2 Kho 10 - Ndebele Bible (iBhayibhili Elingcwele) 1978

UJehu uchitha indlu kaAhabi

1UAhabi wayelamadodana angamatshumi ayisikhombisa eSamariya. UJehu wasegwala izincwadi, wazithumela eSamariya kubabusi bomuzi, lokwabadala, lakubaphathi bamadodana kaAhabi esithi:

2Kuzakuthi ingafika lincwadi kini, lokhu amadodana enkosi yenu akini, futhi kukhona kini lezinqola lamabhiza lemizi ebiyelweyo lezikhali,

3khethani umntwana omuhle lofaneleyo ebantwaneni benkosi yenu, limbeke esihlalweni sobukhosi sikayise, lilwele indlu yenkosi yenu.

4Kodwa besaba kakhulu bathi: Amakhosi amabili ehluleka ukumelana laye; thina singakwenza kanjani?

5Umphathi wesigodlo lenduna yomuzi kanye labadala labaphathi babantwana benkosi bathumela ilizwi kuJehu besithi: Thina siyizinceku zakho, sizakwenza konke okutshoyo. Kasiyikubeka muntu abe yinkosi. Yenza lokho okubona kukuhle kuwe.

6Wasegwala incwadi yesibili esithi: Uba lingakimi, lizimisele ukungilalela; lethani amakhanda amadodana enkosi yenu kimi eJezereli kusasa ngasona lesisikhathi. Amadodana enkosi angamatshumi ayisikhombisa ayelezikhulu zomuzi ezaziwondla.

7Kwathi ekufikeni kwencwadi kuzo, bawathatha amadodana enkosi angamatshumi ayisikhombisa, bawabulala, bafaka amakhanda awo ezitsheni, bawesa kuye eJezereli.

8Kwathi lapho isithunywa sifika simbikela sisithi: Sebewalethile amakhanda amadodana enkosi; yena wathi: Kawabuthelelwe inqumbi ezimbili esangweni kuze kube sekuseni.

9Wasephumake ekuseni, wema khona, wathi ebantwini bonke: Lina lingabantu abaqotho. Yimi engenzela inkosi yami icebo, ngayibulala; pho, ngubani obulele bonke laba na?

10Yazini impela ukuthi wonke amazwi iNkosi uNkulunkulu eyawakhuluma ngendlu kaAhabi azagcwaliseka, lokuthi isikwenzile lokho eyakukhulumayo ngenceku yayo uElija.

11UJehu wasebulala bonke ababesasele endlini kaAhabi eJezereli, zonke izikhulu zakhe labangane bakhe, labapristi bakhe, kaze atshiya loyedwa.

12Wasesukake esiya eSamariya. Ekuhambeni kwakhe, nxa esefikile eBeti‐Ekedi yabelusi,

13wahlangana lezihlobo zikaAhaziya inkosi yakoJuda; wathi kuzo: Lingobani? Zona zamphendula zathi: Siyizihlobo zikaAhaziya, sizekwethekelela amadodana enkosi, labantwana bendlovukazi.

14Wasesithi: Babambeni. Bababamba, bababulalela emgodini waseBeti‐Ekedi, Babengamatshumi amane lambili, kabatshiyanga loyedwa wabo.

15Esesukile lapho wahlangana loJehonadabi indodana kaRekabi owayemhlangabeza; wambingelela wathi kuye: Uyangisekela yini njengoba mina ngikusekela na? UJehonadabi waphendula wathi: Yebo, ngiyakusekela. UJehu wasesithi: Uba kunjalo, xhawula. Wasemxhawula. UJehu wasemkhweza enqoleni yakhe,

16wathi: Asihambe sonke, ukuba ubone ukuyitshisekela kwami iNkosi uNkulunkulu. Wasehamba laye ngenqola yakhe.

17Ekufikeni kwakhe eSamariya wababulala bonke ababesele endlini kaAhabi eSamariya waze wabaqeda du, njengokutsho kwelizwi leNkosi eyalikhuluma kuElija.

UJehu uqeda ukukhonzwa kukaBali koIsrayeli

18UJehu wasebuthanisa bonke abantu, wathi kibo: UAhabi wakhonza kancinyane uBali, kodwa mina Jehu ngizamkhonza kakhulu.

19Ngakhoke ngibizelani abaprofethi bakaBali labo bonke abapristi bakhe, kungasali loyedwa, ngoba ngizanikela umhlatshelo omkhulu kuBali; ongayikuba khona uzabulawa. Lobu babuyibuqili bukaJehu ukuze abulale abakhonza uBali.

20UJehu walaya wathi: Kakwenziwe inkonzo enkulu kaBali. Basebeyenzake.

21UJehu wasethumela ilizwi kuye wonke uIsrayeli; beza bonke abakhonza uBali, kakwaze kwasala loyedwa kibo. Bangena endlini kaBali, yaze yagcwala yathi thwa.

22Wasesithi kulowo owayelondoloza izigqoko: Balethele izambatho bonke abakhonza uBali. Wasebalethela izambatho.

23UJehu wasengena endlini kaBali eloJehonadabi indodana kaRekabi, wathi kulabo abakhonza uBali: Ake likhangelisise ukuba kakukho yini inceku yeNkosi uNkulunkulu lapha phakathi kwenu, kodwa kuyini kuphela elikhonza uBali.

24Wasengena ukunikela imihlatshelo leminikelo yokutshiswa. UJehu wayebeke amadoda angamatshumi aficaminwembili ngaphandle, wathi kuwo: Uba omunye wenu eyekela omunye walabo engibanikela kini abaleke, uzamhlawulela ngokuphila kwakhe.

25Kwathi eseqedile ukunikela iminikelo yokutshiswa, uJehu wasesithi kubalindi lasezinduneni: Ngenani libabulale, lingayekeli loyedwa abaleke. Abalindi lezinduna bangenake, bababulala ngomkhonto baze bafika endlini engaphakathi kwendlu kaBali.

26Bakhupha insika yokukhonzela eyayisendlini kaBali, bayitshisa.

27Badiliza insika kaBali, badiliza lendlu yakhe, bayenza yaba yindlu yokuyela phandle kuze kube lamhla.

28Ngokunjaloke uJehu waqeda ukukhonzwa kukaBali koIsrayeli.

29Kodwa kazitshiyanga izono zikaJerobowamu indodana kaNebati ezenza uIsrayeli one, ezokwenza amathole egolide ayeseBetheli lakoDani.1 Kho 12:28–30

30INkosi yathi kuJehu: Ngoba wenze kuhle lokho okulungileyo phambi kwami, wenza endlini kaAhabi okufunwa yinhliziyo yami, amadodana akho azabusa uIsrayeli kuze kube sesizukulwaneni sesine.

31Kodwa uJehu kaqaphelisanga ukuhamba ngomlayo weNkosi, uNkulunkulu kaIsrayeli, ngayo yonke inhliziyo yakhe; kazitshiyanga izono zikaJerobowamu ezenza uIsrayeli one.

32Ngalezonsuku iNkosi uNkulunkulu yaqala ukuphungula ilizwe lakoIsrayeli. UHazayeli wabanqoba abakoIsrayeli kuzo zonke indawo zelizwe labo

33kusukela eJordani kusiya empumalanga, lonke ilizwe laseGileyadi, lakoGadi lakoRubeni lakoManase, kusukela eAroweri eliseduze lesihotsha saseArinoni, kanye leGileyadi leBashani.

34Ezinye indaba zikaJehu, lakho akwenzayo, lobuqhawe bakhe, kulotshiwe ogwalweni lwezindaba zamakhosi akoIsrayeli.

35UJehu waya kwabaphansi, bamngcwabela eSamariya. UJehowahazi indodana yakhe waba yinkosi esikhundleni sakhe.

36UJehu wabusa iminyaka engamatshumi amabili leficaminwembili koIsrayeli eSamariya.