu lakubazalwane benu.

9Kalazi yini ukuba abangalunganga kabayikulidla ilifa lombuso kaNkulunkulu na? Lingakhohliswa; iziphingi, labakhonza izithombe, lezifebe, labesilisa abalalanayo,

10lamasela, lezihwaba, lezidakwa, lezithuki, labaphangi, kabayikulidla ilifa lombuso kaNkulunkulu.

11Babenjalo abanye benu; kodwa selageziswa, lahlukaniselwa kuNkulunkulu, lalungisiswa ngebizo leNkosi uJesu Kristu langoMoya kaNkulunkulu wethu.

Umzimba wethu ulithempeli likaNkulunkulu

12Zonke izinto zivumelekile kimi, kodwa zonke izinto kazisizi. Zonke izinto zivumelekile kimi, kodwa mina kangilakubuswa lutho.1 Kor 10:23

13Ukudla ngokwesisu, lesisu ngesokudla; kodwa uNkulunkulu uzakukuchitha kokubili. Umzimba kayisiwo wokuphinga, ungoweNkosi, leNkosi ingeyomzimba.

14UNkulunkulu owavusa iNkosi, uzakusivusa lathi ngamandla akhe.

15Kalazi yini ukuthi imizimba yenu iyizitho zikaKristu na? Pho, ngizakuthatha izitho zikaKristu, ngizenze izitho zesiphingi na? Phinde!

16Kalazi yini ukuthi ozihlanganisa lesiphingi ungumzimba munye laso na? Ngoba kulotshiwe ukuthi: Labo ababili bazakuba nyamanye.Gen 2:24

17Kodwa ohlangene leNkosi ungumoya munye layo.

18Balekelani ukuphinga. Zonke izono ezinye azenzayo umuntu zingaphandle komzimba; kodwa ophingayo wona umzimba wakhe.

19Kalazi yini ukuthi umzimba wenu ulithempeli likaMoya oNgcwele ohlezi kini, elimamukele kuNkulunkulu na? Kalisibo abenu,1 Kor 3:16; 2 Kor 6:16

20kodwa lathengwa ngentengo. Ngakhoke dumisani uNkulunkulu emizimbeni yenu.