2 Kor 1 - Ndebele Bible (iBhayibhili Elingcwele) 1978

Isibingelelo

1Mina Pawuli, umphostoli kaKristu Jesu ngentando kaNkulunkulu, loTimothi umzalwane, sithi kulo ibandla likaNkulunkulu eliseKorinte lakubo bonke abangcwele abakulo lonke elaseAkaya:Seb 18:1

2Kakube kini umusa lokuthula okuvela kuNkulunkulu uBaba laseNkosini uJesu Kristu.

UPawuli ubonga uNkulunkulu ngenduduzo langokusiliswa kwakhe engozini

3Kabongwe uNkulunkulu uYise weNkosi yethu uJesu Kristu, uYise wobubele, loNkulunkulu wenduduzo yonke,

4osiduduza ekuhluphekeni kwethu konke, ukuze sibe lamandla okududuza abasekuhluphekeni ngenduduzo esiduduzwa ngayo thina nguNkulunkulu.

5Ngoba njengalokhu izinhlupheko zikaKristu zandile kithi, ngokunjalo ukududuzeka kwethu kwandile ngoKristu.

6Uba sihlupheka, kungenxa yokududuzwa lokusiliswa kwenu; uba siduduzeka, kungenxa yokududuzwa kwenu okuvezwa yikubekezelela inhlupheko esihlupheka ngazo lathi.

7Ithemba lethu ngani liqinile, ngoba siyazi ukuthi njengalokhu lihlanganyela lathi ezinhluphekweni zethu, ngokunjalo lizakuhlanganyela kanye lathi enduduzweni yethu.

8Sithanda ukuba lazi, bazalwane, ngokuhlupheka kwethu okwasehlela eAsiya, ngoba sasindwa kakhulu ngokungaphezu kwamandla ethu, saze saphelelwa lithemba lokusila.1 Kor 15:32

9Impela sazizwela thina ngokwethu ukuthi simiselwe ukufa, ukuze singazithembi thina, kodwa sithembe uNkulunkulu ovusa abafileyo,

10owasophula ekufeni okungaka lozakusophula; sesithemba kuye ukuthi uzakusophula futhi.

11Lani limele ukusizana lathi ngokusikhulekela, ukuze umusa esiwuphiweyo nguNkulunkulu ngenxa yokukhuleka kwabanengi siwubongelwe ngabanengi.

12Ukuzincoma kwethu yilokhu, okuyibufakazi besazela sethu, ukuthi sahamba emhlabeni ikakhulu maqondana lani ngobungcwele langobuqotho, kungesikho ngokuhlakanipha komhlaba kodwa ngomusa kaNkulunkulu.

13Ngoba kasililobeli okunye, kodwa lokho elikufundayo likuzwe; ngithemba futhi ukuthi lizakukuzwisisa,

14njengalokhu seliqedisisile kancinyane ukuthi lingazincoma ngathi, njengalokhu lathi singazincoma ngani osukwini lweNkosi yethu uJesu.

UPawuli uchasisa isizatho sokungafiki kwakhe eKorinte

15Ngenxa yalelithemba ngafisa ukuza kini kuqala, ukuze lithokoziswe kabili;

16ngafisa ukudlula kini ngisiya eMakedoniya, ngibuye kini futhi sengivela eMakedoniya, ukuze lingidlulisele eJudiya.Seb 19:21

17Phoke, bengidlala yini nxa ngiqonde lokho na? Lokho engikumisayo ngikumisa ngokwendlela yabantu yini, ukuze kimi kube khona ukuthi: Yebo; lokuthi: Atshi?

18Kodwa njengokuba uNkulunkulu ethembekile, ilizwi lethu kini kalisuye uYebo loAtshi.

19INdodana kaNkulunkulu uJesu Kristu esatshumayela ngaye phakathi kwenu, mina loSilivanu, loTimothi, wayengesuye uYebo loAtshi, kodwa kuye kunguYebo.Seb 18:5

20Zonke izithembiso zikaNkulunkulu zipheleliswe kuye, ngakhoke ngaye sithi: Ameni; kudunyiswe uNkulunkulu.

21KunguNkulunkulu osiqinisayo kanye lani kuKristu, lowasikhethayo,

22owabeka uphawu lwakhe kithi, wasinika uMoya wakhe enhliziyweni zethu ukuba yisibambiso.

23Mina ngibiza uNkulunkulu ukuba abe ngufakazi womphefumulo wami ukuthi ukungezi kwami eKorinte yikuba bengingathandi ukulihlupha.

24Kakusikho ukuthi sibusa ukukholwa kwenu, kodwa sisebenzela ukuthokoza kwenu kanye lani, ngoba liqinile ekukholweni.