Hubo 116 - Ndebele Bible (iBhayibhili Elingcwele) 1978

Ukubonga kokhululiweyo

1Ngiyayithanda iNkosi,

ngoba iyezwa ilizwi lami lokukhuleka kwami.

2Iyangizwa, ngakhoke ngizakhuleka kuyo

zonke insuku zami.

3Imijibila yokufa yangihanqa,

lobuhlungu bendawo yabafileyo bangibamba;

ngehlelwa yikuhlupheka losizi.

4Ngasengikhuleka ebizweni leNkosi,

ngathi: Nkosi, ngiyakuncenga, silisa ukuphila kwami.

5INkosi ilomusa ilungile;

uNkulunkulu wethu ulesihawu.

6INkosi iyabalondoloza abantukazana;

lapho ngiwiselwa phansi yangisiza.

7Buyela ekuphumuleni kwakho, mphefumulo wami,

ngoba iNkosi ikuphathe ngomusa.

8Ngoba isilise umphefumulo wami ekufeni,

lamehlo ami ezinyembezini, lenyawo zami ekuweni.

9Ngiyahamba phambi kweNkosi

elizweni labaphilayo.

10Ngaqina ekukholweni lanxa ngangisithi:

Ngiyahlupheka kakhulu.

11Ngathi ekwesabeni kwami:

Bonke abantu kabathembeki.

12Ngizakuyinikani iNkosi

ngazo zonke izenzo zayo ezinhle kimi na?

13Ngizakuthatha inkezo yokukhululwa,

ngikhuleke ebizweni leNkosi.

14Ngizakugcwalisa izifungo zami eNkosini

phambi kwabantu bayo bonke.

15Kuligugu emehlweni eNkosi ukufa kwabangcwele bayo.

16Nkosi, ngiyinceku yakho,

ngiyinceku yakho lendodana yencekukazi yakho.

Wena uqamule izibopho zami.

17Ngizakunikela kuwe iminikelo yokubonga,

ngikhuleke ebizweni lakho.

18Ngizakugcwalisa izifungo zami eNkosini

phambi kwabantu bayo bonke,

19emagumeni endlu yeNkosi,

phakathi kwakho, Jerusalema.

Dumisani iNkosi!