Eks 4 - Ndebele Bible (iBhayibhili Elingcwele) 1978

1UMose wasephendula esithi: Kodwa kabayikungikholwa, kabayikulilalela ilizwi lami; ngoba bazakuthi: INkosi kayibonakalanga kuwe.

2INkosi yathi kuye: Kuyini lokho okusesandleni sakho? Wathi: Yintonga.

3Yathi: Iphosele phansi. Waseyiphosela phansi, yaphenduka yaba yinyoka. UMose wayibalekela.

4INkosi yathi kuMose: Yelula isandla sakho, uyibambe ngomsila. Waselula isandla sakhe, wayibamba; yaphenduka yaba yintonga esandleni sakhe.

5INkosi yathi kuMose: Uzakwenza njalo ebantwini ukuba bakholwe ukuthi uNkulunkulu wabokhokho babo, uNkulunkulu kaAbrahama, uNkulunkulu kaIsaka, uNkulunkulu kaJakobe ubonakele kuwe.

6INkosi yabuya yathi kuye: Faka isandla sakho engutsheni yakho esifubeni. Wasesifaka isandla sakhe; esesikhuphile wabona ukuthi sasesilobulephero, simhlophe njengongqoqwane.

7Yathi: Faka futhi isandla sakho esifubeni sakho. Waphinda wasifaka isandla sakhe esifubeni sakhe; esesikhuphile wabona ukuthi sasesiphenduke saba njengomzimba wakhe wonke.

8Yathi: Kuzakuthi uba bengakukholwa, bengalaleli isibonakaliso sokuqala, bakholwe isibonakaliso sesibili.

9Uba bengazikholwa lalezizibonakaliso ezimbili, bengalaleli ilizwi lakho, uzakukha amanzi emfuleni, uwathele emhlabathini owomileyo; amanzi ozakuwakha emfuleni azakuphenduka abe ligazi emhlabathini owomileyo.

10UMose wasesithi eNkosini: Nkosi, kangizanga ngibe yisikhulumi, lakhathesi kangisiso lanxa usukhulume lenceku yakho; ngoba ngiyagagasa ngilamalimi.

11INkosi yathi kuye: Ngubani owenza umlomo womuntu? Ngubani owenza ukuba umuntu abe yisimungulu, abe yisacuthe lobonayo lesiphofu na? Angithi yimi iNkosi na?

12Ngakho hamba, ngizakuba lomlomo wakho, ngikufundise lokho ozakukukhuluma.

13Kodwa yena wathi: Nkosi, akuthume omunye umuntu.

14INkosi yamthukuthelela uMose, yathi: Angithi ukhona umfowenu uAroni ongumLevi na? Ngiyazi ukuthi angakhuluma kuhle. Nango esiza ukukuhlangabeza; nxa ekubona, uzakuthaba enhliziyweni yakhe.

15Uzakukhuluma laye, ufake amazwi ami emlonyeni wakhe; ngizakuba lomlomo wakho lomlomo wakhe, ngilifundise lokho elizakukwenza.

16Yena uzakuba ngumkhulumeli wakho ebantwini, abe ngumlomo wakho, wena ube njengonkulunkulu kuye.

17Uzaphatha lintonga esandleni sakho, ozakwenza izibonakaliso ngayo.

UMose ubuyela eGibithe

18UMose wasuka wabuyela kuJetro uyisezala, wathi kuye: Ake ngihambe, ngibuyele kubafowethu abaseGibithe, ngibone ukuthi basekhona yini. UJetro wathi kuMose: Hamba kuhle.

19INkosi yathi kuMose eMidiyani: Hamba, ubuyele eGibithe; ngoba bonke ababethanda ukukubulala sebafa.

20UMose wathatha umkakhe lamadodana akhe, wabakhwelisa phezu kobabhemi, wabuyela elizweni laseGibithe. UMose waphatha intonga kaNkulunkulu.

21INkosi yasisithi kuMose: Ekubuyeleni kwakho eGibithe, umele ukuba wenze phambi kukaFaro zonke izimangaliso engikunike zona. Kodwa ngizakuyenza inhliziyo yakhe ibe lukhuni ukuba angabavumeli abantu bahambe.

22Wena uzakuthi kuFaro: INkosi ithi: UIsrayeli uyindodana yami, ulizibulo lami;

23ngithi kuwe: Vumela indodana yami ukuba ihambe iyengikhonza; kodwa uba ungayivumeli, ngizabulala indodana yakho, izibulo lakho.

24Kwathi esesendleleni, endlini yezihambi, iNkosi yahlangana loMose, yafuna ukumbulala.

25UZipora wasethatha insengentshe, wayisoka indodana yakhe, wathinta ngesikhumba inyawo zikaMose esithi: Impela ungumyeni wegazi kimi.

26Ngalokhu iNkosi yamyekela. Ngenxa yokusoka uZipora wathi: Ungumyeni wegazi.

27INkosi yasisithi kuAroni: Hamba, uyehlangabeza uMose enkangala. Wahambake, wamhlangabeza entabeni kaNkulunkulu, wamanga.

28UMose wamtshela uAroni wonke amazwi eNkosi eyayimthumele wona, lazo zonke izibonakaliso eyayimlayele zona.

29UMose loAroni bahamba, babuthanisa bonke abalisa bakoIsrayeli.

30UAroni wakhuluma amazwi wonke iNkosi eyayiwakhulume kuMose, wenza izibonakaliso phambi kwabantu.

31Abantu bakholwake; lapho sebezwile ukuthi iNkosi ibahambele abakoIsrayeli, lokuthi ibonile ukuhlupheka kwabo, bakhothamisa amakhanda, badumisa.