Jobe 27 - Ndebele Bible (iBhayibhili Elingcwele) 1978

UJobe uthi kalacala

1UJobe wabuya waqhubeka ngokukhuluma kwakhe esithi:

2Ngifunga uNkulunkulu osusileyo ilungelo lami,

loSomandla owenza umoya wami waba buhlungu,

3nxa kusekhona umphefumulo kimi,

lomoya kaNkulunkulu usesemakhaleni ami,

4umlomo wami kawuyikukhuluma amanga,

lolimi lwami lukhulume inkohliso.

5Kakube khatshana lami ukuba ngilivumele;

kangiyikudela ubuqotho bami ngize ngife.

6Ngiyabambelela ekulungeni kwami ngingakuyekeli;

inhliziyo yami kayingisoli langolulodwa lwensuku zami.

7Isitha sami kasibe njengomubi,

longivukelayo abe njengongalunganga.

8Ngoba liyini ithemba longamesabiyo uNkulunkulu nxa uNkulunkulu esemqumile,

esesusile ukuphila kwakhe na?

9UNkulunkulu uzakuzwa ukukhala kwakhe yini nxa esehlelwa yikuhlupheka na?

10Uzathokoza ngoSomandla na?

Uzakhuleka kuye izikhathi zonke na?

11Ngizalifundisa mayelana lesandla sikaNkulunkulu,

okukaNkulunkulu kangiyikukufihla kini.

12Lina lonke likubonile.

Phoke, likhulumelani okuyize na?

Amanye amazwi kaZofari

13Nansi isabelo somuntu omubi kuNkulunkulu,

lelifa abacindezeli abalamukela kuSomandla;

14uba abantwana bakhe besanda, bandela umkhonto,

lenzalo yakhe kayilakho ukudla okwaneleyo.

15Abasalayo baqedwa yikufa,

labafelwakazi babo kababalileli.

16Loba ebuthelela isiliva njengothuli,

ebuthelela izigqoko ezinengi,

17angazibuthelela, kodwa zizagqokwa ngolungileyo,

labangelasici babelane isiliva.

18Indlu ayakhayo injengendlu yobulembu,

njengedumba elakhiwa ngumlindi.

19Ngolunye usuku uyalala enothile,

kodwa kayikuphinda futhi;

uyaphaphama, inotho yakhe yonke iphelile.

20Uvalo luyamehlela njengempophoma,

lesivunguzane simphephule ebusuku.

21Umoya wasempumalanga uyamthatha ahambe,

uyamphephula endaweni yakhe.

22Uyamtshaya ungamyekeli

aze azame ngamandla wonke ukubaleka.

23Abantu bazamtshayela izandla,

bamncifele endaweni zonke.