Jobe 16 - Ndebele Bible (iBhayibhili Elingcwele) 1978

Impendulo kaJobe: usola ngokuphathwa kwakhe nguNkulunkulu

1UJobe wasephendula esithi:

2Ngizwile izinto ezinengi ezinje,

lingabaduduzi ababi lina lonke.

3Amazwi okubhuda kawayikuphela na?

Liconulwa yini ukuba liphendule na?

4Lami ngingakhuluma njengani

uba belisendaweni yami;

ngingakhuluma amazwi amanengi ngani,

ngilinikinele ikhanda lami.

5Bengingaliqinisa ngomlomo wami,

ngiliduduze ngamazwi ami, ngipholise ubuhlungu benu.

6Kodwa uba ngikhuluma, ubuhlungu bami kabuthanjiswa,

uba ngiyekela, buphumula kangakanani na?

7UNkulunkulu usengiqede amandla,

uchithile bonke abendlu yami.

8Ungicindezele, lokhu kuyibufakazi ngami,

lokucaka kwami kungivukele,

kuyafakaza ngami phambi kwabantu.

9Ungidlwengule ekuthukutheleni kwakhe, wangizonda.

Ungigedlele amazinyo;

isitha sami singicijisela amehlo.

10Abantu bangikhamisela umlomo wabo,

bangimukula esihlathini, bangihlambaza,

bangihlanganyela.

11UNkulunkulu unginikele ebantwini abangamesabiyo,

wangiphosela ezandleni zabantu ababi.

12Ngangihlala kuhle kodwa, wangichoboza,

wangidumela ngentamo, wangiphahlaza.

Wangimisa ngaba yinto yakhe yokunenjwa,

13imitshoko yakhe iyavelela inxa zonke,

wangihlaba esiswini engelasihawu,

wachithela phansi inyongo yami.

14Wangivodloza ngokungitshaya njalonjalo,

engidumela njengeqhawe.

15Ngathunga isambatho sokulila ngesaka ukuba ngembathe,

ngakhothamela phansi othulini.

16Ubuso bami bubomvu ngokukhala,

lemehlweni ami kulethunzi lokufa;

17loba kungekho isihluku ezandleni zami,

lokukhuleka kwami kulungile.

18Mhlaba, ungaligqibeli igazi lami,

lokukhala kwami kungabi landawo.

19Lakhathesi ufakazi wami usezulwini,

lommeli wami uphezulu.

20Abangane bami bayangiklolodela,

lamehlo ami aphophoza inyembezi kuNkulunkulu.

21Kungathi kungaba khona ongalamula phakathi komuntu loNkulunkulu,

njengaphakathi komuntu lomngane wakhe.

22Ngoba kusele iminyaka elutshwana

ngingakahambi indlela yalapho ngingayikubuya khona.