Zaga 7 - Ndebele Bible (iBhayibhili Elingcwele) 1978

Ubuqili bowesifazana omubi

1Mntanami, gcina amazwi ami,

uzibekele imilayo yami.

2Gcina imilayo yami, uphile,

ukulondoloze ukufundisa kwami kube ligugu kuwe,

3ukufake eminweni yakho,

uyigwale enhliziyweni yakho.

4Biza ukuHlakanipha ngokuthi ngudadewenu;

ubize ukuQedisisa ngokuthi ngumngane wakho;

5ukuze kukugcine kumfazi oyisifebe,

kowesifazana omubi olamazwi akhohlisayo.

6Ngema ewindini lendlu yami, ngalunguza ngaphandle,

7ngabona amajaha angelalwazi,

omunye wawo owayeyisithutha

8ezidlulela ejikweni lendlela,

eqonda emzini wesifebe,

9kusihlwa sekumnyama.

10Wasehlangatshezwa ngowesifazana,

egqoke njengewule, elobuqili,

11eziqakisa engathembekanga,

engathandi ukuhlala emzini wakhe,

12kuqala usendleleni, abesesiya emdangeni,

ecathama emajikweni wonke.

13Wamdumela, wamanga, waziqakisa wathi kuye:

14Bekumele nginikele imihlatshelo,

lamhla sengigcwalisile izifungo zami;

15ngakho ngiphumile ukukuhlangabeza,

ngifudinge ngikufice.

16Ngendlele ingubo embhedeni wami,

lamalembu amahle alemibala avela eGibithe;

17ngifafazile umbheda wami,

ngemure langamakha enhlaba langekinamoni.

18Woza, sizijabulise ngothando kuze kuse,

sizithokozise ngothando.

19Ngoba indoda yami kayikho, ihambile uhambo olude,

20yahamba lemali enengi,

izakubuya nxa inyanga isidilingene.

21Wamyenga ngamazwi amahle,

wamhuga ngamazwi amnandi.

22Ijaha laselimlandela njengenkabi isiya ekuhlatshweni,

njengempunzi ebanjwe ngumjibila,

23ize ihlatshwe ngomtshoko enhliziyweni yayo,

njengenyoni ithothela esifwini,

ingazi ukuthi izalahlekelwa yikuphila.

24Khathesi, bantwana bami, ngizwani,

lilalele amazwi ami.

25Lingavumeli inhliziyo zenu ziphambukele endleleni zakhe,

lingahambi emikhondweni yakhe;

26ngoba labo abawisele phansi banengi,

yebo, labo ababulalayo balixuku elikhulu elingelakubalwa.

27Indlu yakhe iyindlela eya endaweni yabafileyo,

eyehlela ezindlini zokufa.