Nani 20 - Ndebele Bible (iBhayibhili Elingcwele) 1978

Amanzi akhutshwa edwaleni

1Lonke ibandla labakoIsrayeli lafika enkangala yaseZini ngenyanga yokuqala; bahlala eKadeshi. UMiriyamu wafela lapho, wambelwa khona.

2Ibandla laswela amanzi lapho. Ngakho baxabana loMose loAroni.Eks 17:1–7

3Abantu baphikisana loMose bathi: Kungathi ngabe safa ekufeni kwabafowethu phambi kweNkosi!

4Liletheleni ibandla leNkosi enkangala le ukuba sife lapha, thina lenkomo zethu na?

5Lasikhuphelani eGibithe ukusiletha kulindawo embi na? Kakusiyo indawo yokulima amabele lemikhiwa lamavini lamapomegranati, futhi kakulamanzi okunatha.

6UMose loAroni basebephuma ebandleni, baya emnyango wethente lokuhlangana, bathi mbo ngobuso phansi. Inkazimulo yeNkosi yabonakala kubo.

7INkosi yathi kuMose:

8Thatha intonga, ubuthanise ibandla, wena loAroni umfowenu, litshele idwala eliphambi kwabo ukuba likhuphe amanzi alo; ngalokhu lizakubakhuphela amanzi edwaleni, ukuze lilinathise ibandla lenkomo zabo.

9UMose wathatha intonga phambi kweNkosi njengokutsho kwayo kuye.

10UMose loAroni babuthanisa ibandla phambi kwedwala; wathi kubo: Zwaninike lina bahlamuki; sizakulikhuphela amanzi edwaleni leli na?

11UMose waphakamisa isandla sakhe, watshaya idwala kabili ngentonga yakhe; kwampompoza amanzi amanengi, ibandla lanatha kanye lenkomo zalo.

12INkosi yathi kuMose loAroni: Njengokuba lingangithembanga, lingangizivezanga ngingcwele emehlweni abakoIsrayeli, ngakho kaliyikungenisa ibandla leli elizweni engibanike lona.

13La ngamanzi aseMeriba, lapho abantu bakoIsrayeli baphikisana khona leNkosi, yazibonakalisa kubo ukuthi ingcwele.

Inkosi yaseEdoma ivalela abakoIsrayeli indlela

14UMose wathuma izigijimi enkosini yaseEdoma, zisuka eKadeshi, wathi: Umfowenu uIsrayeli uthi: Uyazazi zonke inkathazo ezisehleleyo,

15lokuthi obaba behlela eGibithe, sahlala eGibithe isikhathi eside; amaGibithe asiphatha kubi thina labobaba.

16Sakhala eNkosini, yasizwa, yathuma isithunywa sayo, yasikhupha eGibithe; khathesi sesilapha eKadeshi, umuzi osemkhawulweni welizwe lakho.

17Ake usivumele ukuba sidabule elizweni lakho. Kasiyikudabula emasimini loba ezivinini, futhi kasiyikunatha amanzi emithombo. Sizakuhamba ngomgwaqo wenkosi, singaphambukeli ngakwesokunene langakwesokhohlo, size siphume elizweni lakho.

18Kodwa abaseEdoma bathi kuye: Kawuyikudabula elizweni lethu, funa siphume sikuhlasele ngomkhonto.

19AbakoIsrayeli bathi kubo: Sizakuhamba ngomgwaqo. Uba sinatha amanzi, thina lenkomo zethu, sizakukubhadala; kodwa lisivumele ukuba sidabule khona nje kuphela.

20Kodwa bathi: Atshi, kaliyikudabula. AbaseEdoma basebephuma ukubahlasela belabantu abanengi ngamandla amakhulu.

21Ngalokhu abaseEdoma babalela abakoIsrayeli ukudabula elizweni labo. Ngakho abakoIsrayeli baphenduka bahamba ngenye indlela.

Ukufa kukaAroni entabeni yaseHori

22Lonke ibandla labakoIsrayeli lasuka eKadeshi, lahamba lafika entabeni yaseHori.

23INkosi yathi kuMose loAroni entabeni yaseHori, ngasemkhawulweni welizwe laseEdoma:

24UAroni uzambelwa kwabaphansi, ngoba kayikungena elizweni engilinike abakoIsrayeli, ngoba lahlamuka elizwini lami ngasemanzini aseMeriba.

25Wena Mose, thatha uAroni loEleyazare indodana yakhe, ubakhwelise entabeni yaseHori,

26umhlubule uAroni izambatho zakhe, uzifake kuEleyazare indodana yakhe; uAroni uzakususwa, afe.

27UMose wenza njengokulaya kweNkosi. Bakhwela entabeni yaseHori phambi kwebandla lonke.

28UMose wamhlubula uAroni izambatho zakhe, wazifaka kuEleyazare indodana yakhe. UAroni wafela khona engqongeni yentaba. UMose loEleyazare basebesehla entabeni.Eks 29:29 Nani 33:38; Dute 10:6

29Lapho lonke ibandla libona ukuthi uAroni usefile, yonke indlu kaIsrayeli yamlilela insuku ezingamatshumi amathathu.