Jobe 33 - Ndebele Bible (iBhayibhili Elingcwele) 1978

UElihu ukhuza uJobe ngokusola kwakhe uNkulunkulu

1Khathesike, Jobe, ake uzwe ukukhuluma kwami,

ulalele wonke amazwi ami.

2Sengilungele,

ukuba ngikhulume okusengqondweni yami.

3Inhliziyo yami ithi ngikhulume engikwaziyo,

lomlomo wami ukhulume iqiniso.

4Umoya kaNkulunkulu wangenza,

lokuphefumula kukaSomandla kwanginika ukuphila.

5Uba ungangiphendula, ungiphendule;

lungisa amazwi akho, ume.

6KuNkulunkulu nginjengawe,

lami ngabunjwa ngebumba,

7ukungesaba kwakho kungakwethusi,

isandla kasiyikuba phezu kwakho.

8Impela ukhulume ngisizwa,

ngawezwa amazwi akho.

9Wena uthi: Ngimsulwa, kangilacala,

ngimhlophe, kabukho ububi kimi.

10Kanti uNkulunkulu uyafumana amathuba okungibeka icala,

angitshaye isitha sakhe.

11Uyazikhina inyawo zami,

aqaphele zonke indlela zami.

12Khangela, Jobe, kawuqondanga; ngizakukuphendula.

UNkulunkulu mkhulu kulomuntu.

13Umphikiselani usithi: Kayikuphendula lelilodwa emazwini ami?

14Ngoba uNkulunkulu ukhuluma ngenye indlela,

abuye akhulume ngenye, kodwa kakho onanzayo.

15Ukhuluma ngamaphupho langemibono yasebusuku,

lapho abantu bebanjwe yibuthongo obunzima,

belele emacansini abo;

16abesevula indlebe zabo,

abethuse ngokuxwayisa kwakhe,

17ukuze aphambule umuntu ekwenzeni kwakhe,

aqede lokuzikhukhumeza kwakhe,

18anqande umphefumulo wakhe egodini,

lokuphila kwakhe ukuba kungabhujiswa.

19Njalo umuntu umtshaya ngobuhlungu ecansini lakhe,

langokuqaqamba kwamathambo akhe,

20aze enyanye ukudla,

angazikhwabithi lezibondlo.

21Inyama yakhe iyaphela ingabe isabonakala,

lamathambo akhe abekade engabonakali ayavela.

22Umphefumulo wakhe useduze legodi,

lokuphila kwakhe kuseduze lokufa.

23Uba kukhona isithunywa ngaye,

umlamuli, oyedwa nje phakathi kwezigidi,

ukutshela umuntu okufanele akwenze,

24sibe lomusa kuye sithi: Mkhulule egodini,

ngoba sengimzuzele inhlawulo;

25inyama yakhe kayibe ntsha njengeyomntwana,

abuyele ensukwini zobutsha bakhe,

26akhuleke kuNkulunkulu, amuzwe,

eze phambi kwakhe ngokuthokoza.

Ulandisa ebantwini ngokusiliswa kwakhe,

27ehlabela phambi kwabantu esithi:

Ngonile, ngahlanekela okulungileyo,

kodwa kakubalelwanga kimi.

28Uhlengile umphefumulo wami egodini,

ukuphila kwami kuzabona ukukhanya.

29Konke lokhu uNkulunkulu uyakwenza emuntwini,

ekuphindaphinda,

30ambuyise egodini,

ukuba azithokozise ngokukhanya kokuphila.

31Ake uzwe, Jobe, ungilalele,

ake uthule, mina ngikhulume.

32Uba ulolutho, ungiphendule;

khuluma, ngoba ngifisa ukutshengisa ukuthi ulungile.

33Uba ungelakho, ungilalele;

thula, mina ngizakukufundisa ukuhlakanipha.