Nani 1 - Ndebele Bible (iBhayibhili Elingcwele) 1978

Ukubalwa kwabakoIsrayeli eSinayi

1INkosi yakhuluma kuMose enkangala yaseSinayi ethenteni lokuhlangana, ngosuku lokuqala lwenyanga yesibili, ngomnyaka wesibili emva kokuphuma kwabo eGibithe, yathi:Nani 26:1–51

2Balani inani lebandla lonke labakoIsrayeli ngensendo zabo langezindlu zaboyise, lilobe amabizo abo bonke abesilisa ngamunye ngamunye.

3Bonke abakoIsrayeli abaleminyaka engamatshumi amabili lengaphezulu, abangaphuma impi, wena loAroni lizakubabala ngamabandla abo.

4Thathani kuleso lalesosizwe indoda eyodwa, eyinhloko yendlu, ilisize.

5Nanka amabizo amadoda azakulisiza.

KoRubeni: uElizuri indodana kaShedewuri.

6KoSimeyoni: uShelumiyeli indodana kaZurishadayi.

7KoJuda: uNashoni indodana kaAminadaba.

8KoIsakari: uNethaneli indodana kaZuwari.

9KoZebuluni: uEliyabi indodana kaHeloni.

10Kubantwana bakaJosefa, koEfrayimi: uElishama indodana kaAmihudi; koManase; uGamaliyeli indodana kaPedazuri.

11KoBenjamini: uAbidani indodana kaGideyoni.

12KoDani: uAhiyezeri indodana kaAmishadayi.

13KoAsheri: uPagiyeli indodana kaOkirani.

14KoGadi: uEliyasafi indodana kaDehuweli.

15KoNafitali: uAhira indodana kaEnani.

16Yibo abakhethwa ebandleni, beyizikhulu zezizwe zabokhokho babo lezinhloko zensendo zabo.

17UMose loAroni basebethatha lawomadoda akhethiweyo.

18Ngosuku lokuqala lwenyanga yesibili bahlanganisa lonke ibandla; abantu batsho ukuthi ngobani okhokho babo ngensendo zabo langezindlu zaboyise; kwabhalwa amabizo abo bonke abaleminyaka engamatshumi amabili lengaphezulu.

19Njengokulaya kweNkosi uMose wababala enkangala yaseSinayi.

20Lapho abantu bakoRubeni, izibulo likaIsrayeli, bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

21inani labo esizweni sakoRubeni lalizinkulungwane ezingamatshumi amane lesithupha, lamakhulu amahlanu.

22Lapho abantu bakoSimeyoni bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi.

23Inani labo esizweni sakoSimeyoni lalizinkulungwane ezingamatshumi amahlanu lesificamunwemunye, lamakhulu amathathu.

24Lapho abantu bakoGadi bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

25inani labo esizweni sakoGadi lalizinkulungwane ezingamatshumi amane lanhlanu, lamakhulu ayisithupha, lamatshumi amahlanu.

26Lapho abantu bakoJuda bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

27inani labo esizweni sakoJuda lalizinkulungwane ezingamatshumi ayisikhombisa lane, lamakhulu ayisithupha.

28Lapho abantu bakoIsakari bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

29inani labo esizweni sakoIsakari lalizinkulungwane ezingamatshumi amahlanu lane, lamakhulu amane.

30Lapho abantu bakoZebuluni bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

31inani labo esizweni sakoZebuluni lalizinkulungwane ezingamatshumi amahlanu lesikhombisa, lamakhulu amane.

32Lapho abantu bakoJosefa, ngitsho abantu bakoEfrayimi, bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

33inani labo esizweni sakoEfrayimi lalizinkulungwane ezingamatshumi amane lamakhulu amahlanu.

34Lapho abantu bakoManase bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

35inani labo esizweni sakoManase lalizinkulungwane ezingamatshumi amathathu lambili, lamakhulu amabili.

36Lapho abantu bakoBenjamini bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

37inani labo esizweni sakoBenjamini lalizinkulungwane ezingamatshumi amathathu lanhlanu, lamakhulu amane.

38Lapho abantu bakoDani bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

39inani labo esizweni sakoDani lalizinkulungwane ezingamatshumi ayisithupha lambili, lamakhulu ayisikhombisa.

40Lapho abantu bakoAsheri bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphuma impi;

41inani labo esizweni sakoAsheri lalizinkulungwane ezingamatshumi amane lanye, lamakhulu amahlanu.

42Lapho abantu bakoNafitali bebalwa ngezizukulwana zabo langensendo zabo langezindlu zaboyise, kwagwalwa wonke amabizo abesilisa abaleminyaka engamatshumi amabili lengaphezulu, abangaphumi impi;

43inani labo esizweni sakoNafitali lalizinkulungwane ezingamatshumi amahlanu lantathu, lamakhulu amane.

44Yibo labo ababalwa nguMose loAroni besizwa yizikhulu zakoIsrayeli ezilitshumi lambili, yileso laleso isikhulu simele isizwe.

45Kwabalwa bonke abakoIsrayeli abaleminyaka engamatshumi amabili lengaphezulu, abangaphuma impi, ngezindlu zaboyise;

46babezinkulungwane ezingamakhulu ayisithupha lantathu, lamakhulu amahlanu, lamatshumi amahlanu.

47Kodwake amaLevi kawabalwanga ngezindlu zabokhokho bawo.

AmaLevi azakukhonza eTabernakeleni

48INkosi yathi kuMose:

49Isizwe sakoLevi ungasibali, futhi ungabali inani laso phakathi kwabantu bakoIsrayeli;

50kodwa abeke amaLevi ukukhonza eTabernakeleni lobufakazi, lokulondoloza yonke impahla yalo lakho konke okwalo. Azathwala iTabernakeli layo yonke impahla yalo, alilondoloze, amise amathente awo ukuze alizingelezele.

51Ekusukeni kweTabernakeli amaLevi azakulidiliza, njalo ekumisweni kwalo amaLevi alimise. Uba kusondela kulo omunye umuntu, uzakubulawa.

52Abantu bakoIsrayeli bazakumisa amathente abo ngamabandla abo, kube yilabo lalabo ezihonqweni zakhe, ngaphansi kophawu lwakhe.

53Kodwa amaLevi azakumisa amathente awo alizingelezele iTabernakeli lobufakazi, ukuba kungehleli ulaka lukaNkulunkulu phezu kwalo lonke ibandla lakoIsrayeli; amaLevi azakulondoloza iTabernakeli.

54Abantu bakoIsrayeli benza njalo njengakho konke iNkosi eyayimlaye khona uMose.