Zaga 8 - Ndebele Bible (iBhayibhili Elingcwele) 1978

Ukudunyiswa kokuHlakanipha

1Lalelani! UkuHlakanipha kuyamemeza,

lokuQedisisa kuyezwakalisa ilizwi lakho.

2Kumi emaqaqeni, langasendleleni,

lasekuhlanganeni kwezindlela.

3Kuyamemeza ngasemasangweni omuzi,

ngasentubeni zakhona, kuthi:

4Ngiyalibiza, lina madoda,

ngimemeza kubo bonke abantu.

5Lina elingelalwazi, fundani ukuhlakanipha;

lani zithutha, lifunde ukuqedisisa.

6Zwanini, ngoba ngizakhuluma izinto ezinhle,

emlonyeni wami kuzaphuma okulungileyo;

7ngoba umlomo wami ulandisa iqiniso,

amanga ayisinengiso endebeni zami.

8Wonke amazwi ami alungile,

kalikho lelilodwa elitshilekileyo lelingaqondanga.

9Wonke aqondile kulowo oqedisisayo,

alungile kulowo olokwazi.

10Yamukelani ukufundisa kwami endaweni yesiliva,

lokwazi endaweni yegolide elihle;

11ngoba ukuhlakanipha kungcono kulamatshe amahle,

lakho konke okufisekayo kakulakulinganiswa lakho.

12Mina ngiyikuHlakanipha, ngilokuqedisisa,

ngingafumana ukwazi lengqondo ehlakaniphileyo.

13— Ukwesaba iNkosi kuyikuzonda ububi —

Ngiyakuzonda ukuzigqaja lokuziqakisa, lezindlela ezimbi,

lokukhuluma okukhohlisayo.

14Ngilokweluleka lokuhlakanipha okuqondileyo,

ngilokuqedisisa lamandla.

15Ngami amakhosi ayabusa,

lababusi benza imithetho emihle.

16Ngami izikhulu ziyabusa,

leziphathamandla ziyahlulela umhlaba.

17Ngiyathanda labo abangithandayo,

lalabo abangidingisisayo bayangifumana.

18Kimi kukhona inotho lodumo,

inotho engelakuphela lempumelelo.

19Izithelo zami zingcono kulegolide elihle,

lesivuno sami singcono kulesiliva esihle.

20Ngihamba endleleni yokulunga,

lasemikhondweni yokwahlulela;

21nginothisa labo abangithandayo,

ngigcwalise izindlu zabo ngenotho.

22INkosi yangidala ngaba ngiyikuqala komsebenzi wayo,

ngaphambi kwakho konke eyakwenzayo endulo.

23Ngamiswa kudala, ekuqaleni kwesikhathi,

umhlaba ungakabi khona.

24Kungakabi khona ulwandle ngasengizelwe,

yebo, ingakabi khona imithombo egcwele amanzi.

25Intaba zingakamiswa endaweni zazo,

kungakabi khona lamaqaqa, ngasengizelwe,

26iNkosi ingakawenzi umhlaba leganga,

lenhlabathi yokuqala.

27Lapho imisa iphezulu ngangikhona,

lalapho ibeka umkhathi ngaphezu kolwandle,

28lapho isenza amayezi amanengi phezulu,

lemithombo yamanzi endaweni zayo,

29lapho imisela ulwandle imikhawulo yalo,

ukuze amanzi angeqi ilizwi layo,

lalapho isenza izisekelo zomhlaba,

30ngangilayo ngiyingcitshi yomsebenzi,

ngiyithabisa insuku ngensuku,

ngidlala njalo phambi kwayo,

31ngidlala emhlabeni wayo,

ngithokoza ngabantu.

32Bantwana bami, ngilalelani;

babusisiwe abagcina indlela zami.

33Zwanini ukulaya, lihlakaniphe, lingali.

34Ubusisiwe umuntu ongizwayo,

alinde insuku ngensuku ngasemasangweni ami,

akhangele iminyango yami.

35Ngoba ofumanayo mina, ufumana lokuphila,

azuze umusa eNkosini,

36kodwa ongangifumaniyo uyazilimaza;

bonke abangizondayo bathanda ukufa.