Isa 28 - Ndebele Bible (iBhayibhili Elingcwele) 1978

UEfrayimi uyaxwayiswa

1Maye kuyo imiqhele yokuzikhukhumeza yezikhulu zakoEfrayimi ezidakiweyo,

lakuwo amaluba ayo amahle ngoba ayabuna;

aphezu kwamakhanda abadakiweyo agcotshwe ngamakha amahle,

bona beqedwe ngutshwala.

2Khangela, iNkosi ilaye olamandla loqinileyo,

ozakuchitha ngamandla njengesiphepha esilesiqhotho,

njengesiphepha esilamandla samanzi akhukhulayo,

uzadilizela phansi emhlabeni bonke ngamandla.

3Imiqhele yokuzikhukhumeza yezikhulu zakoEfrayimi ezidakiweyo izanyathelwa ngenyawo,

4lamaluba ayo amahle abune;

aphezu kwamakhanda abadakiweyo agcotshwe ngamakha amahle,

azaphela njengomkhiwa ovuthwe kungakafiki ihlobo;

owubonayo uyawukha, ubune usesandleni sakhe.

5Kuzakuthi ngalolosuku iNkosi yamabandla ibe ngumqhele okhazimulayo,

lesidlodlo sobuhle kwabaseleyo ebantwini bayo,

6inike umoya wokulunga kulabo abahlulelayo,

lamandla kulabo abavikela umuzi.

IJerusalema liyaxwayiswa

7Lalaba bayadakwa liwayini,

badayizele ngenxa yotshwala;

umpristi lomprofethi badakwa ngutshwala,

baphambene ngenxa yewayini,

badayizele ngenxa yotshwala;

ngakho abaprofethi baphambanisa imibono,

labapristi bakhubeke ekwahluleleni kwabo.

8Wonke amatafula agcwele amahlanzo abo,

kakulandawo engangcolanga.

9Bathi: Lumprofethi uthi uzafundisa bani ukwazi,

uthi uzachasisela bani ilizwi na?

Abakhunyuliweyo ebeleni na?

10Ngoba uyasifundisa ngalindlela,

kube libala ngalinye ngalinye,

lelizwi ngalinye ngalinye,

lomzila ngamunye ngamunye,

lesifundo ngasinye ngasinye.

11Yebo impela, ngomlomo wabezizwe langolimi lwezizweni

iNkosi izakukhuluma lalababantu,

12eyake yatsho kubo ukuthi: Nanku ukuphumula;

phumuzani abadiniweyo;

nanku ukuhlumelela;

kodwa kabathandanga ukuzwa.

13Ngakhoke iNkosi izabafundisa ngalindlela,

kube libala ngalinye ngalinye,

lelizwi ngalinye ngalinye,

lomzila ngamunye ngamunye,

lesifundo ngasinye ngasinye,

ukuze bahambe, bawe nyovane,

bephuke, babanjwe, bathathwe.

14Ngakhoke zwanini ilizwi leNkosi, lina bantu abedelelayo,

elibusa lababantu baseJerusalema.

15Ngoba lithe: Senzile isivumelwano lokufa,

silesivumelwano lendawo yabafileyo;

ngakho lapho inhlupheko ezikhukhulayo zidlula, kaziyikusehlela,

ngoba senzile amanga abe yisiphephelo sethu,

sacatsha ngaphansi kwenkohliso.

16Ngakhoke iNkosi uNkulunkulu ithi:

Khangelani, ngiyamisa eZiyone ilitshe lesisekelo,

ilitshe elihloliweyo, ilitshe lengonsi eliligugu, lelesisekelo esiqotho.

Lowo okholwayo kayikukhubeka.

17Ngizakwenza okufaneleyo kube yintambo yokwakha,

lokulunga kube yintambo yokulinganisa;

isiqhotho sizakhukhula isiphephelo senu samanga,

lamanzi akhukhule indawo yenu yokucatsha.

18Laphoke isivumelwano senu lokufa sizakuchithwa,

lesivumelwano senu lendawo yabafileyo siphele;

lapho inhlupheko ezikhukhulayo zisedlula,

zizalinyathela phansi.

19Lapho zidlulayo njalo zizalithatha;

ngoba zizadlula ukusa ngokusa, emini lebusuku.

Lapho lisizwa ilizwi elinjalo lizatshaywa luvalo.

20Ngoba isaga sithi: Umbheda mfitshane kakhulu ukuba umuntu alale kiwo,

lengubo yincinyane kakhulu ukuba umuntu azigqoke ngayo.

21Ngoba iNkosi izavuka njengasentabeni yasePerazimi,

ithukuthele kakhulu njengasesigodini seGibeyoni,

ukuba yenze lokho okufanele ikwenze, isenzo esingejwayekelanga,

iqede umsebenzi wayo, umsebenzi omangalisayo.

22Ngakhoke lingadeleli ilizwi lami,

funa izibopho zenu ziqiniswe;

ngoba sengizwile ukuba iNkosi uNkulunkulu wamabandla imisile

ukuchitha lonke ilizwe.

Ukuhlakanipha kukaNkulunkulu

23Lalelani, lizwe ilizwi lami,

lalelani ukukhuluma kwami.

24Olimela ukuhlanyela ulima insuku zonke na?

Uyawubhuqa umhlabathi njalonjalo na?

25Lapho esewuhlelembile, angithi uyahlanyele ulude lamakhomane,

ahlanyele emizileni amabele lebhali,

lonyawuthi eceleni na?

26Ngoba ufundiswa kuhle efundiswa nguNkulunkulu wakhe.

27Ulude kalubhulwa ngobhulo,

lenqola kayikhanjiswa phezu kwamakhomane;

kodwa ulude lutshaywa ngoswazi,

lamakhomane ngentonga.

28Amabele esinkwa ayachotshozwa na?

Atshi, kawabhulwa kokuphela,

kodwa lapho inqola isidlule phezu kwawo,

ayachaywa endaweni yokuba achotshozwe.

29Lalokhu ukuhlakanipha kuvela eNkosini yamabandla;

iyamangalisa ekwelulekeni kwayo,

yinkulu ngokuhlakanipha kwayo.