Dute 3 - Ndebele Bible (iBhayibhili Elingcwele) 1978

Inkulumo kaMose isaqhubeka

1Sasesiphenduka sihamba ngendlela eya eBashani. UOgi inkosi yaseBashani waphuma kanye labo bonke abantu bakhe, wasihlasela eEdreyi.

2Kodwa iNkosi uNkulunkulu yathi kimi: Ungamesabi, ngoba ngizamnikela yena labantu bakhe bonke lelizwe lakhe esandleni sakho; uzakwenza kuye njengokwenza kwakho kuSihoni inkosi yamaAmori owayehlala eHeshiboni.

3Ngakhoke iNkosi uNkulunkulu wethu yamnikela ezandleni zethu loOgi inkosi yaseBashani kanye labo bonke abantu bakhe; sababulala, kakwaze kwasala muntu.

4Sasesithatha yonke imizi yakhe; kasaze satshiya lowodwa; sathatha imizi engamatshumi ayisithupha lalo lonke ilizwe laseArigobi, umbuso kaOgi eBashani.

5Yonke imizi le yayibiyelwe ngemithangala ephakemeyo ilamasango lemigoqo; sathatha futhi lemizana eminengi engabiyelwanga ngemithangala.

6Sayichitha sayiqeda, njengokwenza kwethu kuSihoni inkosi yaseHeshiboni, sachitha yonke imizi, sabulala labantu abesilisa labesifazana labantwana.

7Kodwa sathatha zonke inkomo kanye lempahla yemizi, kwaba yimpango yethu.

8Ngalesosikhathi sawathathela amakhosi amabili amaAmori ayehlala ngaphetsheya kweJordani, ilizwe elisukela esihotsheni saseArinoni kwaze kwafika entabeni yaseHermoni.

9— IHermoni amaSidoni ayibiza ngokuthi yiSiriyoni, lamaAmori athi yiSeniri. —

10Sathatha yonke imizi yasemagcekeni kanye lalo lonke iGileyadi leBashani, kwaze kwafika eSaleka leEdreyi, imizi yombuso kaOgi eBashani.

11— Ngoba amaRefa ayesele kwasekunguOgi kuphela; umbheda wakhe wawungowensimbi; usekhona eRaba kumaAmoni. Ubude bawo babuzingalo ezificamunwemunye, lobubanzi bawo babuzingalo ezine, ngokwengalo yomuntu. —

12Ekuthumbeni kwethu lizwe ngalesosikhathi abakoRubeni labakoGadi ngabanika ilizwe elisukela eAroweri, eliseduze lesihotsha saseArinoni, kanye lengxenye yezintaba zaseGileyadi lemizi yalo.

13Ingxenye yeGileyadi eseleyo lalo lonke iBashani, umbuso kaOgi, ngitsho lonke ilizwe laseArigobi, ngakunika ingxenye yesizwe sakoManase. — Lonke iBashani kuthiwa yilizwe lamaRefa.

14UJayiri umntakaManase wathatha lonke ilizwe laseArigobi, ngitsho iBashani, kuze kube semngceleni wamaGeshuri lowamaMahakathi; wayibiza imizi ngebizo lakhe wathi yiHavothi‐Jayiri, kuze kube lamuhla.

15Ngamnika uMakiri iGileyadi.

16Ngabanika abakoRubeni labakoGadi ilizwe elisukela eGileyadi lize lifike esihotsheni saseArinoni, umngcele walo uphakathi kwesihotsha, lize lifike njalo emfuleni iJaboki, ongumngcele wamaAmoni.

17Ngabanika leAraba, umngcele walo waba yiJordani, kusukela eKinerethi kuze kufike olwandle lwase Araba, oluluLwandle lweTshwayi, ngaphansi kwamawa asePisiga ngasempumalanga.

18Ngalilaya ngalesosikhathi ngathi: INkosi uNkulunkulu wenu ilinikile lelilizwe libe ngelenu. Wonke amaqhawe enu azawela ehlomile phambi kwabafowenu, abantu bakoIsrayeli.Josh 1:12–15

19Kodwa omkenu labantwana benu lezinkomo zenu — ngiyazi ukuthi lilenkomo ezinengi — kuzakusala emizini engilinike yona,

20iNkosi ize ibanike ukuphumula abafowenu njengani, labo bakhe elizweni elingaphetsheya kweJordani, iNkosi uNkulunkulu wenu ebapha lona, andubana libuyele lonke elizweni lenu engilinike lona.

21Ngamlaya uJoshuwa ngalesosikhathi ngathi: Usukubonile konke iNkosi uNkulunkulu wakho ekwenze kulawomakhosi amabili; izakwenza njalo kuyo yonke imibuso ozakudabula phakathi kwayo.

22Lingabesabi, ngoba iNkosi uNkulunkulu wenu uqobo izalilwela.

23Ngayincenga iNkosi ngalesosikhathi ngathi:Nani 27:12–14; Dute 32:48–52

24Nkosi Nkulunkulu, usuqalile ukutshengisa inceku yakho ubukhulu bakho lesandla sakho esilamandla; ngoba nguwuphi unkulunkulu ezulwini lasemhlabeni ongenza imisebenzi enjengeyakho, lezenzo ezinkulu ezinjengezakho na?

25Ungivumele ukuba ngichaphe, ngibone ilizwe elihle elingaphetsheya kweJordani, lezontaba ezinhle, leLebanoni.

26Kodwa iNkosi yangithukuthelela ngenxa yenu, kayingizwanga; yathi kimi: Kwanele; ungabe usakhuluma lami ngalindaba.

27Khwela engqongeni yePisiga, uphakamisele amehlo akho ngasentshonalanga langasenyakatho langaseningizimu langasempumalanga, ulikhangele ilizwe; ngoba kawusoze ulichaphe iJordani leli.

28Kodwa laya uJoshuwa, umkhuthaze, umqinise; ngoba yena uzakuwela phambi kwalababantu, abanike ilizwe olibonayo libe yilifa labo.

29Sasesihlala esigodini maqondana leBeti‐Peyori.