Levi 17 - Ndebele Bible (iBhayibhili Elingcwele) 1978

Imithetho yokuhlaba

1INkosi yathi kuMose:

2Tshono kuAroni lamadodana akhe, labantu bonke bakoIsrayeli, uthi: Nanku iNkosi elaye ngakho isithi:

3Uba umuntu wendlu kaIsrayeli ehlaba inkabi loba imvu loba imbuzi ezihonqweni, ingabe ngaphandle kwezihonqo,

4angayilethanga emnyango wethente lokuhlangana ukuba anikele ngayo eNkosini ngaphambi kweTabernakeli leNkosi, uzakuba lecala legazi, ngoba echithile igazi; uzakukhutshwa ebantwini bakibo.

5Ngalokho abantu bakoIsrayeli bafanele ukuletha eNkosini imihlatshelo abayihlaba egangeni, bayilethe kumpristi ngasemnyango wethente lokuhlangana, banikele ngayo ibe yiminikelo yokuthula eNkosini.

6Umpristi uzakhaphazela igazi ealtareni leNkosi ngasemnyango wethente lokuhlangana, atshise amahwahwa, abe liphunga elimnandi eNkosini.

7Ngakhoke kabasayikuhlabela omoya ababi imihlatshelo yabo, ababesiya kubo ukuphinga sebengidela. Lokhu kuzakuba yisimiso esingelakuphela kubo ezizukulwaneni zabo.

8Tshono kubo uthi: Yilowo lalowomuntu wendlu kaIsrayeli, loba owemzini ohlala phakathi kwabo, onikela umnikelo wokutshiswa loba umhlatshelo,

9angawulethi emnyango wethente lokuhlangana ukuba awunikele eNkosini, uzakukhutshwa ebantwini bakibo.

Igazi kalilakudliwa

10Uba umuntu wendlu kaIsrayeli, loba owemzini ohlala phakathi kwabo, esidla igazi, ngizakumelana laye olidlayo, ngimkhuphe ebantwini bakibo.Gen 9:4; Levi 7:26–27; 19:26; Dute 12:16, 23; 15:23

11Ngoba ukuphila komzimba kusegazini; ngilinike lona ealtareni ukwenzela lina indlela yokubuyisana; ngoba kuligazi eliyikuphila elenza indlela yokubuyisana.Heb 9:22

12Ngakhoke ngathi ebantwini bakoIsrayeli: Kakungabi khona phakathi kwenu odla igazi; lowemzini ohlala phakathi kwenu kangadli igazi.

13Uba omunye wabantu bakoIsrayeli, loba owemzini ohlala phakathi kwabo, ezingela abambe inyamazana ingabe inyoni edliwayo, kachithe igazi layo, aligqibele ngomhlabathi.

14Ngoba ukuphila kwezidalwa zonke kusegazini lazo; yikho ngathi ebantwini bakoIsrayeli: Lingadli gazi lezidalwa, ngoba ukuphila kwazo kuligazi; olidlayo uzakuxotshwa.

15Futhi wonke umuntu, loba engowokuzalwa elizweni loba engowemzini, odla lokho okuzifeleyo loba lokho okubanjwe yizilo, kagezise ingubo zakhe, ageze ngamanzi, ahlale engcolile kuze kuhlwe; emva kwalokho uzakuhlambuluka.

16Kodwa uba engazigezisi, engagezi lomzimba wakhe, uzathwala ububi bakhe.