Isa 3 - Ndebele Bible (iBhayibhili Elingcwele) 1978

Ukwahlulelwa kweJerusalema loJuda

1Khangela, iNkosi uNkulunkulu wamabandla iyasusa eJerusalema lakoJuda konke okusizayo,

konke ukudla lawo wonke amanzi,

2isusa amaqhawe lamabutho,

labahluleli labaprofethi labalumbi labadala,

3izinduna zamatshumi amahlanu, labantu abadumileyo, labaluleki,

lezanuse ezihlakaniphileyo, labazi amalumbo.

4Ngizabanika abafana babe yizikhulu zabo,

bazabusa bengabantwana nje.

5Abantu bazakucindezelana,

kube yilowo lalowo umngane wakhe,

lalowo lalowo umakhelwana wakhe;

abatsha bazakudelela abadala,

labadelelekileyo badelele abalodumo.

6Lapho umuntu ezakubamba umfowabo endlini kayise athi:

Wena ulengubo, woba ngumbusi wethu kulesisikhathi sokuhlupheka;

7umfowabo uzaphendula athi: Kangiyikuba ngumsizi,

ngoba endlini yami kakulakudla lengubo;

kaliyikungenza ngibe ngumbusi wabantu.

8IJerusalema ikhubekile, loJuda uwile,

lokhu ukukhuluma kwabo lokwenza kwabo kuphambene leNkosi,

ukudelela ubukhosi bayo.

9Ukubandlulula kwabo kuyafakaza ngabo;

benza izono zabo obala njengeSodoma, kabazifihli.

Maye kibo! Ngoba bazehlisela okubi.

10Tshelani abalungileyo ukuthi kuzakuba kuhle kubo,

ngoba bazakudla umvuzo wezenzo zabo.

11Maye komubi! Kuzakuba kubi kuye,

ngoba lokho okwenziwe ngezandla zakhe kuzakwenziwa lakuye.

12Abebolekisi bemali bacindezela abantu bami,

abanika izikwelede bayabakhohlisa.

Lina bantu bami, abakhokheli benu bayaliduhisa,

baphambanisa indlela zenu.

13INkosi isilungele ukwahlulela,

izakusuka yahlulele abantu bayo.

14INkosi iyakwahlulela abadala lezikhulu zabantu bayo.

Ithi: Yini elidle izivini,

elikuphange kubayanga kusezindlini zenu.

15Libachobozelani abantu bami ngokucindezela abangabayanga na?

kutsho iNkosi uNkulunkulu wamabandla.

Ukuthonisiswa kwabesifazana baseZiyone

16INkosi yathi: Ngoba abesifazana baseZiyone beziphakamisile, belule intamo, behuga ngamehlo abo, behamba ngokuxoxomela bekhencezisa izigqizo enyaweni zabo,

17iNkosi izaphuca amakhanda abo, izakubanqunulisa.

18Ngalolosuku iNkosi izasusa iziceco zabo, lezigqizo, lezicwatsho,

19lamacici lamasongo, lezimbombozo,

20lamaqhiye lezigetsho, lamabhanti, lemifuma, lezintebe,

21lezindandatho lamacici amakhulu,

22lezigqoko zemikhosi, lezingubo, lezambatho, lezamba,

23lezibuko, lezigqoko ezinhle, lamaqhele, lamaveli.

24Kuzakuthi endaweni yamakha kube khona ukubola,

endaweni yebhanti kube khona igoda,

lendaweni yenwele ezilungiswe kuhle kube khona impabanga,

lendaweni yezigqoko ezinhle kube khona amadabudabu,

lendaweni yobuhle kube khona ukuyangeka.

25Amadoda akini azaqedwa ngomkhonto,

lamaqhawe akini aphelele empini.

26Emasangweni eZiyone kuzakuba khona ukukhala lokulila,

lona lizakuba njengowesifazana ohlezi phansi eze.