1 Sam 22 - Ndebele Bible (iBhayibhili Elingcwele) 1978

1UDavida wasesuka lapho, wabalekela obhalwini lwaseAdulamu. Lapho abafowabo labo bonke abendlu kayise bekuzwa lokho, baya kuye.

2Kwabuthana kuye bonke ababelosizi, labo bonke ababelezikwelede, lababelensolo, waba yinduna yabo. Abantu ababelaye babengamakhulu amane.

3UDavida wasuka lapho waya eMizipa kwelaseMowabi; wathi enkosini yaseMowabi: Ngiyacela ukuba ubaba lomama bake bazehlala kini, ngize ngazi ukuthi uNkulunkulu uzangenzelani.

4Wabatshiya abazali bakhe enkosini yaseMowabi, bahlala layo sonke isikhathi uDavida esobhalwini.

5Umprofethi uGadi wasesithi kuDavida: Musa ukuhlala obhalwini; suka uye elizweni lakoJuda. UDavida wasesuka esiya eguswini laseHerethi.

USawuli ubulala abapristi baseNobi

6USawuli wezwa ukuthi uDavida uboniwe labantu ababelaye; uSawuli wayeseGibeya ehlezi ngaphansi kwesihlahla setamarisiki edundulwini, ephethe umkhonto wakhe, lenceku zakhe zimi zimphahlile.

7USawuli wathi encekwini zakhe ezazimi zimphahlile: Zwanini, lina bakoBenjamini, lithi indodana kaJese izalinika lonke amasimu lezivini, ilibeke libe yizinduna zezinkulungwane lezinduna zamakhulu na?

8Kungenxa yalokho yini lingenzele amacebo amabi na? Kakho ongitshelayo lapho indodana yami isenza isivumelwano lendodana kaJese; kakho loyedwa kini ongizwela usizi, longitshelayo lapho indodana yami ingivusela inceku yami ukuba ingicathamele njengalamuhla nje.

9Kwasekuphendula uDowegi waseEdoma owayemi lenceku zikaSawuli, wathi: Ngayibona indodana kaJese ifika eNobi kuAhimeleki indodana kaAhitubi.

10Wambuzela eNkosini uNkulunkulu; wamnika ukudla lomhedla kaGoliyathi umFilistiya.

11Inkosi uSawuli yasithumela ilizwi ukuba kubizwe uAhimeleki umpristi, indodana kaAhitubi, layo yonke indlu kayise, abapristi ababeseNobi; bonke beza enkosini.1 Sam 18:7; 29:5

12USawuli wathi: Lalela lapha, ndodana kaAhitubi. Yena waphendula wathi: Ngikhona, nkosi.

13USawuli wasesithi kuye: Kungani lingenzela amacebo amabi, wena lendodana kaJese, ngokuyinika isinkwa lomhedla, wayibuzela kuNkulunkulu na? Khathesi ingivukele ingicathamele.

14UAhimeleki waseyiphendula inkosi esithi: Ngubani kuzo zonke inceku zakho othembekileyo njengoDavida, ongumkhwenyana wenkosi lenduna yabalindi bakho, lohloniphekayo endlini yakho na?

15Ngiyaqalisa lamuhla yini ukumbuzela kuNkulunkulu na? Atshi bo! Inkosi kayingayibeki icala inceku yayo layo yonke indlu kababa; ngoba inceku yakho kayazi lutho loluncinyane ngalokhu.

16Inkosi yasisithi: Ahimeleki, uzakufa impela, wena layo yonke indlu kayihlo.

17Inkosi yathi kubalindi ababemi eduze layo: Sondelani, libulale abapristi beNkosi; ngoba bahlangene loDavida, futhi babesazi ukuthi ubalekile kodwa kabangitshelanga. Kodwa inceku zenkosi kazithandanga ukuphakamisa izandla zazo zibulale abapristi beNkosi uNkulunkulu.

18Inkosi yasisithi kuDowegi: Sondela wena, ubabulale abapristi. UDowegi waseEdoma wasondela, wabasukela abapristi, wabulala ngalolosuku abantu abangamatshumi aficaminwembili lanhlanu ababegqoke ingubo zamahlombe.

19INobi, umuzi wabapristi, wawuchitha ngomkhonto, wabulala amadoda labesifazana, abantwana labamunyayo, inkomo labobabhemi lezimvu.

20Kodwa omunye wamadodana kaAhimeleki indodana kaAhitubi, othiwa nguAbiyatha wabaleka, walandela uDavida.

21UAbiyatha watshela uDavida ukuthi uSawuli ubulele abapristi beNkosi.

22UDavida wathi kuAbiyatha: Ngabona ngalolosuku mhla uDowegi waseEdoma elapho ukuthi uzamtshela impela uSawuli. Yimi engibangele ukuba bafe bonke abendlu kayihlo.

23Hlala lami lapha, ungesabi, ngoba lowo ofuna ukuphila kwami ufuna ukuphila kwakho; nxa ulami uzalondolozeka.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help