1 Kor 9 - Ndebele Bible (iBhayibhili Elingcwele) 1978

Inkululeko lelungelo likaPawuli

1Kangikhululekanga na? Kangisuye umphostoli na? Kangimbonanga uJesu iNkosi yethu na? Lina kalisiwo umsebenzi wami eNkosini na?

2Uba ngingesuye umphostoli kwabanye, nginguye kini, ngoba lina ngokwenu liluphawu lobuphostoli bami eNkosini.

3Lokhu kuyikuziphendulela kwami kulabo abangisolayo.

4Kasilalungelo yini lokuba sidle sinathe na?

5Kasilalo ilungelo yini lokuhamba lomzalwanekazi ongumkethu njengabanye abaphostoli, labafowabo beNkosi, loKefasi, na?

6Kanti yimi ngedwa loBarnabasi esingelalungelo lokuyekela ukusebenza na?

7Ngubani owake waphuma impi ngezakhe izindleko na? Ngubani ohlanyela isivini, angazidli izithelo zaso, na? Ngubani owalusa umhlambi, angadli uchago lwawo, na?

8Lokhu ngikutsho ngokwabantu na? Lomlayo kawutsho khona lokho na?

9Ngoba kulotshiwe emlayweni kaMose ukuthi: Ungayifaki isayeke inkabi, nxa ibhula amabele.

Kambe uNkulunkulu ukhathalela izinkomo na?Dute 25:4; 1 Tim 5:18

10Ingabe ukutsho lokhu ngenxa yethu impela na? Kwalotshwa ngenxa yethu, ngoba olimayo kufanele alime elethemba, lobhulayo abhule elethemba lokwabelwa laye.

11Uba thina sahlanyela kini okomoya, kuyinto enkulu yini, uba sivuna okwenu okomzimba na?Roma 15:27

12Uba abanye belalawomandla phezu kwenu, thina kasilawo ngokukhulu na? Kantike kasiwasebenzisanga lawomandla, kodwa sibekezelela konke, ukuba singalikhubi endleleni yevangeli likaKristu.

13Kalazi yini ukuthi labo abasebenza ethempelini badla okwethempelini, lalabo abakhonza ealtareni bahlanganyela lealtare na?Dute 18:1

14Ngokunjalo iNkosi ilayile ukuthi labo abatshumayela ivangeli basile ngevangeli.Mat 10:10; Luka 10:7

15Kodwa mina kangiwasebenzisanga lawomalungelo; futhi kangilobi ukuba kwenziwe ngokunjalo kimi; ngoba kungaba ngcono kimi ukuba ngife kulokuba umuntu akwenze ize lokhu engizincoma ngakho.

16Loba ngitshumayela ivangeli, kangilakuzincoma ngalokho, ngoba ngimele ukwenza njalo. Maye kimi uba ngingalitshumayeli ivangeli!

17Uba ngisenza lokhu ngokuzithandela kwami, ngilawo umvuzo; kodwa uba kungesikho ngokuzithandela kwami, ngimiselwe umsebenzi.

18Pho, umvuzo wami uyini na? Uyilokhu ukuba nxa ngitshumayela ivangeli, ngenze ukuba ivangeli lingabizi lutho, ukuze ngingasebenzisi ilungelo lami elisevangelini.

UPawuli uyisigqili sabo bonke

19Lanxa ngikhululekile kibo bonke, ngizenze isigqili sabo bonke, ukuba ngizuze abanengi.

20KubaJuda ngaba njengomJuda, ukuze ngizuze abaJuda; kwabangaphansi komlayo ngaba njengongaphansi komlayo, ukuze ngizuze abangaphansi komlayo; kodwa kangingaphansi komlayo mina;

21kwabangelamlayo ngaba njengongelamlayo, ukuze ngizuze abangelamlayo; loba ngingesuye ongelamlayo kuNkulunkulu kodwa ngingaphansi komlayo kaKristu;

22kwababuthakathaka ngaba buthakathaka, ukuze ngizuze ababuthakathaka. Sengaba yikho konke kubo bonke, ukuze ngakho konke ngisilise abanye.

23Ngikwenza konke ngenxa yevangeli, ukuze lami ngihlanganyele kulo.

Umfanekiso wesigijimi

24Kalazi yini ukuthi bonke abagijima ngokuncintisana bagijima bonke, kodwa munye owamukela umvuzo. Ngakhoke gijimani ngokunjalo, ukuze lamukele umvuzo.

25Bonke abancintisanayo bayazithinta ezintweni zonke; bakwenza lokhu ukuze bamukele umqhele ophelayo, kodwa thina ukuze samukele ongapheliyo.

26Minake kangigijimi ngokungathi kangiqondanga lutho; kangitshayi nje ngokungathi ngitshaya umoya.

27Kodwa ngiyawudinda umzimba wami, ngiwenze isigqili sami, ukuba mina engitshumayeza abanye ngingalahlwa mina uqobo.