Izililo 2 - Ndebele Bible (iBhayibhili Elingcwele) 1978

Usizi lweJerusalema luvela eNkosini

1Yeka umnyama iNkosi ekuthukutheleni kwayo ewehlisele phezu kweZiyone.

Iphosele ubuhle bukaIsrayeli emhlabeni busuka ezulwini;

kayikhumbulanga ithempeli layo ngosuku lokuthukuthela kwayo.

2INkosi ichithile yonke imizi kaJakobe ingayihawukeli.

Ekuthukutheleni kwayo idilizile izinqaba zakoJuda.

Yaphosela phansi yangcolisa umbuso lamakhosi awo.

3Yaqeda ngokuvutha kolaka lwayo wonke amandla akoIsrayeli.

Yasusa isandla sayo sokusiza phambi kwezitha.

Yatshisa kuJakobe njengomlilo welangabi oqothula konke.

4Isinemba ngemitshoko yayo njengesitha,

yathiya isandla sayo esilamandla;

njengesitha ibulele bonke abathandeka emehlweni ethu;

lasethenteni laseZiyone yehlisela ulaka lwayo njengomlilo.

5INkosi isinjengesitha ichithile uIsrayeli;

ichithile zonke izigodlo zakhe,

yadilizela phansi inqaba zakhe.

Yandisa ukulila lokukhala koJuda.

6Iphundlile ithempeli layo njengokuphundlwa kwevini,

yadiliza indlu yokukhonzela.

INkosi yenza ukuba kukhohlakale eZiyone imikhosi emisiweyo leSabatha.

Yadelela ngokuvutha kolaka kwayo umbusi lompristi.

7INkosi ilidelele ialtare layo,

yalahla indlu yayo engcwele;

yanikela esandleni sesitha imiduli yezigodlo zalo.

Kwaba khona umsindo wokunqoba endlini yayo engcwele

njengosukwini lomkhosi omisiweyo.

8INkosi ikhethile ukudiliza umduli weZiyone,

iwulinganisile ngentambo yokulinganisa,

kayiyekelanga ukudiliza;

yenza ukuba kukhale umthangala lomduli,

iphele amandla kanyekanye.

9Amasango alo atshonile phansi,

idilizile yephula imigoqo yalo.

Inkosi yalo lezikhulu zalo sebesezizweni,

kakuselamthetho;

labaprofethi balo kabasamukeli umbono eNkosini.

10Abadala baseZiyone bahlezi phansi bethule,

bathele uthuli emakhanda abo, bagqoke izambatho zokulila.

Intombi zaseJerusalema zikhothamisele phansi amakhanda azo.

11Amehlo ami asediniwe yikukhala,

imibilini yami idungekile.

Inhliziyo yami idabukile ngosizi ngenxa yokuchitheka kwabantu bami,

ngoba ingane labamunyayo bafela endleleni zomuzi.

12Bathi kubonina: Kungaphi ukudla lewayini na?

lapho besifa njengabantu abalinyaziweyo endleleni zomuzi,

lapho befela ezifubeni zabonina.

13Ngingathini ngawe na?

Ngingakufanisa ngani, wena Jerusalema na?

Ngingakufanisa ngani ukuba ngikududuze, wena Ziyone na?

Ngoba ukuchitheka kwakho kukhulu njengolwandle.

Ngubani ongakwelapha na?

14Abaprofethi bakho babonile imibono engamanga leyinkohliso ngawe.

Kabakuvezanga ukona kwakho ukuze babuyise inhlanhla yakho,

kodwa babonile imibono yamanga leduhisayo ngawe.

15Bonke abadlulayo bakutshayela izandla,

bayakuncifela bakunikinele amakhanda abo, Jerusalema.

Bathi: Yiwo lo umuzi owawubizwa ngokuthi yibuhle obupheleleyo

lentokozo yomhlaba wonke na?

16Zonke izitha zakho ziyakuklolodela,

ziyancifa, zigedle amazinyo azo zithi: Siwuchithile;

lolu yilo usuku ebesilulindele; sesilufumene, silubonile.

17INkosi yenzile lokho ebikumisile,

igcwalisile ilizwi layo.

Njengokumisa kwayo endulo isidilizile ingelasihawu.

Yenzile ukuba isitha sithokoze ngawe,

yaphakamisa amandla ezitha zakho.

18Khala kakhulu eNkosini, wena Ziyone!

Inyembezi zakho zigeleze njengemifula emini lasebusuku.

Ungaphumuli, lenyembezi zakho zingaqamuki.

19Vuka, ukhale ebusuku, ekuqaleni kwemilindo,

uvule inhliziyo yakho yonke phambi kweNkosi,

uphakamisele izandla zakho kuyo,

ngenxa yokuphila kwabantwana bakho,

ababulawa yindlala ekuhlanganeni kwendlela zonke.

20Ake ukhangele, Nkosi, ubone.

Ngubani owake wamphatha ngokunje na?

Abesifazana bazakudla inzalo yabo yini,

abantwana babo ababazeleyo na?

Umpristi lomprofethi bazabulawa endlini engcwele yeNkosi na?

21Obhuqwini lwezindlela kulele abatsha labadala;

intombi zami lensizwa zami zibulewe;

osukwini lokuthukuthela kwakho uzibulele wena,

wazibulala ungelasihawu.

22Wangibizela izitha zami, zavela inxa zonke,

njengabantu abeza emkhosini,

kakho loyedwa owaphunyukayo,

kakho owasilayo osukwini lokuthukuthela kweNkosi.

Bonke engabazala ngabondla babhujiswa yizitha zami.