1 Lan 12 - Ndebele Bible (iBhayibhili Elingcwele) 1978

Abasizi bakaDavida eZiklagi

1Nampa abantu ababeloDavida eZiklagi ngesikhathi ayengavunyelwa ngaso ukuhamba nguSawuli indodana kaKishi; babengabanye bamaqhawe amsiza empini.

2Babengabatshoki bekwazi ukutshoka imitshoko lokujikijela amatshe ngezavutha ngesandla sangasokunene ingabe sangasokhohlo. BabengabakoBenjamini, izihlobo zikaSawuli.

3Induna yabo yayinguAhiyezeri, elandelwa nguJowashi, bobabili bengamadodana kaShemaha waseGibeya; kwakukhona loJeziyeli loPeleti amadodana kaAzimavethi, loBeraka, loJehu waseAnathothi,

4loIshmaya waseGibeyoni, owayeliqhawe phakathi kwabangamatshumi amathathu lomkhokheli wabo, loJeremiya loJahaziyeli loJohanani, loJozabadi waseGedera,

5loEluzayi loJerimothi loBeyaliya loShemariya, loShefathiya waseHarufi,

6loElkana loIshiya loAzareli loJowezeri loJashobeyamu, amaKora,

7loJowela loZebadiya amadodana kaJehoramu waseGedori.

8Abanye bakoGadi baya kuDavida enqabeni enkangala, amadoda angamaqhawe lakwaziyo ukulwa, ayekwazi ukuphatha izihlangu lemikhonto, ayesesabeka njengezilwane, elesiqubu njengamagogo ezintabeni.

9UEzeri wayeyinduna elandelwa nguObadiya, kulandela uEliyabi,

10kulandela uMishimana, kulandela uJeremiya,

11kulandela uAthayi, kulandela uEliyeli,

12kulandela uJohanani, kulandela uElizabadi,

13kulandela uJeremiya, kulandela uMakibanayi.

14Laba abakoGadi babezinduna zempi, abancinyane kibo bephethe ikhulu, labakhulu kibo bephethe inkulungwane.

15Yibo labo abachapha iJordani ngenyanga yokuqala ligcwele liphuphuma, baxotsha labo ababesesigodini ngasempumalanga langasentshonalanga.

16Abanye abantu bakoBenjamini labakoJuda beza kuDavida enqabeni.

17UDavida waphuma ukubahlangabeza, wathi kibo: Uba lisiza kimi njengabangane bami ukuba lingisize mina, ngizimisele ukuhlangana lani; kodwa uba lize ukunginikela ezitheni zami, ngimsulwa, uNkulunkulu wabokhokho kakubone lokho, alijezise.

18Umoya wasesehlela kuAmasayi induna yabangamatshumi amathathu, yena wasesithi:

Singabakho thina, wena Davida,

silawe, wena ndodana kaJese!

Ukuthula, ukuthula kube kuwe,

ukuthula kube kubasizi bakho!

Ngoba uNkulunkulu wakho uyakusiza.

UDavida wasebamukela, wabenza izinduna zamabutho akhe.

19Abanye abantu bakoManase babalekela kuDavida ekufikeni kwakhe lamaFilistiya ukuyakulwa loSawuli. Kodwa kabasizanga, ngoba ababusi bamaFilistiya bacebisana, basebemxotsha besithi: Uyingozi kithi, ngoba uzabalekela enkosini yakhe uSawuli.

20Kwathi lapho esiya eZiklagi, lababantu bakoManase basebebalekela ngakuye, oAdina loJozabadi loJediyayeli loMikhayeli loJozabadi loElihu loZilethayi, izinduna zezinkulungwane koManase.

21Bamsiza uDavida ukulwa lezimpana zabahlaselayo, ngoba bonke babengamaqhawe alamandla, bengabaphathi bempi.

22Insuku ngensuku abantu babesiza kuDavida ukumnceda baze babe yimpi enkulu kakhulu.

Impi kaDavida eHebroni

23Nanku umumo wezigaba zamabutho ayehlomile, eza kuDavida eHebroni ukumthathela umbuso kaSawuli ukuba ube ngowakhe, njengokutsho kwelizwi leNkosi.

24AbakoJuda ababehlomile ngezihlangu lemikhonto babezinkulungwane eziyisithupha lamakhulu aficaminwembili.

25AbakoSimeyoni ababengamaqhawe okulwa babezinkulungwane eziyisikhombisa lekhulu.

26AbakoLevi babezinkulungwane ezine lamakhulu ayisithupha,

27kanye loJehoyada isikhulu sendlu yakoAroni lezinkulungwane ezintathu lamakhulu ayisikhombisa abantu,

28loZadoki ijaha elaliliqhawe, lezinduna ezingamatshumi amabili zosendo lwakibo.

29AbakoBenjamini, izihlobo zikaSawuli, babezinkulungwane ezintathu, ubunengi babo babekade bengabantu abathembekileyo endlini kaSawuli.

30AbakoEfrayimi babezinkulungwane ezingamatshumi amabili lamakhulu aficaminwembili zamaqhawe adumileyo ezindlini zaboyise.

31Ingxenye yesizwe sakoManase yayiyizinkulungwane ezilitshumi lesificaminwembili zabantu ababekhethiwe ukuba beze babeke uDavida abe yinkosi.

32AbakoIsakari abantu ababelokwazi izikhathi ezifanele okungenziwa nguIsrayeli babezinduna ezingamakhulu amabili lezihlobo zabo zonke ezaziphethwe yibo.

33AbakoZebuluni babezinkulungwane ezingamatshumi amahlanu zabantu abafundiswe ukulwa, behlomele impi ngazo zonke izikhali zokulwa ukuba basize uDavida ngenhliziyonye.

34AbakoNafitali babengabantu abayizinkulungwane ezingamatshumi amathathu lesikhombisa behlomile ngezihlangu lemikhonto, belezinduna eziyinkulungwane.

35AbakoDani babengabantu abayizinkulungwane ezingamatshumi amabili lesificaminwembili lamakhulu ayisithupha behlomele ukulwa.

36AbakoAsheri babeyizinkulungwane ezingamatshumi amane zamabutho alungele ukulwa.

37AbakoRubeni labakoGadi lengxenye yesizwe sakoManase ababevela ngaphetsheya kweJordani babezinkulungwane ezilikhulu lamatshumi amabili zabantu abahlomileyo ngazo zonke izikhali zokulwa.

38Wonke lamadoda empi eselungele ukulwa afika eHebroni ezimisele ukubeka uDavida abe yinkosi yabakoIsrayeli bonke; ngokunjalo labo bonke abanye bakoIsrayeli babelengqondonye yokubeka uDavida abe yinkosi.

39Bahlala lapho loDavida insuku ezintathu besidla benatha, ngoba abafowabo babebalungisele.

40Futhi labomakhelwane babo kuze kube koIsakari lakoZebuluni lakoNafitali baletha ukudla ngabobabhemi langamakamela langezimbongolo langezinkabi, impuphu, lezinkwa zomkhiwa, lamahlukuzo ezithelo zevini ezomisiweyo, lewayini, lamafutha, lezinkabi, lezimvu, ngoba kwakukhona ukuthokoza koIsrayeli.