Levi 8 - Ndebele Bible (iBhayibhili Elingcwele) 1978

Ukugcotshwa kukaAroni lamadodana akhe

1INkosi yathi kuMose:Eks 29:1–37

2Thatha uAroni lamadodana akhe, lezambatho, lamagcobo okugcoba, lenkunzi yomnikelo wesono, lezinqama ezimbili, lesitsha sezinkwa ezingelamvubelo,

3ubuthanise lonke ibandla ngasemnyango wethente lokuhlangana.

4UMose wenza njengokutsho kweNkosi kuye, ibandla labuthana ngasemnyango wethente lokuhlangana.

5UMose wathi ebandleni: Yikho lokhu iNkosi elaye ukuba kwenziwe.

6UMose wasondeza uAroni lamadodana akhe, wabagezisa ngamanzi.

7UAroni wamambathisa ibhatshi, wambopha ngebhanti, wamgqokisa isigqoko lengubo yamahlombe, wambopha ngebhanti elalukiweyo lengubo yamahlombe, wayibophela kuye ngalo.

8Wamambathisa ingubo yesifuba, wabeka inkatho iUrimi leThumimi engutsheni yesifuba.

9Wamthwalisa iqhiye ekhanda lakhe; phezu kweqhiye, ngaphambili, wabeka incence yegolide, umqhele ongcwele, njengalokhu iNkosi imlayile.

10UMose wasethatha amagcobo okugcoba, waligcoba iTabernakeli lakho konke okuphakathi kwalo, wakwahlukanisela iNkosi.

11Wafafaza ngawo ialtare kasikhombisa, wagcoba ialtare lezitsha zalo zonke, lomkolo walo lenyawo zawo, ukuba akwahlukanisele iNkosi.

12Wathela amagcobo okugcoba ekhanda likaAroni, wamgcoba, ukuba amahlukanisele iNkosi.

13UMose wasesondeza amadodana kaAroni, wawambathisa amabhatshi, wawabopha ngamabhanti, wawathwalisa izingowane, njengalokhu iNkosi imlayile.

14Waseletha inkunzi yomnikelo wesono; uAroni lamadodana akhe babeka izandla zabo enhlokweni yenkunzi yomnikelo wesono.

15UMose wayihlaba, wathatha igazi, walininda ngomunwe wakhe empondweni zealtare inxa zonke, wahlambulula ialtare, wathululela igazi phansi kwealtare, walahlukanisela iNkosi ukuba alenzele indlela yokubuyisana.

16Wathatha lonke idanga lemibilini, lamahwahwa angaphezu kwesibindi, lezinso zombili lamahwahwa azo, wakutshisa ealtareni.

17Kodwa inkunzi, lesikhumba sayo, lenyama yayo, lomswane wayo wakutshisa ngomlilo ngaphandle kwezihonqo, njengalokhu iNkosi imlayile.

18Waseletha inqama yomnikelo wokutshiswa; uAroni lamadodana akhe babeka izandla zabo enhlokweni yenqama.

19UMose wayihlaba, wakhaphazela igazi ealtareni inxa zonke.

20Lapho uMose esehlahlele inqama, watshisa inhloko lezitho lamahwahwa.

21Wagezisa imibilini lemilenze ngamanzi, watshisa inqama yonke ealtareni, yaba ngumnikelo wokutshiswa olephunga elimnandi, lomnikelo owenzelwe iNkosi ngomlilo, njengokutsho kwayo kuMose.

22Waseletha enye inqama, inqama esetshenziswa ekugcotshweni kompristi; uAroni lamadodana akhe babeka izandla zabo enhlokweni yenqama.

23UMose wayihlaba, wathatha igazi layo, walininda oqwangeni lwendlebe yokunene kaAroni, lasesithupheni sesandla sakhe sokunene, lasezwaneni elikhulu lonyawo lwakhe lokunene.

24Wasesondeza amadodana kaAroni, waninda igazi oqwangeni lwezindlebe zawo zokunene, lasezithupheni zezandla zawo zokunene, lasemazwaneni amakhulu enyawo zawo zokunene, wakhaphazela igazi ealtareni inxa zonke.

25Wasethatha amahwahwa, lomsila ononileyo, ledanga lonke lemibilini, lamahwahwa angaphezu kwesibindi, lezinso zombili lamahwahwa azo, lomlenze wokunene,

26wakhupha esitsheni sezinkwa ezingelamvubelo esasiphambi kweNkosi iqebelangwana laba linye elingelamvubelo, leqebelengwana laba linye elilamafutha, lesinkwa esincinyane, wakubeka phezu kwamahwahwa laphezu komlenze wokunene;

27wakubeka konke ezandleni zikaAroni lezandleni zamadodana akhe, wakuzunguza kwaba ngumnikelo wokuzunguzwa phambi kweNkosi.

28UMose wasekuthatha ezandleni zabo, wakutshisa ealtareni lomnikelo wokutshiswa, kwaba ngumnikelo wenkonzo yokugcotshwa olephunga elimnandi, umnikelo owenzelwe iNkosi ngomlilo.

29UMose wathatha isifuba, wasizunguza saba ngumnikelo wokuzunguzwa phambi kweNkosi; sasiyisabelo sakhe senqama yenkonzo yokugcotshwa, njengokulaywa kwakhe yiNkosi.

30UMose wasethatha amagcobo okugcoba legazi elalisealtareni, wachela ngakho uAroni lezambatho zakhe, lamadodana akhe lezambatho zawo. Ngalokhu wahlukanisela iNkosi uAroni lezambatho zakhe, lamadodana akhe lezambatho zawo.

31UMose wathi kuAroni lamadodana akhe: Phekani inyama ngasemnyango wethente lokuhlangana, liyidle lapho lezinkwa ezisesitsheni seminikelo yenkonzo yokugcotshwa, njengokulaya kwami ngisithi: UAroni lamadodana akhe bazakukudla.

32Okuseleyo kwenyama lokwezinkwa likutshise ngomlilo.

33Lingaphumi ngomnyango wethente lokuhlangana insuku eziyisikhombisa, zize ziphele insuku zokugcotshwa kwenu, ngoba ukugcotshwa kwenu kuzathatha insuku eziyisikhombisa.

34Konke okwenziweyo lamhla iNkosi ilayile ukuba kwenziwe, ukuze lenzelwe indlela yokubuyisana.

35Lizakuhlala ngasemnyango wethente lokuhlangana insuku eziyisikhombisa, emini lasebusuku, lenze izilayezelo zeNkosi ukuba lingafi; ngoba mina ngilayiwe kanjalo.

36UAroni lamadodana akhe benza izinto zonke iNkosi eyamlaya uMose zona.