Eks 9 - Ndebele Bible (iBhayibhili Elingcwele) 1978

Inhlupheko yesihlanu: Isifo sezifuyo

1INkosi yasisithi kuMose: Yana kuFaro uthi kuye: INkosi, uNkulunkulu wamaHeberu, ithi: Vumela abantu bami ukuba bahambe ukuyangikhonza.

2Ngoba uba usala ukuba bahambe, ulokhu usababambile,

3isandla seNkosi sizakwehlela laphezu kwemfuyo yakho esegangeni, laphezu kwamabhiza labobabhemi, lamakamela, lenkomo lezimvu, siletha isifo esinzima kakhulu.

4Kodwa iNkosi izakwenza umahluko phakathi kwenkomo zabakoIsrayeli lezamaGibithe; kakuyikufa lutho kukho konke okwabakoIsrayeli.

5INkosi yamisa isikhathi esithile, yathi: Kusasa iNkosi izakwenza lokhu elizweni.

6INkosi yakwenzake lokho kusasa kwakhona; zonke izifuyo zamaGibithe zafa; kodwa kakufanga lesisodwa ezifuyweni zabakoIsrayeli.

7UFaro wabuza, watshelwa ukuba kakufanga lesisodwa ezifuyweni zabakoIsrayeli. Kodwa inhliziyo kaFaro yajinga iba lukhuni, kazabavumela abantu ukuba bahambe.

Inhlupheko yesithupha: Amathumba

8INkosi yasisithi kuboMose loAroni: Caphunani umlotha weziko, uMose awuphosele phezulu phambi kukaFaro.

9Uzakuba luthuli phezu kwelizwe lonke laseGibithe, uphenduke ube ngamathumba azaphihlika abe yizilonda ebantwini lasezinkomeni kulo lonke ilizwe laseGibithe.

10Basebewuthatha umlotha weziko, bema phambi kukaFaro; uMose wawuphosela phezulu, waba ngamathumba aphihlika aba yizilonda ebantwini lasezinkomeni.Isam 16:2

11Izangoma zahluleka ukuma phambi kukaMose ngenxa yamathumba; ngoba amathumba amila izangoma lawo wonke amaGibithe.

12Kodwa iNkosi yayenza yaba lukhuni inhliziyo kaFaro, kazabalalela, njengokutsho kweNkosi.

Inhlupheko yesikhombisa: Isiqhotho

13INkosi yasisithi kuMose: Vuka ekuseni, ume phambi kukaFaro uthi kuye: INkosi uNkulunkulu wamaHeberu ithi: Vumela abantu bami ukuba bahambe bayengikhonza.

14Ngoba khathesi ngizakuthuma zonke inhlupheko zami kuwe lasencekwini zakho lasebantwini bakho, ukuba wazi ukuthi kakho onjengami kuwo wonke umhlaba.

15Uba bengiselule isandla sami ukukutshaya labantu bakho ngesifo, ubuzakuchitheka emhlabeni.

16Kodwa ngikusilisile ukuba ngikutshengise amandla ami lokuba ibizo lami litshunyayelwe emhlabeni wonke.Roma 9:17

17Usazikhukhumeza phambi kwabantu bami, ungabavumeli ukuba bahambe na?

18Kusasa ngalesisikhathi ngizakunisa isiqhotho esikhulu, esingazanga sibonwe eGibithe selokhu lamiswayo kuze kube khathesi.

19Ngakhoke hamba masinyane, ubuthele esibayeni zonke inkomo zakho lemfuyo yakho yonke esegangeni, ngoba bonke abantu lazo zonke inkomo okufunyanwa egangeni kungabuthwanga kuzakutshaywa yisiqhotho, kufe.

20Ngakho yileyo laleyonceku kaFaro elesabayo ilizwi leNkosi yangenisa ngokuphangisa izisebenzi zayo lenkomo zayo ezindlini;

21kodwa yileyo laleyo engananzanga ilizwi leNkosi yayekela izisebenzi zayo lenkomo zayo egangeni.

22INkosi yasisithi kuMose: Phakamisela isandla sakho phezulu ukuba kune isiqhotho kulo lonke ilizwe laseGibithe, sehlele ebantwini lasezinkomeni lasemibhideni yonke yeganga kulo lonke ilizwe laseGibithe.

23UMose waphakamisela intonga yakhe phezulu; iNkosi yathumela ukuduma lesiqhotho; lombane wehlela emhlabeni; iNkosi yanisa isiqhotho elizweni laseGibithe.

24Ngakhoke kwaba khona isiqhotho, lombane ubaneka njalonjalo phakathi kwesiqhotho; kwakuyisiqhotho esingazanga sibe khona elizweni laseGibithe selokhu laba yisizwe.Isam 8:7; 16:21

25Isiqhotho satshaya konke okusegangeni kulo lonke ilizwe laseGibithe, abantu lezinkomo; satshaya yonke imibhida yeganga, sephula zonke izihlahla zeganga.

26Kuselizweni laseGosheni kuphela lapho ababekhona abakoIsrayeli okwakungekho isiqhotho.

27UFaro wasethumela ilizwi ebiza oMose loAroni, wathi kubo: Khathesi ngonile; iNkosi ilungile, mina labantu bami sibabi.

28Incengeni iNkosi, ngoba kwanele ukuduma lokhu lesiqhotho lesi; ngizakuliyekela lihambe, lingabe lisahlala.

29UMose wathi kuye: Nxa sengiphumile phakathi komuzi, ngizaphakamisela izandla zami eNkosini; kuzakuphela ukuduma lesiqhotho, ukuba wazi ukuthi umhlaba ungoweNkosi.

30Kodwa wena lenceku zakho, ngiyazi ukuthi kalikayesabi iNkosi uNkulunkulu.

31— Kwatshaywa isikusha lebhali; ibhali yayisikhahlele, lesikusha sasesivuthwa.

32Kodwa amabele lophoko kakutshaywanga, ngoba kwakungakakhuli —

33UMose waphuma emzini evela kuFaro, waphakamisela izandla zakhe eNkosini; kwaphela ukuduma lesiqhotho, futhi lezulu kalabe lisana emhlabeni.

34Kodwa uFaro esebonile ukuthi kuphelile izulu lesiqhotho lokuduma, waphinda wona futhi, wayenza yaba lukhuni inhliziyo yakhe, yena lezinceku zakhe.

35Inhliziyo kaFaro yaba lukhuni, kazabavumela abakoIsrayeli ukuba bahambe, njengalokhu iNkosi yayitshilo ngoMose.