Jer 20 - Ndebele Bible (iBhayibhili Elingcwele) 1978

UPashuri uyaqalekiswa

1Kwathi uPashuri umpristi, indodana kaImeri, owayeyinduna enkulu ethempelini, wamuzwa uJeremiya etshumayela lezizinto.

2UPashuri wamtshaya uJeremiya umprofethi, wamfaka esitokisini esiseSangweni lakoBenjamini elingaphezulu, ekungeneni kwethempeli.

3Kwathi kusasa, lapho uPashuri esemkhuphe esitokisini uJeremiya, uJeremiya wathi kuye: INkosi kayisakubizi ngokuthi unguPashuri, kodwa ngokuthi uyiKwesabeka okunxa zonke.

4Ngoba iNkosi ithi: Ngizakukwenza ukuba ube yinto eyesabekayo kuwe uqobo lakubo bonke abangane bakho. Bazabulawa ngomkhonto wezitha zabo, ukhona wena ukhangele. Ngizanikela bonke abakoJuda esandleni senkosi yaseBabiloni, ibathumbe, ibase eBabiloni, ibabulale.

5Futhi ngizanikela yonke imfuyo yalumuzi, layo yonke inzuzo yawo, lakho konke okwawo okuligugu, kanye lenotho yonke yamakhosi akoJuda, ezandleni zezitha zabo ezizakubaphanga, zibathumbe zibase eBabiloni.

6Wenake Pashuri, labo bonke abahlala endlini yakho, lizakuthunjwa, liye eBabiloni; lizakufela khona, lingcwatshelwe khona, wena labangane bakho bonke, otshumayele kibo amanga.

Ukusola kukaJeremiya

7Nkosi, wangiyenga, ngayengeka.

Ulamandla kulami, ungahlulile,

sengiyinhlekisa insuku zonke, bonke bayangihleka.

8Ngoba lapho ngikhuluma, ngiyakhala,

ngimemeze ngithi: Okubi lokuchitheka!

Ilizwi leNkosi selingilethele ihlazo lokuhlekwa usuku lonke.

9Uba ngisithi: Kangisayikuyiphatha, kangisayikukhuluma ngebizo layo;

kuba khona enhliziyweni yami lokho okungathi ngumlilo ovuthayo,

ovalelwe emathanjeni ami;

sengikhathele ukubekezela, sengehlulekile.

10Ngiyezwa abanengi benyeyeza besithi:

Kukhona ukwesabeka inxa zonke!

Bathi: Mmangalele! Asimmangaleleni!

kutsho bonke abangane bami engibejwayeleyo,

beqaphele ukuwa kwami.

Bathi: Mhlawumbe angakhohliseka;

ng’khona sizakumahlula, siphindisele kuye.

11Kodwa iNkosi ilami njengeqhawe elesabekayo;

ngakhoke abangizingelayo bazakhubeka, kabayikungahlula;

bazayangeka kakhulu, ngoba kabayikuphumelela.

Lehlazo labo elingelakuphela kaliyikukhohlakala.

12Wena Nkosi yamabandla, ohlolayo olungileyo,

obona inhliziyo lengqondo,

ake ngibone ukuphindisela kwakho kibo,

ngoba kuwe nginikele indaba yami.

13Hlabelani eNkosini, liyidumise.

Ngoba ikhulule oswelayo ezandleni zababi.

14Kaluthukwe usuku engazalwa ngalo.

Usuku umama angizala ngalo kalungabusiswa.

15Kathukwe lowomuntu owatshela ubaba ukuthi:

Uzalelwe umfana; wamenza wathokoza.

16Lowomuntu kabe njengemizi iNkosi eyayichitha ingelasihawu;

kezwe ukukhala ekuseni, lomkhosi wempi emini,

17ngoba engangibulalelanga esiswini,

lomama waba liliba lami,

wakhulelwa kokuphela.

18Ngaphumelani esiswini ukuba ngibone uhlupho losizi,

ngiqede insuku zami ngisehlazweni?