Jobe 5 - Ndebele Bible (iBhayibhili Elingcwele) 1978

1Ake umemeze, wena Jobe; ukhona ongakuphendula na?

Uzaphendukela kusiphi sezithunywa na?

2Impela ukuthukuthela kuyasibulala isithutha,

lomhawu uchithe isiphukuphuku.

3Minake sengike ngazibonela onje ephumelela,

umuzi wakhe wasusehlelwa yibubi.

4Abantwana bakhe balahlekelwa lusizo,

bahlupheka enkundleni, kungekho obasizayo.

5Isivuno sakhe sidliwa ngabalambileyo,

besithatha ngitsho lasemeveni,

abomileyo banxwanele inotho yakhe.

6Ngoba usizi kaluveli othulini,

lokuhlupheka kakuphumi emhlabathini.

7Ngoba umuntu uzalelwe ukuhlupheka

njengoba inhlansi ziqhatshela phezulu.

8Kodwa mina bengizafuna uNkulunkulu,

kuNkulunkulu bengizabeka indaba yami.

9Yena owenza izinto ezinkulu ezingelakuhlolwa,

izimangaliso ezingelakubalwa.

10Yena unisa izulu emhlabeni,

athumele amanzi emasimini,

11aphakamise abaphansi,

labalilayo abaphakamisele ekusileni.

12Uchitha amacebo alabo abalobuqili,

ukuze izandla zabo zingaphumeleli.

13Yena ubamba abahlakaniphileyo ebuqilini babo,

lamacebo abalobuqili achithwe masinyane.

14Bahlangana lomnyama emini,

baphumputhe emini njengasebusuku.

15Yena ukhulula abahluphekayo ebuhwabeni babo,

labaswelayo esandleni sabalamandla.

16Ngakhoke abayanga sebelethemba,

lobubi sebuzavala umlomo wabo.

17Ubusisiwe lowomuntu uNkulunkulu amlayayo;

ngalokhoke ungakudeleli ukukhuza kukaSomandla.

18Ngoba uyalimaza, abuye abophe amanxeba,

atshaye, abuye apholise.

19Uzakukukhulula enhluphekweni eziyisithupha,

lakweziyisikhombisa kawuyikuthintwa yibubi.

20Endlaleni uzakukuhlenga ekufeni,

lasempini emandleni omkhonto.

21Uzafihlwa ebubini bokunyeya,

kawuyikwesaba ukuchitheka lapho kufika.

22Ukuchitheka lendlala uzakukuhleka,

ungesabi izilo zasemhlabeni.

23Ngoba uzakuba lesivumelwano lamatshe asegangeni,

lezilo zasegangeni zihlalisane kuhle lawe.

24Uzakwazi ukuba umuzi wakho uvikelekile,

uhlole isibaya sakho kungasweleki lutho.

25Uzakwazi futhi ukuthi inzalo yakho izakuba nengi,

labantwana bakho babe ngangotshani bomhlaba;

26ufinyelele elibeni lakho usuluphele,

njengenqumbi zamabele zifika esizeni ngesikhathi zaso.

27Yebo, lokhu sesikuhlolile; kunjalo.

Kuzwe, ukulalele.