Levi 21 - Ndebele Bible (iBhayibhili Elingcwele) 1978

Ubungcwele babapristi

1INkosi yathi kuMose: Khuluma labapristi, amadodana kaAroni, utsho kubo ukuthi kakungabi khona omunye wabo ozingcolisayo ngokungcwaba abakibo abafileyo,

2ngaphandle kwezihlobo zakhe, ngitsho unina, loyise, lendodana yakhe, lendodakazi yakhe, lomfowabo,

3lodadewabo oyintombi emsulwa, ongowomuzi wakhe ngoba engelandoda; angazingcolisa ngenxa yakhe.

4Uba engothetheyo, kangazingcolisi phakathi kwabakibo, abe ngongafanelanga ukukhonza iNkosi.

5Kabayikuphuca amakhanda abo, bangageli indevu zabo, bangazisiki emizimbeni yabo.Levi 19:27–28; Dute 14:1

6Bazakuba ngcwele kuNkulunkulu wabo, bangahlambazi ibizo likaNkulunkulu wabo. Ngoba yibo abanikela eNkosini iminikelo eyenziwe ngomlilo, ukudla kukaNkulunkulu wabo. Ngakho bazakuba ngcwele.

7Kabayikuthatha abesifazana abangcoliswe yikuphinga, loba abafazi abalahlwe ngamadoda abo; ngoba umpristi ungcwele kuNkulunkulu wakhe.

8Mahlukaniseleni iNkosi, ngoba unikela ngokudla kukaNkulunkulu wenu. Uzakuba ngcwele kini, ngoba mina Nkosi engilenza libe ngcwele ngingcwele.

9Indodakazi yompristi, uba izingcolisa ngokuphinga, iyamngcolisa loyise; kayitshiswe ngomlilo.

10Umpristi omkhulu phakathi kwabapristi, okuthelwe ekhanda lakhe amagcobo okugcoba, owahlukaniselwa ukuba embathe izambatho, kayikuvumela ukuba inwele zakhe zithukuluke, angadabuli izambatho zakhe;

11angasondeli esidunjini, angazingcolisi ngenxa kayise loba kanina;

12angaphumi endlini engcwele, angangcolisi indlu engcwele kaNkulunkulu wakhe, ngoba wahlukaniselwe uNkulunkulu ngokugcotshwa ngamagcobo. NgiyiNkosi.

13Angathatha umfazi oseyintombi.

14Kodwa umfelwakazi, lowehlukene lendoda yakhe, lowesifazana ongcolisiweyo, lesifebe, kangabathathi. Kodwa kathathe intombi eyabantu bakibo,

15ukuba angangcolisi abantwana bakhe phakathi kwabakibo. NgiyiNkosi engimenzayo ukuba abe ngcwele.

16INkosi yathi kuMose:

17Tshono kuAroni uthi: Kakho owenzalo yakho ezizukulwaneni olesici ongasondela ukunikela ngokudla kukaNkulunkulu wakhe.

18Isibili umuntu olesici angasondeli, oyisiphofu, loyisiqhuli, lozicabileyo ebusweni, lolezitho ezingalinganiyo,

19lolonyawo olwephukileyo, lolesandla esephukileyo,

20logogekileyo, longumuthwa, lolomntwana elihlweni lakhe, lolentembuzane, loloqweqwe olulumayo, loba olimeleyo emasendeni.

21Umuntu owenzalo kaAroni umpristi olesici angasondeli ukunikela iminikelo eyenzelwe iNkosi ngomlilo; ngoba elesici, angasondeli ukunikela ngokudla kukaNkulunkulu wakhe.

22Kuvunyelwa ukuba adle ukudla kukaNkulunkulu wakhe, lokho okungcwele lalokho okungcwele kakhulu,

23kodwa angasondeli kulo iveli lakulo ialtare, lokhu elesici, ukuze angangcolisi izindlu zami ezingcwele. NgiyiNkosi ebenzayo ukuba babe ngcwele.

24Ngalokho uMose wakhuluma loAroni, lamadodana akhe, labantu bonke bakoIsrayeli.