Eks 13 - Ndebele Bible (iBhayibhili Elingcwele) 1978

Amazibulo ahlukaniselwa iNkosi; umkhosi wesinkwa esingelamvubelo

1INkosi yasikhuluma kuMose,

2yathi: Ngahlukanisela wonke amazibulo; konke okuvula isizalo phakathi kwabantu bakoIsrayeli laphakathi kwenkomo lokhu kungokwami.Nani 3:13; Luka 2:23

3UMose wasesithi ebantwini: Khumbulani lolusuku eliphume ngalo eGibithe, endaweni yobugqili; ngoba ngamandla esandla iNkosi elikhuphe kulindawo. Kakungadliwa isinkwa esilemvubelo.

4Ngalolusuku ngenyanga kaAbibi liyaphuma.

5Kuzakuthi lapho iNkosi isilingenisile elizweni lamaKanani lamaHethi lamaAmori lamaHivi lamaJebusi, eyafunga kubokhokho benu ukulinika lona, ilizwe eligcwele uchago lenyosi, ligcine linkonzo ngalinyanga.

6Lizakudla isinkwa esingelamvubelo insuku eziyizikhombisa, kube khona umkhosi weNkosi ngosuku lwesikhombisa.

7Isinkwa esingelamvubelo sizakudliwa ngazo zonke insuku eziyisikhombisa; kakungabonakali kini isinkwa esilemvubelo kanye lemvubelo elizweni lonke lakini.

8Lizakutshela amadodana enu ngalolosuku lithi: Kungenxa yalokho iNkosi eyangenzela khona ekuphumeni kwami eGibithe.

9Lokhu kuzakuba luphawu ezandleni zenu lesikhumbuzo emabunzini enu, ukuze umlayo weNkosi ube semilonyeni yenu; ngoba ngesandla esilamandla iNkosi ilikhuphile eGibithe.

10Ngakho lizakugcina lumthetho iminyaka ngeminyaka ngesikhathi sawo.

11Kuzakuthi lapho iNkosi isilingenisile elizweni lamaKanani, njengokufunga kwayo kini lakubokhokho benu, ilinike lona,

12lahlukanisele iNkosi konke okuvula isizalo; amazibulo wonke amaduna ezinkomo elilawo azakuba ngaweNkosi.Luka 2:23

13Lawo wonke amazibulo abobabhemi lizakuwahlenga ngewundlu; uba lingawahlengi, liwaphule intamo; lamadodana wonke angamazibulo phakathi kwabantwana benu kawahlengwe.

14Lapho amadodana enu elibuza ngesikhathi esizayo esithi: Kutshoni lokhu na? lizakuthi kuwo: Ngamandla esandla iNkosi yasikhupha eGibithe, endaweni yobugqili.

15Ngoba kwathi uFaro esenza inhliziyo yakhe ibe lukhuni ukuba asivumele sihambe, iNkosi yabulala wonke amazibulo elizweni laseGibithe, amazibulo abantu lamazibulo ezinkomo; ngenxa yalokhu ngiyayihlabela iNkosi konke okuvula isizalo okuduna; kodwa wonke amazibulo amadodana ami ngiyawahlenga.

16Kuzakuba luphawu ezandleni zenu lesikhumbuzo emabunzini enu, ngoba ngamandla esandla sayo iNkosi yasikhupha eGibithe.

Ukuhamba kwabakoIsrayeli besiya oLwandle oluBomvu

17Kwathi uFaro esebavumele abantu ukuba bahambe, uNkulunkulu kabaholanga ngendlela edabula elizweni lamaFilistiya lanxa kwakuyiyona eseduze; ngoba uNkulunkulu wathi: Mhlawumbe abantu bazakuzisola nxa bebona impi, babuyele eGibithe.

18Kodwa uNkulunkulu wababhodisa ngendlela yasenkangala ngasoLwandle oluBomvu. AbakoIsrayeli baphuma elizweni laseGibithe behlomile.

19UMose wathatha amathambo kaJosefa, wahamba lawo, ngoba uJosefa wayebafungisile abakoIsrayeli wathi: Impela uNkulunkulu uzalihambela; kalibothatha amathambo ami lihambe lawo.Gen 50:25; Josh 24:32

20Basebesuka eSukothi, baya bamisa eEthama, eceleni kwenkangala.

21INkosi yahamba phambi kwabo emini ngensika yeyezi ukubahola endleleni, lasebusuku ngensika yomlilo ukubakhanyisela, ukuze bahambe emini lebusuku.

22Insika yeyezi emini lensika yomlilo ebusuku kakusukanga phambi kwabantu.