2 Lan 2 - Ndebele Bible (iBhayibhili Elingcwele) 1978

Isivumelwano sikaSolomoni loHuramu

1USolomoni wazimisela ukwakhela ibizo leNkosi ithempeli, lokuzakhela isigodlo.1 Kho 5:1–18

2Wakhetha amadoda azinkulungwane ezingamatshumi ayisikhombisa ukuthwala imithwalo, layizinkulungwane ezingamatshumi aficaminwembili ukumba amatshe ezintabeni, layizinkulungwane ezintathu lamakhulu ayisithupha ukuba ngabaphathi.

3USolomoni wathumela ilizwi kuHuramu inkosi yaseTire esithi: Njengokwenza kwakho kuDavida ubaba umthumela amaphane okuzakhela indlu yokuhlala, yenza njalo lakimi.

4Sengizimisele ukwakhela ibizo leNkosi uNkulunkulu wami indlu, ngiyahlukanisele iNkosi ukuba ngitshisele khona impepha elephunga elihle, lokunikela insuku zonke izinkwa ezahlukaniselwe uNkulunkulu, leminikelo yokutshiswa ekuseni lantambama, langamaSabatha, langezikhathi zokuthwasa kwenyanga, langezikhathi zemikhosi emisiweyo yeNkosi uNkulunkulu wethu, njengokumiselwe uIsrayeli kuze kube nininini.

5Indlu engizayakha izakuba nkulu, ngoba uNkulunkulu wethu mkhulu kulabonkulunkulu bonke.

6Kodwa ngubani olamandla okumakhela indlu lokhu iphezulu, yebo, lezulu eliphezulu kakhulu, lingelakumanela na? Minake ngingubani ukuba ngimakhele indlu ngaphandle kwendawo nje yokutshisela impepha phambi kwakhe na?1 Kho 8:27; 2 Lan 6:18

7Ngakhoke akungithumele umuntu okwaziyo ukusebenza ngegolide langesiliva langethusi langensimbi langamalembu ayibubende labomvu laluhlaza, lokwaziyo ukubalaza, ozasebenza labanti bami abakwaziyo ukusebenza koJuda leJerusalema abamiswa ngubaba uDavida.

8Ungithumele imikusu lamaphane lemikampa evela eLebanoni, ngoba ngiyazi ukuthi inceku zakho ziyakwazi ukugamula izihlahla zaseLebanoni; inceku zami zizasebenza lezakho,

9ukuba zingilungisele izigodo ezinengi, ngoba indlu engizayakha izaba nkulu ngokumangalisayo.

10Ngizanika inceku zakho ezizagamula izihlahla ukudla, amasaka amabele azinkulungwane ezingamatshumi amathathu lambili, lamasaka ebhali azinkulungwane ezingamatshumi amathathu lambili, lamatanka ewayini angamakhulu amabili lamatshumi amathathu, lamatanka amafutha angamakhulu amabili lamatshumi amathathu.

11UHuramu inkosi yaseTire waphendula ngencwadi ayithumela kuSolomoni wathi: Ngoba iNkosi uNkulunkulu ibathanda abantu bayo, ikwenzile waba yinkosi yabo.

12Wabuya wathi: Kayibongwe iNkosi uNkulunkulu kaIsrayeli eyenza izulu lomhlaba, enike inkosi uDavida indodana ehlakaniphileyo elengqondo lokuqedisisa ezayakhela iNkosi ithempeli, izakhele isigodlo.

13Sengithumela kuwe umuntu okwaziyo ukusebenza olokuqedisisa, othiwa nguHuramu,

14ozalwa yindodakazi yakoDani, uyise wayengowaseTire; uyakwazi ukusebenza ngegolide langesiliva langethusi langensimbi langamatshe langezigodo langamalembu ayibubende laluhlaza labomvu, langamalembu amahle, uyakwazi ukubalaza lokwenza imizebenzi yonke yobungcitshi angayinikwa, angasebenza lezingcitshi zakho lezingcitshi zenkosi yami uyihlo uDavida.

15Inkosi yami kayithumele amabele lebhali lamafutha lewayini ezincekwini zayo ekuthembisileyo;

16thina sizakukugamulela zonke izihlahla ozifunayo eLebanoni, sizenze iminyaba sizilethe kuwe ngolwandle eJopha ukuze uzise eJerusalema.

17USolomoni wabala bonke abezizweni ababeselizweni lakoIsrayeli ngemva kokubalwa kwabo nguyise uDavida; baba zinkulungwane ezilikhulu lamatshumi amahlanu lantathu lamakhulu ayisithupha.

18Wakhetha amadoda azinkulungwane ezingamatshumi ayisikhombisa ukuthwala imithwalo, layizinkulungwane ezingamatshumi aficaminwembili ukumba amatshe ezintabeni, layizinkulungwane ezintathu lamakhulu ayisithupha ukuwaphatha lokuwasebenzisa.