Hlu 10 - Ndebele Bible (iBhayibhili Elingcwele) 1978

UTola loJayiri

1Emva kukaAbimeleki kwavela uTola indodana kaPuwa kaDodo, owakoIsakari, ukukhulula uIsrayeli. Wayehlala eShamiri ezintabeni zakoEfrayimi.

2Waba ngumahluleli koIsrayeli iminyaka engamatshumi amabili lantathu. Wafa, wangcwatshelwa eShamiri.

3Ngemva kwakhe kwavela uJayiri owaseGileyadi, waba ngumahluleli koIsrayeli iminyaka engamatshumi amabili lambili.

4Wayelamadodana angamatshumi amathathu agada obabhemi abangamatshumi amathathu, belemizi engamatshumi amathathu ethiwa yiHavothi‐Jayiri kuze kube lamhla, eselizweni laseGileyadi.

5UJayiri wafa, wangcwatshelwa eKamoni.

AmaAmoni ahlupha abakoIsrayeli

6AbakoIsrayeli babuya benza okubi phambi kweNkosi, bakhonza oBali laboAshera, onkulunkulu baseSiriya laseSidoni laseMowabi labamaAmoni labamaFilistiya; bayitshiya iNkosi, kabaze bayikhonza.

7INkosi yamthukuthelela uIsrayeli, yamnikela ezandleni zamaFilistiya lamaAmoni

8abahlupha abacindezela bonke abakoIsrayeli ababengaphetsheya kweJordani elizweni lamaAmori eliseGileyadi iminyaka elitshumi leficaminwembili.

9AmaAmoni achapha iJordani ukuba alwe labakoJuda labakoBenjamini labakoEfrayimi; uIsrayeli wahlupheka kakhulu.

10AbakoIsrayeli bakhala eNkosini bathi: Sonile kuwe, ngoba sikutshiyile, Nkulunkulu wethu, sakhonza oBali.

11INkosi yathi kibo: Kangilikhululanga yini kwabaseGibithe lakumaAmori lakumaAmoni lakumaFilistiya na?

12Lalapho amaSidoni lawo lamaAmaleki lamaMidiyani elicindezela, lakhala kimi, ngalikhulula ezandleni zawo.

13Kantike lingitshiyile lakhonza abanye onkulunkulu; ngalokhoke kangisayikulikhulula futhi.

14Hambani liyekhala kulabonkulunkulu elibakhethileyo, balikhulule bona ngesikhathi sokuhlupheka kwenu.

15AbakoIsrayeli bathi eNkosini: Sonile; yenza kithi lokho okubona kulungile kuwe; ake usikhulule lamhla kodwa.

16Basebekhupha onkulunkulu bezizweni phakathi kwabo, bakhonza iNkosi eyayingebe isakumela ukuhlupheka kukaIsrayeli.

17AmaAmoni ahloma, amisa eGileyadi, labakoIsrayeli babuthana bamisa eMizipa.

18Abantu lezikhulu zaseGileyadi bakhulumisana besithi: Ngubani ozaqala ukulwa lamaAmoni na? Uzakuba yinduna yabo bonke abaseGileyadi.