1Emva kwalokho uMose loAroni baya kuFaro bathi: INkosi uNkulunkulu wakoIsrayeli ithi: Bavumele abantu bami ukuba bahambe, bangenzele umkhosi enkangala.
2Kodwa uFaro wathi: INkosi ingubani ukuba ngilalele ilizwi layo, ngivumele abakoIsrayeli bahambe na? Kangiyazi iNkosi, futhi kangiyikubavumela abakoIsrayeli ukuba bahambe.
3Basebesithi: UNkulunkulu wamaHeberu wahlangana lathi; ngakho ake usivumele ukuba sihambe ummango wezinsuku ezintathu siye enkangala, siyihlabele iNkosi uNkulunkulu wethu, funa isehlele ngesifo langempi.
4Kodwa inkosi yaseGibithe yathi kubo: Lina Mose loAroni, libasuselani abantu emisebenzini yabo na? Sukani, liye emisebenzini yenu!
5UFaro wathi: Khangelani, abantu belizwe sebebanengi, kanti lithanda ukubaphumuza emithwalweni yabo.
6Ngalolosuku uFaro walaya ababonisi babantu lezinduna zabo wathi:
7Lingabe lisabanika abantu utshani bokwenza izitina njengakuqala; kodwa kabahambe bayezibuthela utshani;
8kodwa inani lezitina abakade bezenza bamiseleni lona, lingalinciphisi; ngoba bayavilapha; yikho lokhu bekhala besithi: Asihambeni siyehlabela uNkulunkulu wethu.
9Banikeni umsebenzi onzima kakhulu ukuba bawenze, bangalaleli amazwi okukhohlisa.
10Ababonisi lezinduna zabantu baphuma, batshela abantu bathi: UFaro uthi: Kangisayikulinika utshani;
11ngakho hambani lina, lizidingele utshani lapho lingabuthola khona; kodwa umsebenzi wenu kawuyikuncitshiswa ngalutho.
12Abantu basebehlakazeka kulo lonke ilizwe laseGibithe ukuba babuthe inhlanga zibe yibona utshani babo.
13Ababonisi babaqhuba bathi: Qedani imisebenzi yenu yensuku ngensuku njengakuqala busekhona utshani.
14Izinduna zabakoIsrayeli abazibekelwa ngababonisi bakaFaro zatshaywa, zabuzwa ukuthi: Kaliqedanga ngani umsebenzi wenu wokwenza izitina izolo lalamhla njengakuqala na?
15Izinduna zabakoIsrayeli zasezisiya kuFaro, zakhala zathi: Wenzeleni okunje encekwini zakho na?
16Inceku zakho kazinikwa utshani, kanti bathi kithi: Bumbani izitina. Futhi inceku zakho ziyatshaywa; kodwa yibo abantu bakho abonayo.
17Kodwa yena wathi: Lina liyavilapha, yebo lingamavila; ngalokhu lithi: Asihambeni siyehlabela iNkosi.
18Ngakho hambani, liyesebenza; ngoba kaliyikunikwa utshani, kanti lizakulenza lelonani lezitina.
19Izinduna zabakoIsrayeli zasezibona ukuthi zazisekuhluphekeni nxa kuthiwa: Kaliyikunciphisa inani lezitina zenu lensuku ngensuku.
20Zahlangana loMose loAroni ababezilindele zisaphuma kuFaro;
21zathi kubo: INkosi ilibone ilitshaye; ngoba lisenze sazondeka kuFaro lasencekwini zakhe; libeke umkhonto ezandleni zazo ukuba zisibulale.
22UMose wabuyela eNkosini wathi: Nkosi, wenzeleni okubi kulababantu na? Ungithumeleni mina na?
23Selokhu ngaya kuFaro ukukhuluma ebizweni lakho, yena wenzile okubi kulababantu; futhi kawubakhululanga abantu bakho.
Who We AreWhat We EelieveWhat We Do
2025 by iamachristian.org,Inc All rights reserved.
