uEzra 10 - Ndebele Bible (iBhayibhili Elingcwele) 1978

Abesifazana labantwana babezizwe bayalahlwa

1UEzra esakhuleka evuma izono, ekhala eziwisela phansi phambi kwendlu kaNkulunkulu, ixuku elikhulu labantu abesilisa labesifazana labantwana babuthana kuye, livela kuye wonke uIsrayeli, ngoba abantu bakhala kakhulu.

2UShekaniya indodana kaJehiyeli owamadodana kaElamu wakhuluma loEzra wathi: Sonile kuNkulunkulu wethu, sazithathela abafazi bezizweni ebantwini balelilizwe; kodwa lakhathesi kusekhona ithemba koIsrayeli phezu kwakho konke lokhu.

3Ngakhoke asenze isivumelwano loNkulunkulu wethu ukuba silahle bonke lababafazi labantwana babo ngeseluleko senkosi yami langesalabo abawesabayo umlayo kaNkulunkulu wethu; kwenziwe njengokutsho komlayo.

4Vukake, kungumsebenzi wakho, lathi sizakukusekela. Woba lesibindi, uwenze.

5Wasevukake uEzra, wabafungisa abapristi abayizikhulu lamaLevi laye wonke uIsrayeli ukuba benze lokhu okutshiwoyo. Bafungake.

6UEzra wasesuka phambi kwendlu kaNkulunkulu, waya endlini kaJehohanani indodana kaEliyashibi lapho ayalala khona; kadlanga kudla, kanathanga manzi, ngoba wayelilela ububi babathunjiweyo abasebebuyile.

7Kwamenyezelwa kulo lonke lakoJuda laseJerusalema kubo bonke abasebebuyile ekuthunjweni ukuba babuthane eJerusalema,

8lokuthi ongafikanga ngensuku ezintathu uzathathelwa impahla yakhe yonke, akhutshwe ebandleni labathunjiweyo abasebebuyile, ngesimiso sezinduna labadala.

9Bonke abantu bakoJuda labakoBenjamini babuthana eJerusalema ngensuku ezintathu; kwathi mhla wosuku lwamatshumi amabili lwenyanga yesificamunwemunye abantu bonke bahlala egumeni elingaphambi kwendlu kaNkulunkulu beqhaqhazela ngenxa yalindaba langenxa yezulu elikhulu elalisina.

10UEzra umpristi wasukuma wathi kibo: Lonile ngokuthatha abafazi bezizweni, landisa ukona kukaIsrayeli.

11Ngakhoke vumani isono senu eNkosini uNkulunkulu wabokhokho benu, lenze intando yayo; zahlukaniseni labantu balelilizwe, lilahle abafazi bezizweni.

12Kwathi lonke ibandla laphendula ngelizwi elikhulu lathi: Kulungile, sizakwenza lokho okutshoyo.

13Kodwa abantu banengi, futhi lezulu liyana kakhulu, singeme egcekeni. Futhi lumsebenzi kawusiwo wosuku olulodwa kumbe owensuku ezimbili, ngoba sonile kakhulu ngalindaba.

14Izinduna zethu kazimele ibandla lonke, kuthi bonke abasemizini yethu abathatha abafazi bezizweni beze ngezikhathi ezimisiweyo yilowo lalowo elabadala labahluleli bomuzi wakibo, luze ludede ulaka olukhulu lukaNkulunkulu wethu mayelana lalindaba.

15Kwaba ngoJonathani indodana kaAsaheli loJahizeya indodana kaTikiva kuphela abaphikisana lalokho; oMeshulamu loShabethayi umLevi babasekela.

16Abantu abasebebuyile ekuthunjweni benza njaloke. UEzra umpristi wakhetha amadoda ayeyizinhloko zezindlu ukuba bamele izindlu, ebabiza ngamabizo. Ngosuku lokuqala lwenyanga yetshumi lawomadoda ayihlalela phansi lindaba.

17Kwathi ngosuku lokuqala lwenyanga yokuqala basebebaqedile bonke abantu ababethethe abafazi bezizweni.

18Phakathi kwamadodana abapristi ayethethe abafazi bezizweni kwakungoMahaseya loEliyezeri loJaribi loGedaliya, emadodaneni kaJeshuwa indodana kaJozadaki labafowabo.

19Bafunga ukulahla abafazi babo, bathatha inqama, banikela ngayo ukuba ibe ngumnikelo wesono sabo.

20Emadodaneni kaImeri kwakungoHanani loZebadiya.

21Emadodaneni kaHarimi kwakungoMahaseya loElija loShemaya loJehiyeli loUziya.

22Emadodaneni kaPashuri kwakungoEliyowenayi loMahaseya loIshmayeli loNethaneli loJozabadi loElasa.

23KumaLevi kwakungoJozabadi loShimeyi, loKelaya othiwa nguKelita, loPethahiya loJuda loEliyezeri.

24Kubahlabeleli kwakunguEliyashibi; kubalindi bamasango kwakungoShaluma loTelema loUri.

25KwabakoIsrayeli emadodaneni kaParoshi kwakungoRamiya loIziya loMalikiya loMijamini loEleyazare loMalikiya loBenaya.

26Emadodaneni kaElamu kwakungoMathaniya loZekariya loJehiyeli loAbidi loJeremothi loElija.

27Emadodaneni kaZathu kwakungoEliyowenayi loEliyashibi loMathaniya loJeremothi loZabadi loAziza.

28Emadodaneni kaBebayi kwakungoJehohanani loHananiya loZabayi loAthilayi.

29Emadodaneni kaBani kwakungoMeshulamu loMaluki loAdaya loJashubi loSheyali loJeremothi.

30Emadodaneni kaPahathi‐Mowabi kwakungoAdina loKelali loBenaya loMahaseya loMathaniya loBezaleli loBinuwi loManase.

31Emadodaneni kaHarimi kwakungoEliyezeri loIshiya loMalikiya loShemaya loShimeyoni

32loBenjamini loMaluki loShemariya.

33Emadodaneni kaHashuma kwakungoMathenayi loMathatha loZabadi loElifeleti loJeremayi loManase loShimeyi.

34Emadodaneni kaBani kwakungoMahadayi loAmramu loUweli

35loBenaya loBedaya loKeluhi

36loVaniya loMeremothi loEliyashibi

37loMathaniya loMathenayi loJahasu.

38Emadodaneni kaBinuwi kwakungoShimeyi

39loShelemiya loNathani loAdaya

40loMakinadebayi loShashayi loSharayi

41loAzareli loShelemiya loShemariya

42loShaluma loAmariya loJosefa.

43Emadodaneni kaNebo kwakungoJeyiyeli loMathithiya loZabadi loZebina loJadayi loJoweli loBenaya.

44Bonke laba babethethe abafazi bezizweni, babalahla kanye labantwana babo.