Hez 27 - Ndebele Bible (iBhayibhili Elingcwele) 1978

Isililo ngeTire

1Ilizwi leNkosi lafika kimi lathi:

2Wena ndoda, khala isililo ngeTire,

3uthi kilo iTire elimi ngasokhunjini lolwandle, elithengisayo ebantwini emazweni amanengi angasolwandle, iNkosi uNkulunkulu ithi:

Wena Tire, utshilo ukuthi:

Ngiphelele ngobuhle.

4Imikhawulo yakho iphakathi kolwandle,

labakhi bakho benza ubuhle bakho buphelele.

5Benza wonke amapulanka akho ngezihlahla zephane ezivela eSeniri;

bathatha umkusu ovela eLebanoni ukukwenzela insika.

6Langezihlahla ezinkulu zaseBashani

bakwenzela amaphini okugwedla;

benza izitezi zakho ngezihlahla zomnondo

ezivela ngasezinkunjini zaseKuprosi,

bazendlala ngempondo zendlovu.

7Isayili lakho lenziwa ngelembu elihle

lelicecisiweyo elivela eGibithe,

elaba luphawu lwakho,

lethente lakho lenziwa ngelembu eliluhlaza

leliyibubende elivela ezihlengeni zaseElisha.

8Abakhileyo eSidoni laseArvadi babengabagwedli bakho;

izihlakaniphi ezazikuwe, wena Tire, zaba ngabaqondisi bakho.

9Abadala baseGebali lezihlakaniphi zalo zakhona,

zinameka izimfa zakho;

imikolo yonke yasolwandle labatshayeli bayo

yeza kuwe ukuthenga impahla yakho.

10Amadoda asePerisiya lawaseLudi lawasePuti

ayesempini yakho elibutho lakho;

aphanyeka izihlangu zawo lengowane zawo kuwe,

akunika udumo.

11Amadoda aseArvadi lawaseKilikhiya

ayephezu kwemiduli yakho ekuhanqile,

lamadoda aseGamadi ayesezinqabeni zakho;

aphanyeka izihlangu zawo emidulini yakho inxa zonke,

enza ubuhle bakho buphelele.

12ITarshishi lathengiselana lawe ngenxa yobunengi benotho yakho yenhlobo zonke, benana impahla yakho ngesiliva langensimbi langomnuso.

13IJavani leTubali leMesheki zathengiselana lawe, zenana impahla yakho ngabantu uqobo, langezitsha zethusi.

14IBeti‐Togarima yenana impahla yakho ngamabhiza, langamabhiza empi, langezimbongolo.

15Abantu baseRodesi bathengiselana lawe, lamazwe amanengi angasolwandle ayezindawo zakho zokuthengisela; bakuhlawula ngempondo zendlovu, langesihlahla esithiwa yieboni.

16IEdoma lathengiselana lawe ngenxa yempahla zakho ezinengi benana impahla zakho ngamatshe athiwa ngama‐emeraldi, langokuyibubende, langomsebenzi ocecisiweyo, langelembu elihle, langamatshe athiwa yikorali leagate.

17UJuda lelizwe lakoIsrayeli bathengiselana lawe, benana impahla zakho ngamabele aseMinithi, langempuphu, langenyosi, langamafutha, langamakha.

18IDamaseko lathengiselana lawe ngenxa yobunengi bempahla zakho langenxa yenotho yakho enkulu yenhlobo zonke, benana impahla zakho ngewayini laseHeliboni langoboya obumhlophe,

19langewayini elivela eUzali, langensimbi ekhandiweyo, langekasiya langekalamu; konke lokhu benanisa ngakho.

20IDedani lathengiselana lawe ngamalembu amahle ezihlalo zokugada.

21IArabiya lazo zonke izikhulu zaseKedari babengabathengi bakho abathandekayo, bethengiselana lawe ngamawundlu langezinqama langezimbuzi.

22Abathengi baseSheba leRama bathengiselana lawe, benana impahla zakho ngenhlobo zonke ezinhle zamakha, langamatshe wonke amahle, langegolide.

23IHarani leKane leEdeni, labathengi baseAshuri, leKilimadi, bathengiselana lawe.

24Laba bathengiselana lawe ngezambatho ezinhle, langamalembu aluhlaza, langomsebenzi ocecisiweyo, langamacansi amibalabala, elukwe ngentambo, aqina; bathengiselana lawe ngakho konke lokhu.

25Imikolo emikhulu yakuthwalela impahla zakho.

Waba njengomkolo ogcwele usindwa kakhulu enzikini zolwandle.

26Abagwedli bakho bakukhuphelela emanzini amanengi.

Umoya wasempumalanga usukwephulele enzikini zolwandle.

27Inotho yakho lempahla yakho, lalokho okuthengisayo,

labatshayeli bakho, labaqondisi bakho,

labavimbi bezimfa zakho, labathengi bakho,

lawo wonke amadoda empi akhona kuwe,

ixuku lonke eliphakathi kwakho,

lizatshona enzikini zolwandle

ngosuku lokuchitheka kwakho.

28Ngelizwi lokukhala kwabaqondisi bakho

ilizwe lonke liyathuthumela.

29Lapho bonke abagwedli besehla emikolweni yabo,

lalapho abatshayeli labaqondisi bekhuphukela okhunjini kanyekanye,

30bayahlaba umkhosi, bekukhalela kakhulu;

bathela uthuli emakhanda abo,

bazibhuqe emlotheni,

31baziphuce amakhanda, bagqoke izambatho zokulila,

bakukhalele kakhulu, bakhale ngokukhala okubuhlungu.

32Ekukhaleni kwabo bayalila ngawe, bathi:

Ngubani owayenjengeTire elizigqajayo

elizingelezelwe lulwandle na?

33Ekuphumeni kwempahla yakho olwandle,

wanelisa abantu abanengi;

ngenotho enengi langempahla yakho

wanothisa amakhosi omhlaba.

34Khathesi usuwaphulwe lulwandle enzikini zamanzi;

impahla yakho labo bonke abasebenza kuwe kutshone kanye lawe.

35Bonke abakhileyo emazweni angasolwandle bayamangala ngawe,

lamakhosi abo ayesaba kakhulu,

lobuso bawo bunyukumele.

36Abathengi phakathi kwabantu bayakuncifela.

Usuchitheke kubi,

kawusayikuba khona kuze kube nininini.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help