Eks 30 - Ndebele Bible (iBhayibhili Elingcwele) 1978

Ialtare lokutshisela impepha

1Uzakwenza ialtare lokutshisela impepha, ulenze ngesihlahla somvagazi,Eks 37:25–28

2ubude balo bube yingalo, ububanzi balo bube yingalo, lilingane inxa zonke; ukudepha kwalo kube zingalo ezimbili; lona lempondo zalo kube yintonye.

3Ulibhade ngegolide elihle, ngaphezulu lezinhlangothi zalo lempondo zalo; wenze kulo umqolo wegolide inxa zonke.

4Ngaphansi komqolo walo, enhlangothini ezimbili ezikhangeleneyo, wenze amasongo amabili egolide, ukuba abe zindawo zemijabo zokulithwala.

5Uyenze imijabo ngesihlahla somvagazi, uyibhade ngegolide.

6Uzalibeka phambi kweveli elingasemtshokotshweni wobufakazi, ngaphambi kwesihlalo somusa esiphezu kobufakazi, lapho ngizahlangana khona lawe.

7UAroni atshisele kulo impepha elephunga elimnandi, ayitshise insuku zonke ekuseni nxa elungisa izibane;

8uAroni ayitshise futhi kusihlwa lapho elumathisa izibane, ukuba ibe yimpepha engapheliyo phambi kweNkosi ezizukulwaneni zenu.

9Linganikeleli kulo impepha engalunganga lomnikelo wokutshiswa lomnikelo wempuphu, lingatheli kulo umnikelo wokuthululwa.

10UAroni uzakwenza indlela yokubuyisana empondweni zalo kanye ngomnyaka, alenzele kanye ngomnyaka indlela yokubuyisana ngegazi lomnikelo wesono wokubuyisana ezizukulwaneni zenu; ngoba lingcwele kakhulu eNkosini.

Imali yokubuyisana

11INkosi yakhuluma kuMose yathi:

12Lapho ubala inani labantu bakoIsrayeli, wonke umuntu uzakunika iNkosi ihlawulo ngokuphila kwakhe, ukuba kungabi lesifo phakathi kwabo, lapho ubabala.

13Ilowo lalowomuntu obaliweyo anike lokhu, ingxenye yeshekeli ngokweshekeli lendlu engcwele — ishekeli lingamagera angamatshumi amabili — ingxenye yeshekeli ibe ngumnikelo eNkosini.Eks 38:25, 26; Mat 17:24

14Wonke umuntu obaliweyo oleminyaka engamatshumi amabili langaphezulu anikele umnikelo eNkosini.

15Abanothileyo banganiki okwedlulayo, labayanga banganiki okuncinyane kulengxenye yeshekeli, lapho linikela umnikelo eNkosini ukuba lenzele ukuphila kwenu indlela yokubuyisana.

16Uzakuthatha imali yokubuyisana ebantwini bakoIsrayeli, uyimisele inkonzo yethente lokuhlangana, ukuba ibe yisikhumbuzo sabantu bakoIsrayeli phambi kweNkosi, ukuze kwenzelwe ukuphila kwenu indlela yokubuyisana.

17INkosi yakhuluma kuMose yathi:

18Uzakwenza umkolo wethusi wokugezela olenyawo zethusi, uwubeke phakathi kwethente lokuhlangana lealtare, uthele kuwo amanzi,Eks 38:8

19ukuba uAroni lamadodana akhe bagezele izandla lenyawo kuwo.

20Nxa bengena ethenteni lokuhlangana loba besondela ealtareni ukuba bakhonze, batshise umnikelo ngomlilo eNkosini, bazageza ngamanzi, ukuba bangafi.

21Ngakhoke bazakugeza izandla lenyawo ukuba bangafi; kuzakuba yisimiso esingapheliyo kubo, kuAroni lenzalo yakhe ezizukulwaneni zabo.

Amagcobo lempepha

22INkosi yakhuluma futhi kuMose yathi:Eks 37:29

23Thatha amakha amahle, imure elingamagcobo elingamashekeli angamakhulu amahlanu, lekinamoni elilephunga elimnandi elingamashekeli angamakhulu amabili lamatshumi amahlanu, lekalamu elinuka kuhle elingamashekeli angamakhulu amabili lamatshumi amahlanu,

24lekasiya elingamashekeli angamakhulu amahlanu ngokweshekeli lendlu engcwele, kanye lamafutha amaoliva elihini linye;

25wenze konke lokhu ukuba kube ngamagcobo angcwele okugcoba, amakha axutshanisiweyo njengokwenza kompheki wamakha; azakuba ngamagcobo angcwele okugcoba.

26Uzakugcoba ngawo ithente lokuhlangana lomtshokotsho wobufakazi,

27letafula lezitsha zayo zonke, loluthi lwesibane lezitsha zalo, lealtare lempepha,

28lealtare lomnikelo wokutshiswa lezitsha zalo zonke, lomkolo lenyawo zawo;

29ukwahlukanisele konke ukuba kube ngcwele kakhulu; lalokho okukuthintayo kuzakuba ngcwele.

30Ubagcobe uAroni lamadodana akhe, ubalukhanisele ukuba babe ngabapristi bokuphatha umsebenzi wami.

31Utshele abantu bakoIsrayeli uthi: Lokhu kuzakuba ngamagcobo ami angcwele okugcoba kuzo zonke izizukulwana zenu;

32angabothelwa emzimbeni womuntu nje; lingawenzi amanye afane lawo ngokwenziwa kwawo; angcwele, futhi abe ngcwele kini.

33Lowo owenza afanana lawo loba ewathela kowemzini, uzakukhutshwa ebantwini bakibo.

34INkosi yathi kuMose: Thatha amakha amnandi, ngitsho isitakete leonika legalibanu, amakha kanye lenhlaka enhle, kulingane konke;

35wenze ngakho impepha, ibe njengeyenziwa ngumenzi wamakha, ilungiswe ngetshwayi, ibenhle ibe ngcwele;

36ucholisise enye, uyibeke phambi kobufakazi ethenteni lokuhlangana, lapho ngizahlangana khona lawe; izakuba ngcwele kakhulu kini.

37Impepha ozakuyenza ngendlela yokwenziwa kwayo ungazenzeli yona; kayibe ngcwele kuwe, yenzelwe iNkosi.

38Lowo ozakuyenza efanana layo ngephunga layo ayisebenzise, uzakukhutshwa ebantwini bakibo.