1 Kho 15 - Ndebele Bible (iBhayibhili Elingcwele) 1978

Ukubusa kukaAbijamu

1Ngomnyaka wetshumi lesificaminwembili wokubusa kwenkosi uJerobowamu indodana kaNebati uAbijamu waba yinkosi koJuda.

2Wabusa iminyaka emithathu eJerusalema. Ibizo likanina lalinguMahaka indodakazi kaAbishalomu.

3Wenza zonke izono ezenziwa nguyise ngaphambi kwakhe, lenhliziyo yakhe yayingaphelelanga eNkosini uNkulunkulu wakhe njengenhliziyo kakhokho wakhe uDavida.

4Kodwa ngenxa kaDavida iNkosi uNkulunkulu wakhe yamnika isibane eJerusalema ngokubeka indodana yakhe esikhundleni sakhe langokuqinisa iJerusalema;1 Kho 11:36

5ngoba uDavida wenza okulungileyo phambi kweNkosi, kaphambukanga kukho konke eyamlaya khona insuku zonke zokuphila kwakhe ngaphandle kwendaba kaUriya umHethi.2 Sam 11:1–27

6Kwakukhona impi phakathi kukaAbijamu loJerobowamu zonke insuku zokuhamba kwakhe.2 Lan 13:3–21

7Ezinye indaba zikaAbijamu lakho konke akwenzayo kulotshiwe ogwalweni lwezindaba zamakhosi zakoJuda.

8UAbijamu waya kwabaphansi, bamngcwabela emzini kaDavida. UAsa indodana yakhe waba yinkosi esikhundleni sakhe.

Ukubusa kukaAsa

9Ngomnyaka wamatshumi amabili wokubusa kukaJerobowamu inkosi yakoIsrayeli uAsa waba yinkosi yakoJuda;

10wabusa iminyaka engamatshumi amane lanye eJerusalema. Ibizo likaninakhulu lalinguMahaka indodakazi kaAbishalomu.

11UAsa wenza okulungileyo phambi kweNkosi njengoDavida ukhokho wakhe.

12Waxotsha elizweni amadoda ayengamawule emathempeleni, wasusa zonke izithombe oyise ababezenzile.2 Lan 15:8–15

13Wakhupha loninakhulu uMahaka esikhundleni sokuba yindlovukazi, ngoba wayemenzele unkulunkulukazi uAshera isithombe esinengisayo. UAsa wasigamula isithombe, wasitshisela esifuleni iKidroni.

14Kanti indawo eziphakemeyo zokukhonzela kazivalwanga; kodwa inhliziyo kaAsa yayiqotho eNkosini insuku zakhe zonke.

15Wangenisa ethempelini izinto uyise ayezahlukanisele iNkosi, kanye lezakhe izinto ezahlukaniselwe iNkosi, isiliva legolide lezitsha.

Isivumelwano sikaAsa loBenihadadi

16Kwakukhona impi phakathi kukaAsa loBahasha inkosi yakoIsrayeli zonke insuku zabo.

17UBahasha inkosi yakoIsrayeli wahlasela uJuda, wakha iRama ukuvalela abantu ukuba bangahambelani loAsa inkosi yakoJuda.

18UAsa wasethatha sonke isiliva lalo lonke igolide okwakusele enothweni yethempeli lakweyakhe indlu, wakunika inceku zakhe, wazithuma kuBenihadadi indodana kaTabirimoni kaHeziyoni, inkosi yaseSiriya, owayehlala eDamaseko, wathi:

19Ake senze isivumelwano njengobaba loyihlo; ngiyakuthumela nanso isipho sesiliva legolide. Yephula isivumelwano sakho loBahasha inkosi yakoIsrayeli ukuze asuke kimi.

20UBenihadadi wayilalela inkosi uAsa, wathumela induna zakhe zempi ukuhlasela imizi yakoIsrayeli, zathumba iIjoni leDani leAbeli‐Beti‐Mahaka, lalo lonke iKinerethi lelizwe lonke lakoNafitali.

21Kwathi uBahasha ekuzwa lokhu wayekela ukwakha iRama, wabuyela eTiriza.

22Inkosi uAsa yasisenza isimemezelo kulo lonke lakoJuda, ukuba bonke abantu basuse amatshe eRama kanye lezigodo zalo uBahasha ayesakha ngakho; kakho owavunyelwa ukuba angenzi lokhu. Inkosi uAsa wakha ngakho iGeba elakoBenjamini leMizipa.

23Ezinye indaba zikaAsa lobuqhawe bakhe lakho konke akwenzayo lemizi ayakhayo kulotshiwe ogwalweni lwezindaba zamakhosi akoJuda. Kodwa ebudaleni bakhe wayebulawa zinyawo.

24UAsa waya kwabaphansi, wangcwatshwa kuboyise emzini kaDavida ukhokho wakhe. UJehoshafati indodana yakhe waba yinkosi esikhundleni sakhe.

Ukubusa kukaNadabi

25UNadabi indodana kaJerobowamu waba yinkosi koIsrayeli ngomnyaka wesibili wokubusa kukaAsa inkosi yakoJuda; wabusa koIsrayeli iminyaka emibili.

26Wenza okubi phambi kweNkosi, wahamba ngendlela kayise, wenza izono ezenza uIsrayeli one.

27UBahasha indodana kaAhija, owendlu kaIsakari, wamenzela amacebo, wambulala eGibethoni elamaFilistiya, lapho uNadabi loIsrayeli wonke bevimbezele iGibethoni.

28UBahasha wambulala ngomnyaka wesithathu wokubusa kukaAsa inkosi yakoJuda, wasesiba yinkosi esikhundleni sakhe.

29Kwathi eseyinkosi wahle wabulala bonke abendlu kaJerobowamu, kaze atshiya loyedwa wabo njengelizwi leNkosi uNkulunkulu eyalikhuluma ngenceku yayo uAhija waseShiloni.1 Kho 14:10

30Lokhu kwenzeka ngenxa yezono zikaJerobowamu langenxa yezono enza ngazo uIsrayeli one, ngoba wayithukuthelisa iNkosi, uNkulunkulu kaIsrayeli.

31Ezinye indaba zikaNadabi lakho konke akwenzayo kulotshiwe ogwalweni lwezindaba zamakhosi akoIsrayeli.

32Kwakukhona impi phakathi kukaAsa loBahasha inkosi yakoIsrayeli insuku zabo zonke.

Ukubusa kukaBahasha

33Ngomnyaka wesithathu wokubusa kukaAsa inkosi yakoJuda uBahasha indodana kaAhija waba yinkosi yakoIsrayeli wonke eTiriza; wabusa iminyaka engamatshumi amabili lane.

34Wenza okubi phambi kweNkosi, wahamba ngendlela kaJerobowamu, wenza izono ezenza uIsrayeli one.