Jer 29 - Ndebele Bible (iBhayibhili Elingcwele) 1978

Incwadi kaJeremiya kwabathunjelwe eBabiloni

1Nanka amazwi encwadi ayithumelayo uJeremiya umprofethi eseJerusalema kwabadala babathunjiweyo, lakubapristi labaprofethi, labantu bonke ayebathumbile uNebukadineza eJerusalema, wabasa eBabiloni.2 Kho 24:12–16; 2 Lan 36:10

2Kwakungemva kokuba sebesukile eJerusalema, inkosi uJekoniya, lonina, labathenwa, lezikhulu zakoJuda lezeJerusalema, lezingcitshi zemisebenzi, kanye labakhandi.

3Incwadi yasiwa nguElasa indodana kaShafani, loGemariya indodana kaHilikiya, ababethunywe nguZedekiya, inkosi yakoJuda, eBabiloni kuNebukadineza inkosi yaseBabiloni. Yathi:

4INkosi yamabandla, uNkulunkulu kaIsrayeli, ithi kibo bonke abathunjwe eJerusalema basiwa eBabiloni:

5Yakhani izindlu, lihlale kizo, lilime amasimu, lidle izithelo zawo;

6lithathe abafazi, lizale amadodana lamadodakazi, lithathele amadodana enu abafazi, lendise amadodakazi enu, ukuze azale amadodana lamadodakazi, lande lina, linganciphi.

7Sebenzelani ukuthula komuzi lapho ngilithumbele khona, liwukhulekele eNkosini, ngoba ekuthuleni kwawo lizakuba lokuthula lani.

8INkosi yamabandla, uNkulunkulu kaIsrayeli, ithi: Lingavumeli abaprofethi benu labalumbi benu abakhona phakathi kwenu balikhohlise, lingawalaleli amaphupho abawaphuphayo;

9ngoba batshumayela amanga kini ngebizo lami; kangibathumanga, kutsho iNkosi.

10INkosi ithi: Lapho iminyaka engamatshumi ayisikhombisa isiphelile eBabiloni, ngizalihambela, ngigcwalise isithembiso sami, ngilibuyise kulindawo.2 Lan 36:21; Jer 25:11; Dan 9:2

11Ngoba ngiyazi mina imicabango engiyicabanga ngani, kutsho iNkosi; yimicabango yokuthula, kayisiyo eyokubi, ukuba ngilinike isikhathi esizayo esilethemba.

12Lizakungibiza, lize, likhuleke kimi, ngilizwe.

13Lizakungidinga, lingifumane; lapho lingifunisisa ngayo yonke inhliziyo yenu,Dute 4:29

14lizangifumana, kutsho iNkosi, ngilibuyise ekuthunjweni kwenu, ngiliqoqe kuzo zonke izizwe lakuzo zonke indawo lapho ngilixotshele khona, ngilibuyise endaweni engalithumba kuyo.

15Litshilo ukuthi: INkosi uNkulunkulu isivusele abaprofethi eBabiloni.

16INkosi uNkulunkulu ikhuluma mayelana lenkosi ehlezi esihlalweni sobukhosi sikaDavida, langabo bonke abantu abahlala kulumuzi, abafowenu abangathunjwanga kanye lani;

17ithi: Khangelani, ngiyathuma kibo impi lendlala lomkhuhlane, ngibenze babe njengomkhiwa omubi kakhulu ongadlekiyo ngenxa yobubi bawo.

18Ngizaxotshana labo ngempi langendlala langomkhuhlane, ngibenze babe yinto eyesabekayo kuyo yonke imibuso yomhlaba, babe yisiqalekiso, lesimangaliso, lento yokuncifelwa, lehlazo, phakathi kwazo zonke izizwe lapho ngibaxotshele khona;

19ngoba bengawalalelanga amazwi ami engawathuma kibo ngezinceku zami abaprofethi, ngiwathuma njalonjalo, kodwa kabalalelanga, kutsho iNkosi.

20Zwanini ilizwi leNkosi, lina lonke bathunjiweyo, engabasusa eJerusalema ngabasa eBabiloni.

21INkosi yamabandla uNkulunkulu kaIsrayeli, ithi mayelana loAhabi indodana kaKolaya, loZedekiya indodana kaMahaseya, abatshumayela amanga ngebizo lami: Khangelani, ngizabanikela esandleni sikaNebukadineza inkosi yaseBabiloni, ozababulala phambi kwenu.

22Ngenxa yabo, lamazwi azasetshenziswa kibo bonke abathunjiweyo koJuda abaseBabiloni, abe yisiqalekiso okuthi: INkosi ikwenze ube njengoZedekiya loAhabi, abosiwa yinkosi yaseBabiloni ngomlilo;

23ngoba benze ubuthutha koIsrayeli, bafeba labafazi bomakhelwana babo, baqamba amanga ngebizo lami, into engingabalayanga yona. Yimi engaziyo, ngingufakazi, kutsho iNkosi.

24Uzakutsho kuShemaya waseNehelamu uthi:

25INkosi yamabandla, uNkulunkulu kaIsrayeli, ithi: Uthumele izincwadi ngebizo lakho kubo bonke abantu abaseJerusalema, lakuZefaniya indodana kaMahaseya umpristi, lakubo bonke abapristi, usithi:

26INkosi isikumisile ukuba ube ngumpristi esikhundleni sikaJehoyada umpristi, ukuba ulondoloze ithempeli; uba kukhona umuntu ohlanyayo ozitshaya umprofethi, uzakumfaka esitokisini, umbophe ngeketane.

27Phoke, uyekeleleni ukumkhuza uJeremiya waseAnathothi olitshumayezayo na?

28Ngoba usethumile ilizwi kithi eBabiloni esithi: Ukuthunjwa kwenu kuzakuba ngokwesikhathi eside; ngakho yakhani izindlu, lihlale kizo, lilime amasimu, lidle izithelo zawo.

29UZefaniya umpristi wayifunda lincwadi, uJeremiya umprofethi esizwa.

30Laselifika ilizwi leNkosi kuJeremiya lisithi:

31Thumela ilizwi kubo bonke abathunjiweyo uthi: INkosi ithi ngoShemaya waseNehelamu: Njengoba uShemaya etshumayele kini ngingamthumanga mina, walenza ukuba lithembe ize,

32ngakho ngizamtshaya yena kanye lenzalo yakhe; kakuyikuba lamuntu wakwakhe ozasala phakathi kwalababantu abone okuhle engizakukwenzela abantu bami, ngoba ukhulumile ukuhlamuka kimi, kutsho iNkosi.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help