1 KwabaseTesalonika 2 - Ndebele Bible (iBhayibhili Elingcwele) 1978

UPawuli ubakhumbuza ngomsebenzi wakhe phakathi kwabo

1Liyazi lani, bazalwane, ukuthi ukufika kwethu kini kakubanga yize.

2Kodwa lanxa sasihluphekile kuqala saphathwa kubi eFiliphi, njengoba lisazi lani, saba lesibindi kuNkulunkulu sokulitshumayeza ivangeli likaNkulunkulu phakathi kobunzima obukhulu.Seb 16:19–24; 17:1–9

3Ilizwi lethu kayisilo elokuduha lelokungcola lelobuqili,

4kodwa njengoba sivunyiwe nguNkulunkulu ukuba siphathiswe ivangeli, siyakhulumake, singenzeli ukuthokozisa abantu kodwa ukuthokozisa uNkulunkulu ohlolayo inhliziyo zethu.

5Kasizanga sisebenzise amazwi okulalisa ngolimi, njengoba lani lisazi; kasizanga futhi siwasebenzise ukufihla ubuhwaba ngawo, njengoba uNkulunkulu engufakazi.

6Kasifunanga udumo ebantwini, oluvela kini ingabe kwabanye,

7loba sasingaba lamandla okulufuna njengoba singabaphostoli bakaKristu. Kodwa saba mnene phakathi kwenu njengomdlezane esondla abantwana bakhe.

8Njengoba besilithanda kangaka, safisa ukulinika kungesilo ivangeli likaNkulunkulu kuphela, kodwa lokusila kwethu uqobo, ngoba laselingabathandekayo kithi.

9Liyakhumbula, bazalwane, ukusebenza lokutshikatshikeka kwethu, sisebenza ubusuku lemini, ukuze singabi ngumthwalo lakoyedwa wenu, lapho silitshumayeza ivangeli likaNkulunkulu.

10Lina lingofakazi kanye loNkulunkulu, bokuthi sahlala kanjani phakathi kwenu lina elikholwayo ukuthi ukuhlala kwethu kwakungobungcwele, langokulunga, langokungasoleki,

11njengokuba lisazi ukuthi saliphatha ngamunye njengoyise ephatha abantwana bakhe;

12sililaya, silimisa isibindi, silitshela ukuba lihambe ngokufaneleyo phambi kukaNkulunkulu olibizela embusweni lebukhosini bakhe.

UPawuli ulandisa ngenhlupheko zabo

13Ngalokho kasiyekeli ukumbonga uNkulunkulu, ukuthi kuthe lapho lilamukela ilizwi likaNkulunkulu elalizwa ngathi, kalilamukelanga njengelizwi labantu kuphela kodwa njengelizwi likaNkulunkulu, njengoba liyilo isibili lona elisebenzayo phakathi kwenu lina elikholwayo.

14Ngoba lina, bazalwane, lafana lamabandla kaNkulunkulu akuKristu Jesu, wona aseJudiya; ngoba lani lahlutshwa ngabesizwe sakini njengalokhu lawo ahlutshwa ngabaJudaSeb 17:5

15ababulala leNkosi uJesu labaprofethi, basixotsha lathi. Kabamthokozisi uNkulunkulu, bamelana labantu bonke,Seb 9:23, 29; 13:45, 50; 14:2, 5, 19; 17:5, 13; 18:12

16besivimbela ukutshumayeza abezizwe ukuba basiliswe. Bayakwenza lokhu ukuze bagcwalise ubunengi bezono zabo; kodwa ulaka lukaNkulunkulu selufinyelele phezu kwabo.

Uthando lukaPawuli kwabaseTesalonika

17Kodwa thina, bazalwane, lokhu sahlukaniswe lani isikhatshana nje, singabonani ngamehlo kodwa sibonana ngenhliziyo, kung’khona sifisa kakhulu ukubonana lani siyalilangatha.

18Ngakhoke besithanda ukufika kini, ikakhulu mina Pawuli, kodwa uSathane wasivimbela.

19Ngoba liyini ithemba lethu, lokuthokoza, lomqhele wokuzincoma kwethu phambi kweNkosi yethu uJesu ekufikeni kwayo? Angithi yini na?

20Yini eliludumo lwethu lokuthokoza kwethu.