Dute 25 - Ndebele Bible (iBhayibhili Elingcwele) 1978

1Uba abantu bexabana, baye kubathonisisi, abathonisisi bazakubathonisisa, bayekele ongelacala, balahle olecala.

2Uba olecala efanele ukutshaywa, umthonisisi uzakumlalisa phansi, atshaywe phambi kwakhe, ubunengi bemivimvinya bulingane icala lakhe.

3Angatshaywa imivimvinya engamatshumi amane, kodwa engadluli leyo, funa owakini ayangeke phambi kwakho nxa etshaywa imivimvinya eminengi kulaleyo.

4Ungayifaki isayeke inkabi nxa ibhula amabele.Umlayo wokungena kumfazi ofelweyo

5Uba izelamani zihlala ndawonye, omunye wazo afe engelandodana, umfazi wofileyo kayikuthathwa ngowemzini ongesuye wakibo; umfowabo wendoda yakhe uzakumngena, amthathe abe ngumkakhe.Mat 22:24; Mark 12:19; Luka 20:28

6Indodana elizibulo ayizalayo izathatha ibizo lomfowabo ofileyo, ukuba ibizo lakhe lingacimi koIsrayeli.

7Uba umuntu engathandi ukumthatha umkamfowabo, umkamfowabo uzakuya kubalisa enkundleni athi: Umfowabo wendoda yami uyala ukuvusela umfowabo indlu koIsrayeli; uyala ukungingena.Ruthe 4:7, 8

8Abalisa balowomuzi bazambiza, bakhulume laye. Uba eqinisa esithi: Kangithandi ukumthatha;

9umkamfowabo uzasondela kuye phambi kwabalisa, amkhuphe inyathelo onyaweni, amkhafulele ebusweni, athi: Kakwenziwe kanjalo kulowomuntu ongayakhiyo indlu yomfowabo.

10Indlu yakhe izakubizwa koIsrayeli ngokuthi: Yindlu yomuntu olenyathelo elakhutshwayo.

11Nxa amadoda amabili esilwa, kusondele umfazi wenye ukuba ayilamulele indoda yakhe kulowo oyitshayayo, elule isandla sakhe ayibambe ngamaphambili,

12quma isandla sakhe, ungabi lasihawu laye.

Umthetho wezilinganiso

13Kakungabi khona esikhwameni sakho insimbi ezimbili zokulinganisa ezingalinganiyo, enye enkulu lenye encinyane.Levi 19:35, 36

14Kakungabi khona endlini yakho izilinganiso ezimbili ezingalinganiyo, esinye esikhulu lesinye esincinyane.

15Woba lensimbi yokulinganisa epheleleyo lelungileyo, kanye lesilinganiso esipheleleyo lesilungileyo, ukuba insuku zakho zibe zinengi elizweni iNkosi uNkulunkulu wakho ekunika lona.

16Ngoba bonke abenza izinto ezinje, bonke abenza ukungalungi, bazondwa yiNkosi uNkulunkulu wakho.

Icala lamaAmaleki

17Khumbulani lokho uAmaleki akwenza kini endleleni ekuphumeni kwenu eGibithe,Eks 17:8–14; 1 Sam 15:2–9

18ukuthi walijuma endleleni selidiniwe, seliphele amandla, wachitha bonke ababehamba ngasemuva kwenu; kamesabanga uNkulunkulu.

19Ngakho nxa iNkosi uNkulunkulu wenu isiliphumuzile kuzo zonke izitha zenu inxa zonke, elizweni elinika lina ukuba ngelenu, lizakumqothula umAmaleki ukuze angakhunjulwa emhlabeni; lingakhohlwa lokhu.