Heb 2 - Ndebele Bible (iBhayibhili Elingcwele) 1978

UKristu waba mncinyane okwesikhatshana kulezithunywa

1Ngakhoke asiqaphelisise esikuzwileyo funa mhlawumbe siduhe kukho.

2Ngoba uba ilizwi elakhulunywa yizithunywa laqiniseka, lakho konke ukuphambuka lokungalaleli kwaphindiselwa ngokufaneleyo,

3thina sizakuphepha kanjani, uba sidelela ukusiliswa okungaka na? Kwakhulunywa kuqala yiNkosi, kwafakazwa kithi yilabo abayizwayo,

4uNkulunkulu futhi efakaza kanye labo ngezibonakaliso langezimangaliso langemisebenzi yamandla eyizinhlobonhlobo langeziphiwo zikaMoya oNgcwele, ezabelwa ngokwentando yakhe.

5Ngoba kwakungesizo izithunywa uNkulunkulu ehlisela ngaphansi kwazo ilizwe elizayo esikhuluma ngalo.

6Kufakaziwe endaweni ethile ngokuthi:

Umuntu uyini ukuba umkhumbule wena,

lendodana yomuntu ukuba uyinanze na?

7Wamenza waba mncinyane kulezithunywa okwesikhatshana;

wamethwesa umqhele wobukhosi lodumo;

8izinto zonke wazibeka ngaphansi kwenyawo zakhe.

Ngoba ekubekeni izinto zonke ngaphansi kwakhe katshiyanga lutho olungabekwanga ngaphansi kwakhe. Kodwa khathesi kasikaziboni izinto zonke zibekiwe ngaphansi kwakhe.

9Kodwa siyambona uJesu owenziwa waba mncinyane okwesikhatshana kulezithunywa ethwesiwe umqhele wobukhosi, lowodumo ngenxa yenhlupheko yokufa, ukuze ngomusa kaNkulunkulu ezwe ukufa ngenxa yabo bonke.

10Kwakumfanele uNkulunkulu, okukhona konke ngenxa yakhe lokukhona konke ngaye, ukuba, lapho eletha amadodana amanengi enkazimulweni, amphelelise ngezinhlupheko oyinkosi yokusiliswa kwabo.

11Ngoba lowo owenza ukuba babe ngcwele lalabo abenziwa baba ngcwele ngabohlanga lunye; ngakhoke kalanhloni ukubabiza ngokuthi ngabafowethu,

12esithi:

Ngizakubatshumayeza abafowethu ibizo lakho,

ngikudumise phakathi kwebandla.

13Futhi uthi:

Ngizakubeka ithemba lami kuye.

Abuye athi:

Khangela mina labantwana uNkulunkulu anginike bona.

14Ngakhoke njengoba abantwana behlanganyela inyama legazi, laye uqobo wahlanganyela khona lokho, ukuze ngokufa amchithe yena obelamandla okufa onguSathane,

15abakhulule ebugqilini bonke labo abathi ngokwesaba ukufa ekuphileni kwabo konke baba yizigqili.

16Ngoba phela kasizi izithunywa, kodwa usiza inzalo kaAbrahama.

17Ngakhoke kwamfanela ukuba abe njengabafowabo kukho konke, ukuze abe ngumpristi omkhulu olesihawu lothembekileyo enkonzweni kaNkulunkulu, ukuba abe yinhlawulo yezono zabantu.

18Ngoba lokhu wahlupheka yena uqobo elingwa, ulamandla okusiza abalingwayo.