2 Sam 13 - Ndebele Bible (iBhayibhili Elingcwele) 1978

UAmnoni loTamari

1UAbisalomu indodana kaDavida wayelodadewabo omuhle othiwa nguTamari; uAmnoni enye yamadodana kaDavida wamthanda.

2UAmnoni wahlupheka kakhulu waze wagula ngenxa kadadewabo uTamari; ngoba wayeyintombi egcweleyo, kwabonakala kuAmnoni kunzima ukwenza ulutho kuye.

3UAmnoni wayelomngane wakhe othiwa nguJonadabi indodana kaShimeya, umfowabo kaDavida; uJonadabi wayengumuntu olobuqili kakhulu.

4Wathi kuye: Mntanenkosi, uhlotshiswa yini kangaka insuku ngensuku? Ungengitshele na? UAmnoni wathi kuye: Ngiyamthanda uTamari udadewabo kaAbisalomu umfowethu.

5UJonadabi wasesithi kuye: Lala embhedeni wakho, uzitshaye ogulayo; kuthi lapho uyihlo efika ukukubona, uthi kuye: Ake kuze uTamari udadewethu, anginike ukudla, akulungise phambi kwami ukuba ngikubone, ngikwamukele esandleni sakhe kuphela.

6Waselalake uAmnoni, wazitshaya ogulayo; lapho inkosi ifika ukuzambona, uAmnoni wathi kuyo: Ngicela uTamari udadewethu ukuba azekwenza amaqebelengwana amabili phambi kwami ukuba ngiwamukele esandleni sakhe.

7UDavida wasethumela ilizwi endlini kuTamari esithi: Yana endlini yomfowenu uAmnoni, umlungisele ukudla.

8Wasehambake uTamari, waya endlini kaAmnoni umfowabo, wamfica elele. Wathatha inhlama, wayixova, wenza amaqebelengwana phambi kwakhe, wawapheka.

9Waseyephula imbiza, wawathululela phambi kwakhe. Kodwa uAmnoni wala ukudla, wathi kabaphume bonke abantu endlini. Basebephuma bonke abantu.

10UAmnoni wasesithi kuTamari: Letha ukudla endlini yami yokulala ukuba ngidle esandleni sakho. UTamari wathatha amaqebelengwana ayewenzile, wawangenisa endlini yokulala kuAmnoni umnewabo.

11Lapho ewasondeza kuye ukuba awadle, wambamba, wathi kuye: Woza ulale lami, dadewethu.

12Yena wamphendula wathi: Atshi mnewethu, ungangibambi, ngoba lokhu kakwenziwa koIsrayeli, ungenzi lamanyala.

13Minake ngingatshona ngaphi lehlazo lami na? Lawe uzaphenduka isiphukuphuku koIsrayeli. Ake ukhulume lenkosi, ngoba kayiyikwala lami.

14Kodwa kamlalelanga; ngoba wayelamandla kulaye, wambamba walala laye.

15UAmnoni wasemzonda kakhulu; ukumzonda kwakhe kwaba kukhulu ukwedlula ukumthanda kwakhe. Wathi kuye: Vuka uhambe.

16Yena wathi kuye: Atshi, mnewethu; lobububi bokungixotsha bukhulu ukwedlula lokho ongenze khona. Kodwa kamlalelanga.

17Wasebiza inceku eyayisebenza kuye, wathi: Susa lumfazi, umkhuphele phandle, ukhiye umnyango.

18UTamari wayegqoke isigqoko esilemikhono emide, ngoba amadodakazi enkosi ayizintombi ayegqoka enze njalo. Leyonceku yaeimkhuphela phandle, yakhiya umnyango.

19UTamari wasezithela ngomlotha ekhanda, wadabula isigqoko sakhe esilemikhono emide ayesigqokile, wathwala imikhono ekhanda, wahamba ekhala kakhulu.

20UAbisalomu umnewabo wathi kuye: Umnewenu uAmnoni kade elawe na? Thula, dadewethu, yena ungumnewenu; ungazidubi ngalokhu. UTamari wahlala yedwa edanile endlini kaAbisalomu umnewabo.

21Inkosi uDavida isizwile zonke lezizinto yathukuthela kakhulu; kodwa yayingathandi ukumhlupha uAmnoni ngoba wayelizibulo layo imthanda.

22UAbisalomu wayengasamkhulumisi uAmnoni, wamzonda ngoba ebambe udadewabo uTamari.

UAbisalomu ubulala uAmnoni; abesebaleka

23Emva kweminyaka emibili epheleleyo uAbisalomu egunda izimvu zakhe eBali‐Hazori eliseduze leEfrayimi, wamema wonke amadodana enkosi.

24Waya enkosini uDavida wathi: Inceku yakho iyagunda izimvu; inkosi ake ize lenceku zayo.

25Kodwa inkosi yathi kuAbisalomu: Atshi, ndodana yami, kasingezi sonke sibe ngumthwalo kuwe. Wayibamba ngamandla kodwa kayivumanga ukuhamba, kodwa yamtshela ukuba ahambe.

26UAbisalomu wasesithi: Kulungile, kodwa uAmnoni umfowethu kahambe lathi. Inkosi yathi: Uzahambelani lawe na?

27UAbisalomu waphikelela, yaze yavuma ukuba uAmnoni lawo wonke amadodana enkosi ahambe laye. UAbisalomu wasesenza idili elifanele inkosi.

28UAbisalomu waselaya inceku zakhe esithi: Khangelani, nxa uAmnoni esethokoza ngewayini, lapho ngisithi kini: Bulalani uAmnoni, limbulale. Lingesabi, ngoba ngizabe ngililayile. Lime isibindi, libe ngamaqhawe.

29Inceku zikaAbisalomu zenza kuAmnoni njengoba ayezilayile. Amadodana wonke enkosi asesuka, egada imbongolo zawo ebaleka.

30Kwathi besesendleleni, kwafika ilizwi kuDavida elithi: UAbisalomu usebulele wonke amadodana enkosi, kakusalanga leyodwa.

31Inkosi yasisukuma idabula izigqoko zayo, yalala phansi; zonke inceku zayo zazimi lapho izigqoko zazo zidatshuliwe.

32UJonadabi indodana kaShimeya, umfowabo kaDavida, wathi: Inkosi yami kayingathi babulele wonke amadodana enkosi, ngoba nguAmnoni yedwa ofileyo; ngoba uAbisalomu wazimisela ukwenza lokhu kusukela osukwini uAmnoni abamba ngalo udadewabo uTamari.

33Ngakhoke inkosi yami kayingakubeki lokhu enhliziyweni, icabange ukuthi wonke amadodana enkosi afile, ngoba nguAmnoni yedwa ofileyo.

34UAbisalomu wabaleka. Umlindi olindayo wakhangela, wabona abantu abanengi besehla entabeni ngaseHoronayimi. Weza wabikela inkosi wathi: Ngibona abantu abanengi besehla entabeni ngaseHoronayimi.

35UJonadabi wathi enkosini: Nanka amadodana enkosi asefikile, njengokutsho kwenceku yakho.

36Kwathi eseqedile ukukhuluma, afika amadodana enkosi, adazuluka, akhala; lenkosi lazo zonke inceku zayo zakhala kakhulu.

37Kodwa uAbisalomu wabalekela kuTalimayi indodana kaAmihudi inkosi yaseGeshuri. UDavida wayililela indodana yakhe isikhathi eside.2 Sam 3:3

38Wabalekake uAbisalomu, waya eGeshuri, wahlala khona iminyaka emithathu.

39Inhliziyo kaDavida yamkhanuka uAbisalomu kakhulu, ngoba wayeseduduzekile ngokufa kukaAmnoni.