Isa 21 - Ndebele Bible (iBhayibhili Elingcwele) 1978

Umbono wokunqotshwa kweBabiloni

1Leli yilizwi ngeBabiloni.

Njengokudlula kwezivunguzane eNegebi,

ingozi ivela enkangala, elizweni elesabekayo.

2Ngiboniswe umbono olukhuni;

umphangi uyaphanga, lomchithi uyachitha.

Suka wena Elamu; uvimbezele, lawe Mede;

konke ukuhlupheka okwalethwa yiBabiloni uNkulunkulu uzakukuqeda.

3Ngakhoke ngilobuhlungu obukhulu, ngiphethwe ngumhelo,

umhelo ofana lowowesifazana obelethayo;

ngikhathazeka kakhulu ukuze ngingezwa,

ngihlupheka kakhulu ukuze ngingaboni.

4Ngilahlekelwe yingqondo, ngatshaywa luvalo;

ukuhwalala ebengikufisa ukuba kufike kungilethele ukuthuthumela.

5Ngiyabona abantu besenza idili, bendlale ingubo;

bayadla banathe.

Sukumani, zikhulu, lilungise izihlangu.

6INkosi yasisithi kimi:

Hamba uyemisa umlindi, ukuze abike akubonayo.

7Lapho ebona abagadi bamabhiza behamba ngababili,

abagadi babobabhemi labagadi bamakamela,

kakhangelisise ngesineke.

8Umlindi wasememeza esithi:

Nkosi, ngimi enqabeni, ngimi usuku lonke,

ngimi ubusuku bonke endaweni yami yokulinda.

9Khangela, nampa abagadi besiza,

abagadi bamabhiza ngababili.

Wasesithi: Liwile, liwile iBabiloni;

lazo zonke izithombe zabonkulunkulu balo zidilizelwe phansi.

10Lina bantu bakithi elitshayiweyo lanyathezelwa phansi,

ngiyalitshela konke engikuzwileyo eNkosini yamabandla, uNkulunkulu kaIsrayeli.

Ilizwi ngeEdoma

11Leli yilizwi ngeEdoma.

Ukhona omemezayo eseSeyiri esithi kimi:

Mlindi, yisikhathi bani sebusuku na?

Mlindi, yisikhathi bani sebusuku na?

12Umlindi wathi: Kuyeza ukusa, kubuye ubusuku futhi.

Uba lithanda ukubuza, buzani, libuye futhi.

Ilizwi ngeArabiya

13Leli yilizwi ngeArabiya.

Lina elihlala enkangala yaseArabiya.

lina zindwendwe zaseDedani,

14lethani amanzi kwabomileyo.

Lina elihlala elizweni laseTema,

hlangabezani ababalekayo ngokudla;

15ngoba babalekela imikhonto ehotshiweyo,

babalekela lemitshoko lokutshisa kwempi.

16Ngoba iNkosi ithe kimi: Phakathi komnyaka nje, olingene lowomuntu oqatshiweyo, lonke udumo lwaseKedari luzakuphela.

17Labaseleyo babatshoki kumaqhawe baseKedari bazakuba balutshwana. INkosi uNkulunkulu kaIsrayeli isikhulumile.