2 Kor 11 - Ndebele Bible (iBhayibhili Elingcwele) 1978

Ukuziphendulela kukaPawuli ngomsebenzi wakhe

1Kungathi lingangibekezelela ebuthutheni obuyingcosana, yebo, ngibekezelelani.

2Ngilobukhwele ngani ngobukhwele obungobukaNkulunkulu, ngoba ngalendisela kuKristu ukuba ngilise endodeni eyodwa liyintombi emsulwa.

3Kodwa ngilovalo lokuthi njengalokhu inyoka yamkhohlisa uEva ngobuqili bayo, ngokunjalo imicabango yenu mhlawumbe ingaduhiswa, iyekele ukuthembeka okuqotho kuKristu.Gen 3:1–5, 13

4Ngoba uba kufika umuntu etshumayela omunye uJesu esingamtshumayelanga thina, loba lisamukela omunye umoya elingamamukelanga, loba elinye ivangeli elingalamukelanga, lilokubekezela okukhulu.

5Ngithi kangisileli ngalutho kulabo abaphostoli abakhulu.

6Loba ngingesiso isikhulumi, kangisweli ukwazi; sikubonakalisile lokho kini ngendlela zonke ezintweni zonke.

7Kambe ngona yini ngokutshumayela ivangeli ngesihle kini, ngizithoba ukuba liphakanyiswe lina na?

8Ngaphanga amanye amabandla, ngisamukela iholo kuwo, ukuze ngilisize lina.

9Lalapho ngangikhona kini ngiswele, kangibanga ngumthwalo emuntwini, ngoba abazalwane abavela eMakedoniya bathwala inswelo zami. Kukho konke ngazimisela ukuba ngingabi ngumthwalo kini, futhi ngisezakuzimisela.Fil 4:15–18

10Njengalokhu iqiniso likaKristu likimi, kangiyikukwamukwa muntu lokhukuzincoma kwami endaweni zaseAkaya.

11Kungani na? Kungoba ngingalithandi na? UNkulunkulu uyazi ukuthi ngiyalithanda.

12Engikwenzayo ngizakukwenza futhi, ukuze ngibathathele ithuba labo abafuna ithuba lokuba bafunyanwe belingana lathi kulokho abazincoma ngakho.

13Ngakho abanje bangabaphostoli bamanga, izisebenzi ezikhohlisayo ezizitshaya abaphostoli bakaKristu.

14Kakumangalisi lokhu, ngoba uSathane uqobo uzitshaya isithunywa sokukhanya.

15Ngakhoke kakusinto enkulu, uba izinceku zakhe zizitshaya izinceku zokulunga; ukuphela kwazo kuzakuba njengokwemisebenzi yazo.

16Ngiyaphinda futhi ngithi: Kakungatsho muntu ukuthi ngiyisithutha; kodwa uba lingatsho njalo, ngamukelani njengaso, ukuze lami ngizincome kancinyane.

17Lokho engikutshoyo kangikutsho ngokulaywa yiNkosi, kodwa ngikutsho njengesithutha, ngilesibindi sokuzincoma.

18Lokhu abanengi bayazincoma ngokwasemhlabeni, lami ngizakuzincoma.

19Ngoba lithanda ukuzibekezelela izithutha, lina lingabahlakaniphileyo!

20Liyabekezela, uba umuntu elenza izigqili, uba elidla, uba elibamba, uba ezikhukhumeza, loba elimakala.

21Ngitsho ngilenhloni ukuthi thina besibuthakathaka! Kodwa kulokho umuntu alesibindi sokuzincoma ngakho, lapha ngikhuluma njengesithutha, lami ngilesibindi sokuzincoma ngakho.

22BangamaHeberu na? Lami. BangabakoIsrayeli na? Lami. Bayinzalo kaAbrahama na? Lami.

23Bayizikhonzi zikaKristu na? Ngikhulumisa okohlanya, ngiyiso kakhulu mina kulabo bonke. Ngoba ngibe sekusebenzeni nzima kulabo, ngibe sekubotshweni kanengi kulabo, ngibe sekutshayweni okukhulu, ngaba sengozini zokufa ngezikhathi ezinengi.Seb 16:23

24NgabaJuda ngatshaywa kahlanu imivimvinya engamatshumi amathathu leficamunwemunye.Dute 25:3

25Ngatshaywa kathathu ngezinduku; ngakhandwa ngamatshe kanye; kathathu ngonakalelwa ngumkolo, ngandenda olwandle ubusuku bunye lemini.Seb 16:22; 14:19

26Ngangisekuhambeni kanengi; ngangisengozini zemifula, lasengozini zabaphangi, lasengozini kwabakithi, lasengozini kwabezizwe, lasengozini emizini, lasengozini enkangala, lasengozini olwandle, lasengozini kubazalwane bamanga.Seb 9:23; 14:15

27Ngangisekutshikatshikeni lekukhathazekeni, ngingalali insuku ezinengi; ngisekulambeni lasekomeni, kanengi ngizila ukudla, ngibulawa ngamakhaza ngihambaze.

28Langaphandle kwakho konke lokhu kukhona okungelekayo insuku zonke, ukukhathalela kwami wonke amabandla.

29Ngubani obuthakathaka ngingabi buthakathaka lami na? Ngubani okhubekiswayo ngingavuthi ngokuthukuthela na?

30Uba ngimele ukuzincoma, ngizakuzincoma ngezinto zobuthakathaka bami.

31UNkulunkulu uYise weNkosi uJesu, obongekayo kuze kube nini lanini, uyazi ukuthi kangiqambi manga.

32EDamaseko induna yenkosi uAretha yalinda umuzi waseDamaseko ukuba ingibambe;Seb 9:23–25

33kodwa ngehliswa ewindini lomduli ngesilulu, ngaphepha ezandleni zayo.