1UZedekiya indodana kaJosiya waba yinkosi esikhundleni sikaKoniya indodana kaJehoyakimi, wabekwa nguNebukadineza inkosi yaseBabiloni ukuba abuse elizweni lakoJuda.2 Kho 24:17; 2 Lan 36:10
2Kodwa yena lenceku zakhe labantu belizwe kabawalalelanga amazwi eNkosi eyayiwakhulume ngoJeremiya umprofethi.
3Inkosi uZedekiya yathuma uJehukali indodana kaShelemiya loZefaniya umpristi indodana kaMahaseya kuJeremiya umprofethi, yathi: Ake usikhulekele eNkosini uNkulunkulu wethu.
4UJeremiya wayesahamba phakathi kwabantu engakafakwa entolongweni.
5Impi kaFaro yayisiphumile eGibithe; kwathi lapho amaKaladiya ayevimbezela iJerusalema ekuzwa lokho, asuka eJerusalema.
6Ilizwi leNkosi lafika kuJeremiya umprofethi lathi:
7INkosi, uNkulunkulu kaIsrayeli, ithi: Lizakuthi enkosini yakoJuda elithume ukubuza kimi: Khangela, impi kaFaro eze ukulisiza isizakubuyela eGibithe, elizweni layo.
8AmaKaladiya azabuya, awuhlasele lumuzi, awuthumbe, awutshise ngomlilo.
9INkosi ithi: Lingazikhohlisi ngokuthi: AmaKaladiya kawasayikubuya kithi. Ngoba azakubuya isibili.
10Loba liyahlula impi yonke yamaKaladiya alwayo lani, kusale nje abantu abalimeleyo, bazasukuma bonke baphume emathenteni abo, bawutshise lumuzi ngomlilo.
11Kwathi lapho impi yamaKaladiya isisukile eJerusalema isizwile ukuthi impi kaFaro iyeza,
12uJeremiya wasephuma eJerusalema ukuya elizweni lakoBenjamini ukuba amukele isabelo sakhe selifa khona phakathi kwabantu.
13Kwathi lapho eseSangweni lakoBenjamini, induna yabalindi ethiwa nguIrija indodana kaShelemiya, kaHananiya, wambamba uJeremiya umprofethi, wathi: Uyabalekela kumaKeladiya.
14UJeremiya wathi: Kungamanga; kangibalekeli kumaKaladiya. Kodwa uIrija kazamlalela; wambamba uJeremiya, wamletha ezikhulwini.
15Izikhulu zathukuthela ngoJeremiya, zamtshaya, zamfaka entolongweni, endlini kaJonathani umbhali, ngoba zaziyenze yaba yintolongo.
16UJeremiya wafakwa endlini engumgodi, wahlala khona insuku ezinengi.
17Inkosi uZedekiya yambiza, yamamukela. Yambuza ensitha endlini yayo yathi: Kambe likhona ilizwi elivela eNkosini na? UJeremiya wathi: Likhona. Uzakunikelwa esandleni senkosi yaseBabiloni.
18UJeremiya wathi futhi kuZedekiya inkosi: Ngoneni kuwe lasezincekwini zakho lakulababantu ukuba lingifake entolongweni na?
19Bangaphi abaprofethi benu abatshumayela kini besithi: Inkosi yaseBabiloni kayiyikufika ukulihlasela lina lalelilizwe?
20Zwanake, ngiyakuncenga wena nkosi, ake ulalele isikhalazo sami, ungangibuyiseli endlini kaJonathani umbhali, funa ngifele khona.
21Ngakho inkosi uZedekiya waselaya ukuba bamfake uJeremiya egumeni labalindi, lokuba anikwe isinkwa sibe sinye insuku zonke esivela kubapheki bezinkwa, kwaze kwaphela zonke izinkwa emzini. Ngakho uJeremiya wahlala egumeni labalindi.
Who We AreWhat We EelieveWhat We Do
2025 by iamachristian.org,Inc All rights reserved.
