Zaga 20 - Ndebele Bible (iBhayibhili Elingcwele) 1978

1Iwayini lenza umuntu adelele, lotshwala bumenze axabane labantu;

obumdakayo kahlakaniphanga.

2Ukusonga kwenkosi kunjengokubhonga kwesilwane;

oyithukuthelisayo uyazibhubhisa.

3Nxa umuntu ezigcina enkanini uyazizuzela udumo;

kodwa zonke izithutha zithanda ukuxabana.

4Ivila elingalimiyo ngesikhathi sokulima,

lizaswela isivuno lingabi lalutho.

5Amacebo asengqondweni yomuntu anjengamanzi azikileyo,

kodwa oqedisisayo angawakhupha.

6Banengi abathi bathembekile,

kodwa umuntu othembekileyo angafunyanwa na?

7Nxa umuntu engolungileyo ngokuqotho,

babusisiwe abantwana bakhe.

8Inkosi ehlezi esihlalweni sokuthonisisa

iyabona bonke ububi ukuba ibuhlakaze.

9Ngubani ongatsho ukuthi: Ngihlambulule inhliziyo yami,

sengihlambulukile ezonweni zami?

10Izilinganiso ezingalunganga lesikali esingalunganga,

zonke lezi ziyazondeka eNkosini.

11Lomntwana uyaziwa ngezenzo zakhe,

loba zilungile ziqotho.

12INkosi yenzile indlebe ezwayo lamehlo abonayo.

13Ungathandi ubuthongo, funa wehlelwe yibuyanga;

vuka ukhuthale, uzakuba lokudla okunengi.

14Othengayo uthi: Lokhu kuyadula;

kodwa abesehamba ezincoma ngokuthenga kwakhe.

15Kukhona igolide lamatshe amahle amanengi,

kodwa amazwi okwazi aligugu ukwedlula lokho.

16Thatha isigqoko somuntu othembise ukusiza owemzini,

sibe yisibambiso sowezizwe.

17Ukudla okuzuzwa ngenkohliso kumnandi emuntwini,

kodwa emva kwesikhathi kunjengetshebetshebe emlonyeni wakhe.

18Amacebo enziwa ngezeluleko,

lezimpi zilwiwa ngamaqhinga.

19Onyeyayo uhlakaza imfihlakalo;

ungahlangani lomuntu ophophothayo.

20Uba umuntu ethuka uyise loba unina,

ukukhanya kwakhe kuzakucitshwa.

21Ungazuza imfuyo ngokuphangisa ekuqaleni,

kayiyikuletha izibusiso ekucineni.

22Ungathi uzaphindisela okubi ngokubi;

themba iNkosi, izakukusiza.

23Izilinganiso ezingalunganga ziyazondwa yiNkosi,

lesikali esikhohlisayo kasilunganga.

24Ukuhamba komuntu kulungiswa yiNkosi;

pho, umuntu angaqedisisa kanjani indlela yakhe na?

25Kuyingozi ukuba umuntu anikele isiphiwo ngokungananzeleli,

lokuba afunge izifungo, abesezisola ngalokho.

26Umbusi ohlakaniphileyo uhlakaza ababi,

uphindisele phezu kwabo ububi babo.

27INkosi ikhanyisa emphefumulweni womuntu,

ihlolisisa konke okungaphakathi kwakhe.

28Umusa lokuthembeka kuyamgcina umbusi,

umbuso wakhe usekelwa ngokulunga.

29Udumo lwamajaha lusemandleni awo,

ukuhlonitshwa kwabadala kusezimvini zamakhanda abo.

30Ukutshaywa okubuhlungu kususa okubi,

lemivimvinya ihlambulula inhliziyo yomuntu.