2 Kho 6 - Ndebele Bible (iBhayibhili Elingcwele) 1978

UElisha wenza isimangaliso ngehloka

1Ixuku labaprofethi lathi kuElisha: Khangela, indawo esihlala kiyo ngaphansi kwakho kayisasanelanga;

2sivumele siye eJordani, sigamule khona izigodo ukuba sakhe indawo esizahlala kiyo. Yena wathi: Kulungile, hambani.

3Omunye wabo wasesithi: Sicela ukuba lawe uhambe lenceku zakho. Waphendula wathi: Kulungile, ngizahamba.

4Wasehamba labo; sebefikile eJordani bagamula izihlahla.

5Kodwa omunye esagamula ugodo, ihloka lakhe lakhumuka lawela emanzini. Wasememeza esithi: Maye, nkosi yami! Bengilebolekile.

6Umuntu kaNkulunkulu wasesithi kuye: Liwele ngaphi? Esemtshengisile indawo lapho liwele khona, wagamula uswazi, waluphosela khona, ihloka landenda.

7Wasesithi kuye: Lithathe. Yena waseselula isandla sakhe, walithatha.

UElisha lempi yamaSiriya

8Kwathi ngesinye isikhathi inkosi yaseSiriya isilwa loIsrayeli yacebisana lenceku zayo isithi: Ngizahlasela ekuthanathaneni.

9Kodwa umuntu kaNkulunkulu wathumela ilizwi enkosini yakoIsrayeli wathi: Qaphela ukuba ungedluli kulindawo, ngoba amaSiriya aya khona.

10Inkosi yakoIsrayeli yasithumela ilizwi kuleyondawo eyayitshiwo ngumuntu kaNkulunkulu. Wayelokhu eyixwayisa inkosi, lenkosi yayihlala iqaphele izikhathi zonke nxa iseduze laleyondawo.

11Inkosi yaseSiriya yakhathazeka kakhulu enhliziyweni yayo ngenxa yalokhu. Yasibiza inceku zayo isithi kuzo: Ake lingitshele ukuthi nguwuphi kini osinikele enkosini yakoIsrayeli na?

12Enye inceku yathi: Kakho, nkosi; kodwa uElisha umprofethi okhona koIsrayeli uyayitshela inkosi yakoIsrayeli amazwi owakhuluma endlini yakho yokulala.

13Yona yasisithi: Hambani liyedinga lapho akhona, ukuze ngithumele kuye ngimbambe. Kwathiwa kuyo: UseDothani.

14Yasithumela khona impi enkulu lamabhiza lenqola zokulwa; bafika ebusuku, bawuzingelezela umuzi.

15Kwathi inceku yomuntu kaNkulunkulu isivukile ekuseni kakhulu yaphumela ngaphandle, yabona impi lamabhiza lenqola zokulwa kuzingelezele umuzi. Yathi: Maye, nkosi yami! Sizakwenza njani na?

16UElisha wathi: Ungesabi, ngoba labo abangakithi banengi ukwedlula labo abangakibo.

17UElisha wasekhuleka esithi: Nkosi, ngiyakuncenga, akuvule amehlo akhe ukuba abone. INkosi yasiwavula amehlo alowomuntu, wabona ukuthi intaba yonke igcwele amabhiza lenqola zokulwa zomlilo zihanqe uElisha.

18Kwathi lapho amaSiriya esamlanda, uElisha wakhuleka eNkosini wathi: Akubehlisele ubuphofu lababantu, ngiyakuncenga. Yasibehlisela ubuphofu njengokucela kukaElisha.

19UElisha wasesithi kibo: Indlela kakusiyo le, futhi lomuzi kakusiwo lo; ngilandelani; ngizakulisa kulowomuntu elimdingayo. Wasebasa eSamariya.

20Kwathi besand’ukungena nje eSamariya, uElisha wathi: Nkosi, vula amehlo alababantu ukuba babone. INkosi yasiwavula amehlo abo, basebekhangela, babona ukuba baphakathi kweSamariya.

21Nxa inkosi yakoIsrayeli ibabona yathi kuElisha: Baba, ngibabulale na? Ngibabulale na?

22Kodwa waphendula wathi: Ungababulali. Ungababulala yini labo ongabathumbanga ngomkhonto langomtshoko wakho na? Banike ukudla lamanzi ukuba badle banathe, babuyele enkosini yabo.

23Yasibenzela idili elikhulu, badla banatha; yabayekela bahamba, baya enkosini yabo. AmaSiriya asekhawula ukuhlasela ilizwe lakoIsrayeli.

UElisha lokuvinjezelwa kweSamariya

24Emva kwalokho uBenihadadi inkosi yaseSiriya wabutha yonke impi yakhe, wasuka wayavimbezela iSamariya.

25Kwaba khona indlala enkulu eSamariya ngesikhathi sokuvinjezelwa kwalo; ikhanda likababhemi lathengiswa ngamashekeli esiliva angamatshumi aficaminwembili, legajana lombhida othile ngamashekeli amahlanu esiliva.

26Kwathi ngolunye usuku inkosi yakoIsrayeli ihamba nje phezu komduli womuzi, owesifazana othile wamemeza wathi kiyo: Akusize, nkosi yami!

27Yona yathi: Uba iNkosi uNkulunkulu ingakusizi, minake usizo ngizaluthatha ngaphi? Ngizaluthatha esikhamelweni sewayini yini, kumbe esizeni na?

28Uhlutshwa yini? Yena waphendula wathi: Lowesifazana uthe kimi: Letha umntanakho ukuba simudle lamuhla; kusasa sizakudla owami.

29Sasesimpheka umntanami, samudla. Ngosuku olulandelayo ngasengisithi kuye: Letha umntanakho ukuba simudle. Kodwa yena wayesemfihlile umntanakhe.Dute 28:57

30Kwathi inkosi isizwa amazwi alowesifazana yadabula izigqoko zayo. Inkosi yayihamba phezu komduli; lapho abantu beyikhangela babona ukuthi yayigqoke isambatho sokulila ngaphansi emzimbeni wayo.

31Inkosi yathi: UNkulunkulu kangihlanekele ngokwengezelelweyo uba ngingamqumi ikhanda uElisha indodana kaShafati lamuhla.

32UElisha wayehlezi endlini yakhe labadala. Inkosi yasithuma umuntu; kodwa lesisithunywa singakafiki, uElisha wathi kwabadala: Liyabona ukuthi lowombulali uthumele isithunywa ukuba ngiqunywe ikhanda na? Khangelani, lapho isithunywa sifika, livale umnyango, libambe isivalo siqine. Kalizizwa izisinde zenkosi yakhe isilandela na?

33Kwathi esakhuluma labo, inkosi yafika kuye yathi: Inkathazo yonke le ivela eNkosini uNkulunkulu. Pho, ngingabe ngisathembelani ukuthi izasisiza na?