1Lapho esezwile uIshiboshethi indodana kaSawuli ukuthi uAbineri ufele eHebroni, wangenwa ngumhedehede, labo bonke abakoIsrayeli bakhathazeka.
2Indodana kaSawuli yayilamadoda amabili ayeyizinduna zamaqela okuhlasela, ibizo lenye lalinguBahana, lebizo lenye linguRekabi, amadodana kaRimoni indoda yakoBenjamini yaseBerothi; ngoba iBerothi lalo lalibalelwa koBenjamini;
3abaseBerothi babalekela eGithayimi, bahlala khona kwaze kwaba lamuhla.
4UJonathani indodana kaSawuli wayelendodana eyayiyisilima enyaweni zombili. Yayileminyaka emihlanu ekufikeni kombiko wokufa kukaSawuli loJonathani uvela eJezereli; umlizane wayo wayithatha, wabaleka; kwathi ekuphangiseni kwakhe ukubaleka, yawa yalimala. Ibizo layo lalinguMefiboshethi.
5Amadodana kaRimoni waseBerothi, uRekabi loBahana, asuka aya endlini kaIshiboshethi, afika selitshisa ilanga, yena wayelele ephumula emini.
6Owesifazana olinda umnyango wendlu wayekade esela amabele, wasewozela elala; ngakho uRekabi loBahana umfowabo bangena phakathi.
7Sebengenile endlini, esalele endlini yakhe, bamtshaya, bambulala, baquma ikhanda lakhe; balithatha, bahamba ngendlela yaseAraba ubusuku bonke.
8Balisa kuDavida eHebroni. Bathi kuye: Nanti ikhanda likaIshiboshethi indodana kaSawuli, isitha sakho ebesifuna ukukubulala; iNkosi uNkulunkulu iphindiselele lamuhla inkosi yami kuSawuli lakuyo inzalo yakhe.
9Kodwa uDavida wabaphendula uRekabi loBahana umfowabo, amadodana kaRimoni waseBerothi, wathi: Ngifunga iNkosi engihlenge ezinhluphekweni zonke,
10lowo owangibikela wathi: USawuli ufile; ecabanga ukuthi uletha izindaba ezinhle, ngambamba, ngambulala eZiklagi, kwaba ngumvuzo engamnika wona wezindaba zakhe ezinhle.2 Sam 1:1–16
11Phoke, lapho abantu ababi bebulele umuntu olungileyo endlini yakhe esembhedeni wakhe, angiyikubiza yini igazi lakhe ezandleni zenu, ngilibhubhise lina emhlabeni na?
12UDavida waselaya insizwa zakhe, zababulala, zabaquma izandla lenyawo, zabaphanyeka eceleni kwechibi laseHebroni. Kodwa zathatha ikhanda likaIshiboshethi, zalingcwaba engcwabeni likaAbineri eHebroni.
Who We AreWhat We EelieveWhat We Do
2025 by iamachristian.org,Inc All rights reserved.
